Ebaruha ya Yakobo
4 Ni byahi ebikaletha amalhwa n’erikakalhukana omwa kathi-kathi kenyu? Mbwino sibirilhua okwa syongumbu syenyu sy’omubiri esikaletha amalhwa omw’inywe? 2 Mukayisunza aliwe simuwithe. Mukabera eritha n’eriyighomba, aliwe simuli bana ebya mukayisunza. Mukabera erilhwa n’erikakalhukana. Simuwitheki kundi simuli saba. 3 Omughulhu mukasaba, simuli hebawa kundi mukasaba imunawithe ekighendererwa kibi, nuku mwanga kikolesya okwa syongumbu syenyu sy’omubiri.
4 Abamaraghane, simwasi ngoku obunywani n’ekihugho ni buyighu na Nyamuhanga? Busana n’ekyo, owosi-wosi oyuwanzire eribya munywani w’ekihugho akayiyiramo nzighu ya Nyamuhanga. 5 Kutse mbwino mukalengekanaya muthi sihali enzumwa eyikaleka erisako iryabugha lithi: “Omulimu ow’abir’ikalha omw’ithwe, omw’itsuru akabera eriyighomba”? 6 Aliwe olhukogho olho Nyamuhanga akaha ni lhunene. Neryo akabugha athi: “Nyamuhanga akahakanisaya ab’emiyiheko, aliwe akakanganaya abayikehirye b’olhukogho.”
7 Busana n’ekyo, inywe inywibene-bene mughondere Nyamuhanga; aliwe muhakanisaye Diabolo, nayu akendi thibitha iniabasagha. 8 Muyithunde hakuhi na Nyamuhanga, nayu akendi yithunda hakuhi nenyu. Munabaye ebyalha byenyu, inywe bakolha-nabi, mweraye emithima yenyu, inywe mukathika-thika. 9 Mubye omwa bulighe, mususumane, kandi mulire. Muleke eriseka lyenyu lihindukemo erisusumana n’etseme yenyu mwa bulighe. 10 Muyikehaye embere sya Yehova,* nayu akendi bahamya.
11 Balikyethu, mulekere aho erikananganiako nabi. Owosi-wosi oyukakanaya nabi oku mulikyabu kutse oyukatswera mulikyabu akakanaya nabi okwa mighambo kandi akatswera emighambo. Neryo wamatswera emighambo, isiwuli mukoli w’emighambo aliwe iwuli mutsweri. 12 Hali mughuma musa Oyukaha emighambo kandi Omutsweri, oyukathoka erilhamya n’erithoghothya. Aliwe iwe, wulindi wuthi wukatswera omuliranwa wawu?
13 Mwase lino, inywe mukabugha muthi: “Munabwire kutse omungya thukendi syaghenda omwa tawuni eyi ithwaghunzayo mwaka mughuma, ithwakolha esuburu, n’eribana amaghoba,” 14 aliwe simwasi ngebe yenyu nga yikendi syabya yithi omungya. Kundi muli lhuhohe olhukabyaho kathuku kake neryo ilhwabulirana. 15 Omwakanya k’ekyo, mutholere imwabugha muthi: “Yehova* amabya ananzire, ithukendi byaho kandi ithwakolha eki kutse kirya.” 16 Aliwe lino mukayihekera emiyihalhambo yenyu y’erighundu. Eriyihalhamba lyosi ng’eryo ni libi. 17 Busana n’ekyo, omundu amabya inianasi ngoku angakolha ekihikire aliwe akaghana erikikolha, in’ilholho okw’iyo.