Emibiiri y’Abakwenda
24 Enyuma w’ebiro bithano, omuhereri mukulhu ya Anania mwandaghalha haghuma n’abakulhu balebe n’embuyi* y’abandu oyukahulhawamo Tertulo, neryo mubabwira gavana y’olhubanza olhwa bawithe oku Paulo. 2 Abere abirikirwa, Tertulo mwatsuka erimuhandikirira athi:
“Erilhangira ngoku thuwithe obuholho bunene erilhabira omw’iwe kandi ngoku erilhabira omwa menge wawu habiribya esyombinduka omwa kihugho kino, 3 mughulhu wosi kandi n’omwa myanya yosi thukaligha eki n’erisima linene, Iwe w’Ekitsumbi Kinene Feliki. 4 Aliwe erithendi kusibyayo, ngakulemba-lemba wuthuhulikirire hake omwa lhukeri lhwawu. 5 Kundi thwabirilhangira omulhume oyu ku ni ndabanguli,* oyukaletha eriyisamambulha omwa Bayuda bosi omwa kihugho kyosi, kandi ni mwimaniri w’akadini k’Abanazareti. 6 Kandi mwalengaho eritsandya ehekalhu, neryo muthwamuhambire. 7 —— 8 Wamayibuliryayo iwukendi minya esyombanza esyosi esi esya thumuwitheko.”
9 Busana n’ekyo, Abayuda nabo mubayiyunga okw’ibambira eri, ibakakakasaya bathi emyatsi eyi ni kwenene. 10 Gavana abere akoherya Paulo athi abughe, mwasubirya athi:
“Eriminya ndeke ngoku wabiribya iwune mutsweri w’ekihugho kino habw’emyaka mingyi, nganayitheghekire erikania omw’iyilhwirako. 11 Ngoku wangana yileberya iwuwene-wene, sihali halhaba ebiro ebilhabire okwa 12 ngali hethukire e Yerusalemu eriyaramya; 12 kandi mubatheya ingakakalhukana n’owosi-wosi omwa hekalhu kutse erihongererya ekingungu, mbulha omwa syosinagogi kutse omwa tawuni yosi. 13 Kutse nahathya sibanga kangania ebikaleka ibanyihandikirira. 14 Aliwe ngaligha eki embere syawu, ngoku erikwamana n’ekya bakahulhamo akadini, ako ka ngakoleramo Nyamuhanga w’abathatha-kulhu waghe omubiiri owabuyirire, ngoku ng’ikirirye emyatsi yosi eyiri omwa Mighambo n’eyihandikire omwa Baminyereri. 15 Kandi ngawithe amaha omu Nyamuhanga, amaha agho abandu aba nabo balindirire, ngoku hakayabya erilhubuka ly’abathunganene n’abathathunganene. 16 Busana n’eki, mughulhu wosi ngalengaho eribya ingane n’obunyamuthima-thima obuhenirye embere sya Nyamuhanga n’abandu. 17 Neryo enyuma w’emyaka mingyi, munasa erisyaha ekihanda kyethu ky’ebihembo by’olhukeri n’eriha amahere. 18 Nabere nganemukolha ebi, mubanyeya omwa hekalhu ingan’erire erikwamana n’emighambo, aliwe sinabya n’abandu bangyi kutse mundalethaho akatabanguko. Aliwe habya ihane Abayuda balebe erilhua omwa provisi ye Asia 19 abatholere eribya ibane hano embere syawu erinyihandikirira bamabya kwenene ibananyiwitheko mwatsi wosi-wosi. 20 Kutse abalhume abali hano bayibughire ibobene-bene nga ni kibi kyahi ekya banyibanako omughulhu n’imana embere sye Sanhedrini,* 21 kwihaho ekindu kighuma kino ekya nabugha omwa mulenge muuli ingan’imene omwa kathi-kathi kabo indi: ‘Ngatswerawa munabwire embere syenyu busana n’erilhubuka ly’abaholi!’”
22 Aliwe Feliki abere abiriminya ndeke okwenene okuhambire okwa Nzira eyi, mwasegherya olhubanza lhwabo lhw’embere athi: “Kamanda w’abasirikali ya Lusia akendibya abiryandaghalira eno, ngendithwamu okwa myatsi eyibahambireko eyi.” 23 Neryo mwahamulha omukulhu w’abasirikali athi omulhume oyo ahirawe omwa ngomo aliwe ahebawe obwiranda bulebe, kandi athi abandu biwe balighirawe erimutsomana.
24 Enyuma w’ebiro birebe Feliki mwasa na mukali wiwe Drusila, oyuwabya Muyuda, neryo mwathumira oku Paulo kandi mwamuhulikirira akakania oko mwatsi owahambire okw’ikirirya omu Kristo Yesu. 25 Aliwe Paulo abere akania okwa lithunganene, eriyikakirya, n’eritswera erikayasa, Feliki mwakwa obuba n’erisubirya athi: “Wusubeyo lino, aliwe ngendibya ingabana akaghisa ngendi thasyakuthumirako.” 26 Okwa buthuku ibwan’obo, aby’akalengekania athi Paulo akendi muha esyosente. Busana n’ekyo mwamuthumirako nibya mirundi mingyi n’erikanirania nayu. 27 Aliwe habere habirilhaba emyaka ibiri, Porkio Festo mwasuba omwa bwa Feliki; neryo kundi Feliki aby’anzire erisimwa n’Abayuda, mwasigha Paulo y’omwa ngomo.