Ebaruha y’Erimbere Okwa Banya Korinto

8 Neryo okwa byalya ebikahongerawa esyosanamu: Thunasi ngoku ithwe bosi thunawithe eriminya. Eriminya likaletha emiyiheko, aliwe olhwanzo lhukahimba. 2 Omundu wosi-wosi amalengekania athi anasi ekindu, akabya isyali aminyakyo ngoku atholere iniaminyakyo. 3 Aliwe owosi-wosi amabya inianzire Nyamuhanga, oyo, Nyamuhanga anamwasi.

4 Neryo okw’irya ebyalya ebikahongerawa esyosanamu, thunasi ngoku esanamu ni buyira omwa kihugho kandi ngoku hali Nyamuhanga mughuma. 5 Kundi nomwakine indi hane esikahulhawa mo esyonyamuhanga, mbulha omwa lhubulha kutse okwa kihugho, ngoku hane “esyonyamuhanga” nyingyi na “abakama” bangyi, 6 omo kwenene okw’ithwe hali Nyamuhanga mughuma, ya Thatha, oyo ebindu byosi biriho busana nayu nethu thuliho busana nayu; kandi hali Omukama mughuma, Yesu Kristo, oyo ebindu byosi biriho erilhabira omw’iyo nethu erilhabira omw’iyo.

7 Aliwe sibugha indi abosi bawithe eriminya eri. Aliwe abandi busana n’eribya ibabya bakaramya esyosanamu, bakalya ebyalya ng’ekindu ekiryahongerawa esanamu, neryo kundi obunyamuthima-thima bwabu butsekire, bukatsandibawa. 8 Aliwe ebyalya sibyanga thusegherya hakuhi na Nyamuhanga; erithend’irya siririleka thukabya babi, kutse erirya siririleka thukabya babuya. 9 Aliwe muyitheghaye nuku obughabe bwenyu bw’erithwamu sibuthwikalhaye abatseke omwa nzira ndebe. 10 Omundu wosi-wosi amalhangira iwe wuwithe eriminya iwunemulira ebyalya omwa hekalhu y’esanamu, mbwino obunyamuthima-thima bw’omundu oyutsekire oyo isibwendibya kihiriti erihika okwa kiika ky’erirya ebyalya ebikahongerawa esyosanamu? 11 Neryo busana n’eriminya lyawu, omundu oyutsekire akahuthalibawa, mulikyenyu oyo Kristo aholera. 12 Omughulhu mukahalhaya oko balikyethu omwa nzira eyi n’erihuthalya obunyamuthima-thima bwabu obutsekire, mukahalhaya oku Kristo. 13 Ky’ekikaleka ebyalya byamabya ibikendi leka mulikyethu iniathwikalha, isinendi syathasyalya enyama nahake, nuku singathwikalhaye mulikyethu.