Okwa Banya Roma
12 Busana n’ekyo, balikyethu, ngabalemba-lemba omwa bughanyiri bunene bwa Nyamuhanga, indi muheyo emibiri yenyu ng’obuhere obuliho, obubuyirire kandi obwa Nyamuhanga akaligha, omubiiri owabuyirire omwa maaka wenyu w’erilengekania. 2 Kandi mulekere aho eribumbwa-bumbwa omo myatsi y’omulembe ono, aliwe mubinduke omw’ibindulha amalengekania wenyu, nuku mwanga yikakasirya erisonda lya Nyamuhanga eribuya, erikalighawa, kandi erihikene.
3 Kundi busana n’olhukogho olho nabirihebwa, ngabwira obuli mughuma omwa kathi-kathi kenyu indi isyayilengekanayako kutsibu kwilhaba ku kitholere, aliwe alengekanaye nuku abye n’obwenge obukakolha ndeke, ngoku Nyamuhanga abiriha* obuli mughuma erikirirya okwa lhulengo lhulebe. 4 Kundi ngoku thuwithe ebitsuku bingyi okwa mubiri mughuma, aliwe ebitsuku ebyosi sibirikolha mubiiri mughuma, 5 neryo nethu, nomwathune bangyi, thuli mubiri mughuma owamathikene na Kristo, aliwe obuli mughuma ni kitsuku ky’okwa wundi. 6 Neryo kundi thuwithe ebihembo ebithasosene erikwamana n’olhukogho olho thwahebawa, kyamabya ini ky’eriha obuminyereri, leka thuminyerere erikwamana n’olhulengo lhw’erikirirya lyethu; 7 kutse kyamabya in’ikolha omubiiri, leka thukole omubiiri oyo; kutse oyukakangiriraya, leka abye okw’ikangirirya liwe; 8 kutse oyukahira omwa bandi mw’omuhwa, leka abahire mw’omuhwa; oyukaghaba, leka akikole omwa buswire; oyukasondolha, leka akikole n’omuhwa; oyukakanganaya obughanyiri, leka akikole n’obutseme.
9 Olhwanzo lhwenyu silhubye mw’amathebo. Mupone ekibi; mwamakirire ekibuya. 10 Omo lhwanzo ng’olhw’abasubeneko, mubye n’olhwanzo lhw’eribuya-buyana. Mubye b’erimbere omw’isikania. 11 Mukole n’omuhwa, butsira bughatha.* Muleke omulimu abahire mw’omuhwa. Mukolere Yehova. 12 Mutseme omo maha. Muyiyinaye omwa malighe. Muyitsingirire omw’isaba. 13 Muhe ababuyirire erikwamana n’ebiyithawa byabo. Mukwama-kwamanaye omubere w’erikokya. 14 Mulhole embere eritsumulha abak’endereraya; mutsumule, simutsume. 15 Mutseme haghuma n’abakatsema; mulire haghuma n’abakalira. 16 Muthunge okw’abandi kw’amalengekania awali ng’agho muyiwitheko; simuhire obulengekania bwenyu oko bindu by’ekiika ky’ahighulhu,* aliwe mubuhire okwa by’ahisi. Simuyithwalemo b’amenge omwa meso wenyu.
17 Owosi-wosi amakukolera ekibi isiwamuliha omwa kibi. Mulengekanaye ekyuwene nga ky’ekyahi erikwamana n’amalengekania* w’abandu bosi. 18 Kyamathokekana, okwa lhuhandi lhwenyu, mubye buholho n’abandu bosi. 19 Abanzwa, simuyithuhuliraye, aliwe muleke Nyamuhanga akanganaye erihithana liwe; kundi kihandikire kithi: “‘Erithuhulya ni lyaghe; ngendi syathuha,’ Yehova athya.” 20 Aliwe “enzighu yawu yamakwa enzalha, ihayo eky’erirya; yamakwa enyotha, ihayo aw’erinywa; kundi omw’ikolha eki iwukendi runda amakalha w’omuliro okwa muthwe wiwe.”* 21 Isiwalighira ekibi kikakukinda, aliwe wulhole embere erikinda ekibi omwa kibuya.