Emibiiri y’Abakwenda
15 Neryo abalhume balebe mubandaghalha bakalhua e Yudea bamatsuka erikangirirya balikyethu bathi: “Mwamathendi banibwa erikwamana n’emirwa ya Musa, isimwanga lhamibwa.” 2 Aliwe habere habiribya erithendi yitheghererania n’erikakalhukana ahakathi-kathi k’abo na Paulo na Baranaba, muhahirwa emitheghekere nuku Paulo, Baranaba, n’abandi bahethukire eyiri abakwenda n’abasyakulhu e Yerusalemu busana n’omwatsi* oyu.
3 Neryo ekithunga kyabere kyabiribatsindika eribahikya bulebe, abalhume aba mubalholha embere erilhaba omwa Foiniki ne Samaria, ibanemukania buuli oko mwatsi w’eribinduka ly’ab’ebihanda kandi mubaleka balikyethu abosi ibatsema kutsibu. 4 Babere bahika e Yerusalemu, ekithunga n’abakwenda n’abasyakulhu mubab’angirira ndeke kandi mubababwira emyatsi mingyi eyo Nyamuhanga akolha erilhabira omw’ibo. 5 Aliwe abaghuma b’okwa bali omwa kadini k’Abafarisayo ababya ibabirikirirya mubahangana omwa bithumbi byabo n’eribugha bathi: “Batholere ibabanibwa kandi mubabwire muthi baghendere okwa Mighambo ya Musa.”
6 Neryo abakwenda n’abasyakulhu mubahindana haghuma erikania okwa mwatsi oyu. 7 Habere habiribya erikakalhukana linene, Petero mwahangana amababwira athi: “Balhume, balikyethu, munasi ndeke ngoku omwa biro ebilhabire Nyamuhanga mwanyisombolha omw’inywe nuku erilhabira omwa buno bwaghe abandu b’ebihanda bowe ekinywe ky’engulhu yuwene kandi b’ikiriraye. 8 Na Nyamuhanga, oyuwasi emithima, mwaha obwema omw’ibaha omulimu abuyirire ngoku anakolha okw’ithwe bosi. 9 Kandi mwathahiraho embaghane yosi-yosi ahakathi-kathi kethu nabo, aliwe mw’erya emithima yabo erilhabira omw’ikirirya. 10 Neryo busana naki lino mukalenga oku Nyamuhanga omw’ihira okwa bikya by’abigha kw’engomo eyo abathatha-kulhu bethu kutse ithwe thuthe thwanga thoka eriheka? 11 Mbaghane n’ekyo, thwikirirye ngoku thukalhamibawa erilhabira omwa lhukogho lhw’Omukama Yesu ngoku nabo ban’ikirirye.”
12 Neryo egurupu yosi muyabya bukuthu, kandi mubatsuka erihulikirira Baranaba na Paulo bakababwira ebiminyikalho bingyi n’ebikathikaya ebya Nyamuhanga akolha erilhabira omw’ibo omwa kathi-kathi k’ab’ebihanda. 13 Babere baghunza erikania, Yakobo mwasubirya athi: “Balhume, balikyethu, munyihulikirire. 14 Simioni abirithukanirya ndeke-ndeke ngoku engendo y’erimbere Nyamuhanga mwalengekania okwa b’ebihanda akasombolhamo abandu busana n’erina liwe. 15 Kandi ebinywe by’Abaminyereri bikalighirana n’eki, ngoku kihandikire kithi: 16 ‘Enyuma w’emyatsi eyi ngendi syasubulha n’erithasyahangania ehema* ya Dawudi eyabirithera; ngendi syathasyahimba ebisambukalirya byayu n’erisuba-subaniayo, 17 nuku abandu abasighereyo banga sondekania Yehova erilhua okwa muthima, haghuma n’abandu b’ebihanda byosi, abandu abakahulhawa omwa lina lyaghe, Yehova athya, oyukakolha emyatsi eyi, 18 eyasibwe eritsuka kera.’ 19 Neryo erithwamu* lyaghe siry’eriaghalya ab’ebihanda abakasuba oku Nyamuhanga, 20 aliwe eribahandikira ngoku batholere ibayihighulha okwa bindu ebitsandibirwe omwa syosanamu, okwa by’obutswatswa,* n’okwa kyabiriniwa,* n’okwa musasi. 21 Kundi eritsuka kera Musa abiribya inianawithe abakamuthulhughanaya omwa buli tawuni, kundi akasomawa omwa mulenge owakowika omwa syosinagogi okwa buli sabato.”
22 Neryo abakwenda n’abasyakulhu, haghuma n’ekithunga kyosi, mubathwamu erithuma e Antiokia y’abalhume abasombolhawa omw’ibo, haghuma na Paulo na Baranaba; mubathuma Yuda oyukahulhawamo Barisaba na Sila, abalhume ababya bakasondolha omwa kathi-kathi k’abalikyethu. 23 Mubahandika bino n’eribahekyabyo:
“Abakwenda n’abasyakulhu, baghalha benyu, okwa balikyethu abe Antiokia, Suria, na Kilikia abalhuire omwa b’ebihanda: Thwamabaramukya! 24 Kundi thwabiriowa ngoku abandi omw’ithwe mubabahikireko n’eribaghunzako obuholho omwa ebyo babugha, erianza eribatabura kw’obulengekania, nomwakine indi muthuthabaha busondoli bwosi-bwosi, 25 thwabirilighirana n’erithwamu erisombolha abalhume abo thwamabathumira haghuma n’abanzwa bethu Baranaba na Paulo, 26 abalhume ababirihayo esyongebe syabo busana n’erina ly’Omukama wethu Yesu Kristo. 27 Busana n’ekyo, thukabathumira Yuda na Sila nuku nabo bangababwira emyatsi iyan’eyo omwa buno. 28 Kundi omulimu abuyirire nethu ithw’ibene-bene sithwanzire eryongera eribahirako emiheke kwihaho emyatsi eyikayithaghisibawa eno: 29 erilholha embere eriyihighulha okwa bindu ebiryahongerawa esyosanamu, okwa musasi, okwa kyabiriniwa,* n’okwa by’obutswatswa.* Mwamalholha embere eriyitheya okwa myatsi eyi, imukendibya ndeke. Mubye n’amaghalha awuwene!”*
30 Neryo abalhume aba mubaghenda, bamandaghalira e Antiokia, neryo mubahindania egurupu yosi ya haghuma n’eribaha ebaruha. 31 Babere babirisomayo, mubatsema kutsibu busana n’ebinywe ebikahimba. 32 Neryo kundi Yuda na Sila nabo babya baminyereri, mubahimba balikyethu omwa mikania mingyi n’eribaghumya. 33 Babere babirighunzayo buthuku, balikyethu mubababwira bathi baghende buholho eyiri abalyabathuma. 34 —— 35 Aliwe Paulo na Baranaba mubasighalha e Antiokia, haghuma n’abandi bangyi bakakangirirya n’erithulhughania engulhu yuwene y’ekinywe kya Yehova.
36 Habere halhaba biro birebe, Paulo mwabwira Baranaba athi: “Lino* thusubeyo thubungire balikyethu omwa buli tawuni eyo thwathulhughanayamo ekinywe kya Yehova, erilebya nga baneyo bathi.” 37 Baranaba abya iniabirithwamu erighenda na Yohana, oyukahulhawamo Mariko. 38 Aliwe Paulo mwathanza Yohana akaghenda nabo, kundi Yohana mwabasigha e Pamfilia kandi abya isyathaghenda nabo okwa mubiiri. 39 Busana n’ekyo, muhabya erikaramirana linene, neryo mubaghabulhana; neryo Baranaba mwathwalha Mariko bamasokera e Kipuro. 40 Paulo mwasombolha Sila neryo balikyethu babere babirisaba bathi olhukogho lhwa Yehova lhumubyeko, mwaghenda. 41 Mwalhaba e Suria ne Kilikia inianemughumya ebithunga.