Ebaruha Okwa Banya Filipi
1 Paulo na Timoteo, abaghombe ba Kristo Yesu, okwa babuyirire bosi abamathikene na Kristo Yesu abali e Filipi, haghuma n’abalebererya n’abaghombe abawathikya:
2 Olhukogho n’obuholho erilhua oku Nyamuhanga Thatha wethu n’Omukama Yesu Kristo bibye nenyu.
3 Ngasima Nyamuhanga waghe mughulhu wosi omughulhu ngab’ibuka 4 omwa buli saba lyaghe ly’erilemba-lemba busana nenyu inywe bosi. Obuli saba lyaghe ly’erilemba-lemba ngaliha inganatsemire, 5 busana n’erisighika* engulhu yuwene eritsuka okwa kiro ky’erimbere erihika na lino. 6 Kundi ngayikethere kino, ngoku oyuwatsuka omubiiri mubuya omw’inywe akendi ghunzereragho erihika okwa kiro kya Kristo Yesu. 7 Kihikire ingye erilengekania eki busana nenyu inywe bosi, kundi muli okwa muthima waghe, inywe mukasangira naghe omwa lhukogho omwa miriki y’eribohwa lyaghe n’omw’ilhwira okwa ngulhu yuwene n’erisondekania ehamuli y’abanya buthoki ey’erithulhughaniayo.
8 Nyamuhanga ni mwimiri waghe ngoku inywe bosi ngabakwire olhukando omwa lhwanzo lhw’eribuya-buya olhuli ng’olho Kristo Yesu awithe. 9 Kandi kino kyangalholha embere erisaba, indi olhwanzo lhwenyu lhwongere erikanyirira omw’iminya erihikire n’eriyitheghererya eryosi; 10 indi mwanga minya ebikulhu kutsibu, nuku mwangabya butsira kahinira n’erithendi thwikalya abandi erihika okwa kiro kya Kristo; 11 kandi indi mwang’usulhamo ebighuma by’erithunganene, ebikasa erilhabira omu Kristo Yesu, nuku Nyamuhanga ahebawe olhukengerwa n’eripipa.
12 Neryo balikyethu nganzire imwaminya ngoku emibere eyo ngalimu yabirileka engulhu yuwene iyalhandaghana, 13 erihika okw’ileka eribohwa lyaghe busana na Kristo iryaminywa omwa Batheya b’Omwami abosi n’abandi abosi. 14 Balikyethu bangyi omo Mukama babirisika busana n’eribohwa lyaghe, kandi banemwongera erikangania obulhume-lhume obw’erikania okwa kinywe kya Nyamuhanga ahathe erisagha.
15 Ni kwenene, abandi banemuthulhughania Kristo busana n’eritsuru n’obuha, aliwe abandi busana n’ekighendererwa kibuya. 16 Ab’ekighendererwa kibuya ibo banemuthulhughania Kristo habw’olhwanzo, kundi banasi ngoku nabirisombolhwa erilhwira okwa ngulhu yuwene; 17 aliwe abandi balya, bakakolha eki habw’erikakalhukana, isi busana n’ekighendererwa kibuya, kundi banzire erinyilethera ebitsibu omw’ibohwa lyaghe. 18 Mukalhwiririraki? Omwa byosi, mbulha bakakikolha omw’iyithendererya kutse omwa kwenene, Kristo anemuthulhughanibwa, kandi ngatsema busana n’eki. Nibya ngendi lholha embere eritsema, 19 kundi nganasi ngoku eki kikendi lhwiririramo omulhamu waghe erilhabira omw’isaba lyenyu ly’erilemba-lemba kandi busana n’obuwathikya bw’omulimu wa Yesu Kristo. 20 Eki kihambene n’ebya ngalindirire kutsibu n’amaha ngoku sinendi hemuka omwa nzira yosi-yosi, aliwe ngoku omwa bwiranda bwosi bw’erikania, na lino Kristo akendi hamibwa erilhabira omwa mubiri waghe ngoku kyanabya kikabya kera, mbulha omwa ngebe kutse omwa lhuholho.
21 Okw’ingye, eribyaho ni Kristo n’eriholha ni ghasirwa. 22 Neryo namabya w’erilholha embere eribyaho omwa mubiri, eki ni ndundi y’omubiiri waghe; aliwe ekya nangasombolha, sindi kiminyikalhaya. 23 Ngayibulha oko myatsi ibiri eyi, kundi ngayisunza eriboholhwa n’eribya na Kristo, kundi omo kwenene, eki ky’ekilengire. 24 Aliwe ekikayithaghisibawa kutsibu okw’ingye ly’erisighalha omwa mubiri busana nenyu. 25 Neryo kundi ngayikethere eki, nganasi ngoku ngendi lholha embere eribya nenyu inywe bosi nuku mukulha-kulhane n’eribya imunatsemire omw’ikirirya, 26 nuku etseme yenyu yangabogha omu Kristo Yesu busana naghe ingathasyabya nenyu.
27 Ekikulhu mubye* n’emibere eyitholere engulhu yuwene eyihambire oku Kristo, nuku mbulha namasa erisyabalholhako kutse singathasa, ambi inowa n’eriminya ku mun’imene ndeke omwa mulimu mughuma, omwa bughuma, erikolha haghuma buke bwakuboko busana n’erikirirya engulhu yuwene, 28 kandi ku simulyubaha nahake abakabahakanisaya. Eki kikakakasaya ngoku okw’ibo n’ithoghothibwa, aliwe okw’inywe ni mulhamu; kandi eki kikalhua oku Nyamuhanga. 29 Kundi mwabirihebwa olhusunzo busana na Kristo, isi busana n’erithamwikirirya lisa aliwe n’eriaghalhwa busana nayu. 30 Kundi munemulhaba omwa byamwalhangira ingalhabamo, ebyamunemwowa ku ngakinalhabamo.