Ebaruha y’Erimbere eya Petero
4 Kundi Kristo mwaghalhwa omwa mubiri, nenyu muyitheghekere amalhwa imune n’obulengekania ng’obo;* kundi omundu oyuwabiryaghalhwa omwa mubiri abirileka ebibi, 2 nuku obuthuku bwiwe obukisighereyo iniane omwa mubiri, iniabya isyangathasyabyaho busana n’esyongumbu sy’abandu, aliwe busana n’erisonda lya Nyamuhanga. 3 Kundi obuthuku obwabirilhaba imunemukolha erisonda ly’ebihanda bukaghunza, omughulhu mwabya mukabera erikolha eby’obukamya meso,* esyongumbu esitheko eriyikakirya, erinywa bunene, eriyitsemesya ly’ebyughungu,* erikunda, n’eby’esyonye eby’eriramya esyosanamu. 4 Bakasweka kundi simukilendera nabu omwa nzira iyan’eyo ey’obuthya-buthya, neryo bakabatsuma. 5 Aliwe abandu aba bakendi syalhuthonda embere sy’oyuyitheghekire eritswera abaliho n’abaholire. 6 Kundi nibya ekyo ky’ekyaleka engulhu yuwene iyathulhughanibwa n’okwa baholi, nuku nomwakine indi bakatswerawa omwa mubiri erikwamana n’amalengekania w’abandu, ibabyaho erikwamana n’omulimu erisighikira okwa malengekania wa Nyamuhanga.
7 Aliwe enduli y’emyatsi yosi yabiriseghera hakuhi. Busana n’ekyo, mubye n’obulengekania bw’amenge kandi mubye imunatheghirye* bikahika okw’isaba. 8 Ekikulhu okwa byosi, mwanzane kutsibu, kundi olhwanzo lhukakuningira ebibi bingyi. 9 Mukokanaye ahathe eriyineghenia. 10 Ngoku obuli mundu abirihebwa ekihembo, mubikolesaye omw’iherezania ng’abimaniri babuya ab’olhukogho lhwa Nyamuhanga olhukakanganibawa omwa syonzira muthina-muthina. 11 Omundu wosi-wosi amakania, akole athya omw’ikania ebinywe bya Nyamuhanga; owosi-wosi amaherezya, akole athya erikwamana n’akaghalha ako Nyamuhanga akaha; nuku omo myatsi yosi Nyamuhanga angahebwa olhukengerwa erilhabira omu Yesu Kristo. Olhukengerwa n’obuthoki ni biwe kera na kera. Amina.
12 Abanzwa, simusweke busana n’ebitsibu ebikalire ebyo munemubana, eribya nga ni kindu kihyaka ekyamababyako. 13 Omwakanya k’ekyo, mulhole embere eritsemera olhulengo olho mwamathahikako omw’isangira omw’ighalhwa lya Kristo, nuku mwanga syatsema n’eriyitsangura n’okw’ibisulhwa ly’olhukengerwa lhwiwe. 14 Mwamabya imunemutsumwa busana n’erina lya Kristo, muli n’obutseme, kundi omulimu w’olhukengerwa, ee, omulimu wa Nyamuhanga, ali okw’inywe.
15 Aliwe sihabye n’omughuma w’okw’inywe oyukaghalhawa ambu kundi ni mwithi kutse omwibi kutse omukolha-nabi kutse oyukayingiraya omwa myatsi y’abandi. 16 Aliwe owosi-wosi amaghalhwa ng’Omukristayo, isyakwa esisoni, aliwe alhole embere eriha Nyamuhanga y’olhukengerwa inianemwahulhwa omwa lina eri. 17 Kundi bw’obuthuku obwahirawaho nuku eritswera litsuke omwa nyumba ya Nyamuhanga. Neryo lyamatsuka okw’ithwe, ibikendi syabya bithi okwa bathowa engulhu yuwene ya Nyamuhanga? 18 “Kandi ibbwa erilhamibwa ly’omuthunganene lyamathabya isiriryasa bweghu-bweghu, ibikendi syabya bithi oko yuthekenga Nyamuhanga n’omukolha-nabi?” 19 Neryo kwesi, abakaghalhawa erikwamana n’erisonda lya Nyamuhanga balhole embere eriyihira* omo byalha by’Omuhangiki oyutheleghulha ibanemukolha ebibuya.