Ebaruha ya Yuda
1 Yuda, omughombe wa Yesu Kristo, aliwe mughalha wobu Yakobo, okwa ababirikirawa abo Nyamuhanga Thatha anzire kandi abatheghibirwe busana na Yesu Kristo:
2 Ambi obughanyiri n’obuholho n’olhwanzo ibyongera eribya nenyu.
3 Banzwa, nomwakine indi munahiraho akaghalha kanene eribahandikira ebihambire okwa mulhamu ogho ithwe bosi thuwithe, munalhangira ikikayithaghisibawa eribahandikira eribahira mw’omuhwa w’erihiraho amani manene w’erilhwira erikirirya eryahebawa ababuyirire ngendo nguma isikyendi syathasyabya. 4 Enzumwa yaghe yiri yithi abandu balebe babiryombombera omw’inywe, ababya ibabirisombolhwa kera omo Masako busana n’eritswerwa eri; ni bandu abathekenga Nyamuhanga abakahindulha olhukogho lhwa Nyamuhanga mwa kindu ky’eriyihambulyamo busana n’emibere y’obukamya meso* kandi bakakanganaya ku bawire embere sy’oyuwathughulha kandi Omukama wethu, Yesu Kristo.
5 Nomwakine indi munasi ebyosi ebi, nganza eribibukya ngoku Yehova,* abere abirilhamya ekithunga ky’abandu erilhua omwa kihugho kye Misiri, enyuma waho, mwathoghothya abathekanganaya erikirirya. 6 N’abamalaika abaghana eribya omo mwanya wabo w’erimbere aliwe bamasighania omwanya wabo ow’abatholere er’ikalhamo, abiribabika omw’ibaboha omwa bibohi bya kera na kera omwa mwirima munene busana n’eritswera ly’ekiro kinene. 7 Omwa mibere iyan’eyo, e Sodomu ne Gomora n’ab’omwa syotawuni esithimbire kusyo nabo mubayihwerya omwa by’obutswatswa* obukalire n’erikwamirira esyongumbu sy’omubiri esithe sya buli kiro; babiribya ky’erileberyako eky’erithughusako akasali omw’isuyirwa ery’omuliro owakera na kera.
8 Nomuhanabya ebyosi ebi, abandu aba nabo banemuyihwerya omwa bilhotho, omw’itsandya omubiri, omw’ighaya ab’obuthoki, n’omw’ikania nabi okwa b’olhukengerwa. 9 Aliwe omughulhu Mikaeli omumalaika mukulhu akakalhukana na Diabolo n’erikuba obuhaka busana n’omubiri wa Musa, mwathalengesya erimusuyira omwa binywe by’ebitsumi, aliwe mwabugha athi: “Ambi Yehova* iniakukunga.” 10 Aliwe abandu aba bakakanaya nabi okwa myatsi yosi eyabatheyitheghereraya. N’okwa myatsi yosi eya bakayitheghereraya omwa nzira y’obuhangiranwa ng’ebisoro ebithawithe menge, bakalholha embere eriyithebya.
11 Obulighe okw’ibo, kundi babirikwama enzira ya Kaina kandi babirikwama olhughobe lhubi lhwa Balama ahabw’erihembwa, kandi babirithoghotha omwa mikanirye y’obuyisamambuli bwa Kora! 12 Aba ni syonguka esibisamire omwa maghetse okw’irya lyenyu linene ery’olhwanzo ibane okw’irya inene haghuma nenyu, abalisya abakayilisaya ahathe eryubaha; ebithu ebithemo mbulha ebikahekerawa eyi n’eyi omwa muyagha; emithi eyithehethaya okwa mughulhu wayo, iyabiriholha kabiri* n’erikulhangwa; 13 ebisunda by’okwa ngetse ebikahulhukaya erihulhu ly’esisoni syabo; esyongununu esithawithe enzira eyithulire, babiribikirwa omwirima munene owakera na kera.
14 Ow’omusanju eritsuka oku Adamu, ya Enoka, nayu mwaha obuminyereri obubahambireko omw’ibugha athi: “Lebaya! Yehova* mwasa n’engulele* y’ababuyirire biwe 15 eriletha eritswera okwa bosi, erihira olhubanza okwa bosi abathekenga Nyamuhanga busana n’emikolere yabo eyithekenga Nyamuhanga eyo bakolha omwa buthakenga Nyamuhanga kandi busana n’ebyosi ebikaswekaya ebyo abakolha-nabi abathekenga Nyamuhanga babugha okw’iyo.”
16 Abandu aba bakayithonga-thonga n’eriyineghenia okwa bikababana omwa ngebe, ibakakwama esyongumbu syabo, n’amuno wabo akabya mw’ebinywe bibi by’emiyihalhambo, ibanemupipa-pipa abandi* busana n’erianza eribaghobako.
17 Aliwe inywe, banzwa, mwibuke ebinywe ebya bughawa* n’abakwenda b’Omukama wethu Yesu Kristo, 18 ngoku babya bakababwira bathi: “Omwa biro by’enyuma hasyabya abasininguli, abakakwama esyongumbu syabo busana n’emyatsi eyithakenga Nyamuhanga.” 19 Aba babakalethaho erighabulhana, abandu ab’emibere y’olhusoro-soro,* isibali mw’obunyakirimu.* 20 Aliwe inywe, banzwa, muyihimbe okw’ikirirya lyenyu eribuyirire kutsibu, kandi musabe omwa buwathikya erikwamana n’omulimu abuyirire, 21 nuku mulhole embere eriyibika omo lhwanzo lhwa Nyamuhanga, imunemulinda obughanyiri bw’Omukama wethu Yesu Kristo kuthya n’engebe y’erikotha. 22 Kandi mulhole embere erikangania abakathika-thika b’obughanyiri; 23 mubalhamaye omw’ibabakulha omwa muliro. Aliwe mulhole embere erikangania abandi b’obughanyiri, erikolha ekyo omwubaha, imunemupona nibya n’olhukimba olhwabirithunda-thundibwa n’omubiri.
24 Neryo oko yukathoka eribatheya okw’ithwikalha n’erilhangira athi mukabya imunimene butsira kahinira embere sy’olhukengerwa* lhwiwe omwa butseme bunene, 25 oku Nyamuhanga mughuma Omulhamya wethu erilhabira omu Yesu Kristo Omukama wethu, ahebawe olhukengerwa, obukulhu, amaaka, n’ehamuli eritsuka okwa mighulhu ya kera na lino kandi kera na kera. Amina.