Ebaruha y’Erimbere eya Yohana
2 Baana baghe balere, ngabahandikira emyatsi eyi nuku simukole ekibi. Aliwe owosi-wosi amakolha ekibi, thuwithe omuwathikya oyuli na Thatha, Yesu Kristo, omuthunganene. 2 Kandi iyo ni kihongo ky’erighonga-ghonga busana n’ebibi byethu, isi busana n’ebibi byethu bisa aliwe n’eby’ekihugho kyosi. 3 Kandi erilhabira omw’eki thukaligha ngoku thwabirimuminya, ni bugha ambu, thwamalholha embere erighendera okwa bihano biwe. 4 Oyukabugha athi, “Nabirimuminya,” aliwe isyalighendera okwa bihano biwe ini mubehi, n’ekwenene isiyiri omwa mundu oyo. 5 Aliwe owosi-wosi oyukaghendera okwa kinywe kiwe, omo kwenene, olhwanzo lhwa Nyamuhanga ilhwabirihikana omwa mundu oyo. Omw’eki thukaminya ngoku thumathikene nayu. 6 Oyukabugha athi akasighalha inianamathikene nayu, nayu iyuwene-wene atholere inialholha embere erilendera ngoku oyo nayu alendera.
7 Banzwa, ngabahandikira, butsira ekihano kihya-kihya, aliwe ekihano ekya kera ekyo mwabiribya imune nakyo erilhua okw’itsuka. Ekihano ekya kera eki ky’ekinywe ekyo mwowa. 8 Kandi, ngabahandikira ekihano kihya-kihya, eky’okwenene okw’iyo n’okw’inywe, kundi omwirima anemuhwaho n’ekyakakalha eky’okwenene kyabiritsuka erikolerya.
9 Oyukabugha athi ali omwa kyakakalha aliwe iniakapona mulikyabo akabya iniakine omwa mwirima. 10 Oyukanza mulikyabo akasighalha omwa kyakakalha, kandi omw’iyo simuli ekikathwikalhaya. 11 Aliwe oyukapona mulikyabo ali omwa mwirima kandi akalendera omwa mwirima, kandi syasi eyo akaya, kundi omwirima abirilibania ameso wiwe.
12 Ngabahandikira, inywe baana balere, kundi mwabirighanyirwa ebibi byenyu busana n’erina liwe. 13 Ngabahandikira, inywe bathatha, kundi mwabiriminya oyuwabyaho eritsuka okwa nzuko. Ngabahandikira, inywe balhwana, kundi mwabirikinda omubi. Ngabahandikira, inywe baana balere, kundi mwabiriminya Thatha. 14 Ngabahandikira, inywe bathatha, kundi mwabiriminya oyuwabyaho eritsuka okwa nzuko. Ngabahandikira, inywe balhwana, kundi muwithe akaghalha kandi ekinywe kya Nyamuhanga kikasighalha omw’inywe kandi mwabirikinda omubi.
15 Simwanze ekihugho kutse ebindu ebiri omwa kihugho. Owosi-wosi amanza ekihugho, olhwanzo lhwa Thatha isilhuli omw’iyo; 16 kundi ebyosi ebiri omwa kihugho—esyongumbu sy’omubiri n’esyongumbu sy’ameso n’erikangania ebya wuwithe omwa ngebe—sibirilhua oku Thatha aliwe bikalhua okwa kihugho. 17 Eryongera okw’ekyo, ekihugho kinemuhwaho kuthya n’esyongumbu syakyo, aliwe oyukakolha erisonda lya Nyamuhanga akabyaho kera na kera.
18 Baana balere, ni saha y’erighunzerera, kandi ngoku mwabiriowa ngoku omuhakanisya wa Kristo anemwasa, nibya na lino abahakanisya ba Kristo abangyi babiributhuka, eki kikaleka ithwaminya ngoku ni saha y’erighunzerera. 19 Mubalhua omw’ithwe, aliwe sibabya b’omusindo wethu; kundi ku babya ini b’omusindo wethu, bangasighere ibane nethu. Aliwe mubalhua omw’ithwe nuku kyanga minyikalha ngoku sib’abosi indi ni b’omusindo wethu. 20 Kandi mwabirihakabibwa amaghutha erilhua oko yubuyirire, kandi inywe bosi munawithe eriminya. 21 Ngabahandikira, isi bugha indi kundi si mwasi ekwenene, aliwe kundi munasiyo, kandi kundi sihali mabehi awakalhua omwa kwenene.
22 Omubehi y’owahi athe iy’oyukaghana athi Yesu si Kristo? Oyu y’omuhakanisya wa Kristo, oyukaghana Thatha na Mughalha. 23 Obuli mundu oyukayighana Mughalha syawithe Thatha. Aliwe oyukaligha Mughalha awithe na Thatha. 24 Neryo inywe, ebyo mwabiryowa erilhua okw’itsuka bitholere ibyasighalha omw’inywe. Ebyo mwabiryowa erilhua okw’itsuka byamasighalha omw’inywe, imukendi sighalha imunamathikene na Mughalha kandi imunamathikene na Thatha. 25 Eryongera okw’ekyo, eki ky’ekyo iyuwene-wene athulhaghanisaya—engebe y’erikotha.
26 Ngabahandikira emyatsi eyi eyihambire okwa bakanza eribathebya. 27 Aliwe inywe, erihakabibwa amaghutha eryo mwahebawa erilhua okw’iyo likasighalha omw’inywe, kandi simuli yithagha owosi-wosi eribakangirirya; aliwe erihakabibwa amaghutha eryalhua okw’iyo linemubakangirirya ebihambire okwa myatsi yosi kandi ni ly’okwenene kandi siry’amabehi. Ngoku lyanabiribakangirirya, musighale imunamathikene nayu. 28 Neryo lino, baana balere, musighale imunamathikene nayu, nuku akendi syabya akaminyikalibwa ithwabya ithunawithe obwiranda bw’erikania kandi isithwendi syayisununulha okw’iyo omw’ihemuka busana n’eribyaho liwe. 29 Mwamabya imunasi ngoku athunganene, obo kandi imunasi ngoku owosi-wosi oyukakolha ebithunganene akalhua okw’iyo.