Ebaruha y’Erimbere Okwa Banya Korinto

7 Neryo erikwamana n’emyatsi eyamwahandika, kyuwene omulhume erithendi thulha* okwa mukali; 2 aliwe busana n’erikanyirira ly’eby’obutswatswa,* obuli mulhume atholere iniabya n’omukali wiwe, n’obuli mukali abye na mwira wiwe. 3 Omulhume ahe mukali wiwe ekimutholere, n’omukali akole athya oko mwira wiwe. 4 Omukali syawithe buthoki oko mubiri wiwe, aliwe mwira wiwe yubuwithe; kuthya n’omulhume syawithe buthoki oko mubiri wiwe, aliwe mukali wiwe yubuwithe. 5 Owundi isy’ima owundi muthalyalhaghana erikolha ekyo okwa buthuku bulebe, nuku mwanga hira obuthuku bw’okw’isaba n’erithasyabya bughuma, nuku Sitani syabye akabalengako busana n’erithendi yikakirya lyenyu. 6 Aliwe ngabugha eki ng’enzira y’eribalighira, butsira ng’ekilhaghiro. 7 Aliwe, ambi abandu abosi balyathabya ng’ingye. Nomwabine, obuli mundu awithe ekihembo kiwe erilhua oku Nyamuhanga, owundi omwa nzira eyi, n’owundi omwa yindi.

8 Neryo ngabwira abahuru n’abakwakali indi ni kibuya okw’ibo bamasighalha ng’ingye. 9 Aliwe bamabya isibangathoka eriyikakirya, muleke bingire omwa butheke, kundi kyuwene eringira omwa butheke kwilhaba eryakirira omwa syongumbu.

10 Abali omwa butheke, ngabahana, butsira ingye aliwe Omukama, indi omukali syatholere akaghabulhana na mwira wiwe. 11 Aliwe omukali amaghabulhana na mwira wiwe, isyathasyathahibawa kutse asubanemu na mwira wiwe; n’omulhume syatholere akaleka mukali wiwe.

12 Aliwe okwa bandi ngabugha, ingye ng’ingye, butsira Omukama, indi: Mughalha wethu owosi-wosi amabya iniawithe omukali oyuthikirirye kandi omukali inianalighire er’ikalha nayu, isyamuleka; 13 n’omukali amabya iniawithe mwira wiwe oyuth’ikirirye kandi mwira wiwe inianalighire er’ikalha nayu, omukali isyamuleka. 14 Kundi omulhume oyuthikirirye akayirawa mo oyubuyirire busana na mukali wiwe, n’omukali oyuthikirirye akayira mo oyubuyirire busana na mughalha wethu; bithe bithya, abaana benyu ibakendibya isibahenirye, aliwe lino babuyirire. 15 Aliwe oyuthikirirye amathwamu erighenda,* aghende; mughalha wethu kutse mwali wethu syaboherwe omwa mibere ng’eyi, aliwe Nyamuhanga abiribabirikira eryasa eyiri obuholho. 16 Iwe mukali muthahibwa, wukaminya wuthi nga siwangalhamya mwira wawu? Kutse iba, wukaminya wuthi nga siwangalhamya mukali wawu?

17 Nomwabine, ngoku Yehova abiriha obuli mughuma y’erighabo, muleke obuli mughuma alendere ngoku Nyamuhanga amubirikira. Neryo ngaha obusondoli buno okwa bithunga byosi. 18 Mbwino omulhume wosi-wosi abya iniabirisangwa abanibwa akabirikirwa? Isyahindulha eribanibwa liwe. Omulhume wosi-wosi anabiribirikirwa isyabanibwe? Omulhume oyo syabanibawe. 19 Eribanibwa siriwithe mughaso, n’erithendi banibwa siriwithe mughaso; aliwe eky’omughaso ly’erighendera okwa bihano bya Nyamuhanga. 20 Omwa mibere yosi-yosi ey’obuli mughuma abirikirawamo, asighale muyo. 21 Mbwino wabirikirawa iwuli mukobe? Isiwaleka ekyo kikakulyambya; aliwe wamabya iwanganabya bwiranda, kolesaya akaghisa ako. 22 Kundi owosi-wosi oyuwabirikirawa omo Mukama ini mukobe ni mundu w’obwiranda ow’Omukama; kuthya owosi-wosi oyuwabirikirawa ini mundu w’obwiranda ni mukobe wa Kristo. 23 Mwaghulhawa omwa bughuli bulebe; mulekere aho eribya bakobe b’abandu. 24 Balikyethu, omwa mibere yosi-yosi eya buli mughuma abirikirawamo, asighale muyo embere sya Nyamuhanga.

25 Neryo okwa bathe bathabana mulhume,* singawithe kihano erilhua oko Mukama, aliwe ngaha ekirengekanio kyaghe ng’oyo Omukama akanganaya obughanyiri eribya muthaleghulha. 26 Busana n’ekyo, ngalengekanaya indi kyuwene kutsibu omundu erisighalha ngoku ane busana n’emibere eyikalire eyiriho. 27 Mbwino wuboherwe okwa mukali? Lekera aho erisondekania eriboholhwa. Mbwino wuli bwiranda siwuwithe mukali? Lekera aho erisondekania omukali. 28 Aliwe wamathahya wukabya isiwuthakolha kibi. Kandi oyuthe wathabana mulhume amathahibwa, omundu ng’oyo akabya isyathakolha kibi. Aliwe, abak’ingira omwa butheke bakabana amalighe omwa mubiri wabo. Aliwe nganza eribabalya.

29 Balikyethu ngababwira kino, endambi eyisighereyo ni nyike. Eritsuka lino, abawithe abakali babye ng’abathabawithe, 30 n’abakalira babye ng’abathelira, n’abakatsema babye ng’abathetsema, n’abakaghulha babye ng’abathawitheki, 31 n’abakakolesaya ekihugho babye ng’abathekikolesaya omwa buswire; kundi emibere y’ekihugho kino yinemuhinduka-hinduka. 32 Omo kwenene, nganza mubye butsira maghaniryo. Omulhume oyuthathahirye akahanga-hangaya busana n’emyatsi y’Omukama, ng’angabana athi erisimwa n’Omukama. 33 Aliwe omulhume oyuthahirye akahanga-hangaya busana n’emyatsi y’ekihugho, ng’angabana athi erisimwa na mukali wiwe, 34 neryo aghabene. Eryongera okw’ekyo, omukali oyuthathahibwe, kuthya n’oyuthe wathabana mulhume, bakahanga-hangaya busana n’emyatsi y’Omukama, nuku babye babuyirire omwa mibiri yabo n’omwa mulimu. Aliwe omukali oyuthahibwe akahanga-hangaya busana n’emyatsi y’ekihugho, ng’angabana athi erisimwa na mwira wiwe. 35 Aliwe ngabugha eki nuku mughasirawe, butsira eribakakirya,* aliwe eribakolya okwa kitholere n’erilholha embere erikenga Omukama ahathe erilengemeribwa.

36 Aliwe owosi-wosi amalengekania athi alimuyithwalha kithya-kithya busana n’eribya isyali omwa butheke,* kandi iniabirilhaba omwa kanyethu kabehi, kino ky’ekitholere ikyakolhwa: Mumuleke akole ekyo anzire; akabya isyathakolha kibi. Muleke ingire omwa butheke. 37 Aliwe omundu wosi-wosi amabya inianathekene omwa muthima kandi isihali ekikamukuna, aliwe iyukasondolha erithwamu liwe kandi iniabirithwamu omwa muthima wiwe erithend’ingira omwa butheke, iniakendibya ndeke. 38 N’oyuk’ingira omwa butheke akabya iniakendibya ndeke, aliwe oyuth’ingiramo akabya iniakendibya ndeke kwilhaba.

39 Omukali aboherwe oku mwira wiwe amabya akineho. Aliwe mwira wiwe amabirighotsera omwa lhuholho, akabya bwiranda erithasyingira omwa butheke n’oyo anzire, aliwe omo Mukama. 40 Aliwe omwa malengekania waghe, omukali iniakendi tsema kwilhaba amasighalha ngoku ane; kandi ahathe erithika-thika ngalengekanaya nganeko n’omulimu wa Nyamuhanga.