Ebaruha y’Erimbere Okwa Banya Korinto
12 Neryo balikyethu, erikwamana n’ebihembo by’obunyakirimu, singanzire mukabya buthaminya. 2 Munasi ngoku omughulhu mwabya b’ebihanda,* mwabya mukathebibwa n’erithwalhwa eyiri esyosanamu esithebugha, erighenda ehosi-hosi eyo syanga balholerya. 3 Neryo nganza muminye ngoku sihali n’omughuma omughulhu akabugha omwa mulimu wa Nyamuhanga, oyuwanga bugha athi: “Yesu athakirawe!” kandi sihali n’oyuwanga bugha athi: “Yesu ni Mukama!” athalya bughisibawa n’omulimu abuyirire.
4 Neryo hali ebihembo muthina-muthina, aliwe hali omulimu mughuma; 5 kandi hali obuherezya muthina-muthina, aliwe hali Omukama mughuma; 6 kandi hali emibiiri* muthina-muthina, aliwe Nyamuhanga iyan’oyo oyukakolhayo eyosi omwa buli mundu. 7 Aliwe eriyiminyikalya ly’omulimu likahebawa obuli mughuma busana n’ekighendererwa ky’erighasirwa. 8 Kundi omughuma akahebawa ebinywe* by’amenge erilhabira omwa mulimu, owundi ebinywe by’eriminya erikwamana n’omulimu iwan’oyo, 9 owundi erikirirya erilhabira omwa mulimu iwan’oyo, n’owundi ebihembo by’erilhamya erilhabira omwa mulimu mughuma oyo, 10 n’okwa wundi erikolha eby’amaaka, n’owundi eriminyerera, n’owundi eriyitheghererya ebinywe ebikasondolibawa n’omulimu, n’owundi esyondimi muthina-muthina, n’owundi erihindulha esyondimi. 11 Aliwe ebyosi ebi bikakolhawa erilhabira omwa mulimu iwan’oyo, erighabira obuli mundu erikwamana n’erisonda lyagho.
12 Ngoku omubiri ane mughuma aliwe iniawithe bitsuku bingyi, n’ebitsuku byosi by’omubiri oyo nomubine bingyi, ni mubiri mughuma, na Kristo kw’ane athya. 13 Kundi erilhabira omwa mulimu mughuma ithwe bosi muthwabatizibwa mwa mubiri mughuma, mbulha ni Bayuda kutse Bagiriki, mbulha ni bakobe kutse abali bwiranda, kandi ithwe bosi muthwanywisibwa omulimu mughuma.
14 Kundi kwenene, omubiri si kitsuku kighuma aliwe ni bingyi. 15 Ekisandu kyamabugha kithi, “Kundi sindi byalha, sindi kitsuku ky’okwa mubiri,” ekyo sikirileka kikathendibya kitsuku ky’okwa mubiri. 16 Kandi okuthwe kwamabugha kuthi, “Sindi liso, sindi kitsuku ky’okwa mubiri,” ekyo sikirileka kukathendibya kitsuku ky’okwa mubiri. 17 Omubiri wosi kwabya liso, amaaka w’eriowa angabere hayi? Omubiri wosi kwabya ini maaka w’eriowa, amaaka w’eribeherwa angabere hayi? 18 Aliwe Nyamuhanga abirithonda obuli kitsuku ky’okwa mubiri ngoku ayisunza.
19 Ebyosi ku byabya kitsuku kighumerere, omubiri angabere hayi? 20 Nomwabine bitsuku bingyi, aliwe ni mubiri mughuma. 21 Eriso siryangabwira ebyalha lithi, “Sindi kuyithagha,” kutse kandi, omuthwe syangabwira ebisandu athi, “Sindi kuyithagha.” 22 Okwa lhundi lhuhandi, ebitsuku by’omubiri ebikabya nga bitsekire bikayithaghisibawa, 23 kandi ebitsuku by’omubiri ebya thukalengekanaya thuthi ni by’ekitsumbi kike bya thukaha ekitsumbi, neryo ebitsuku byethu ebighayirwe by’ebikasikibawa, 24 aliwe ebitsuku byethu ebyuwene sibiriyithaghaki. Nomwabine, Nyamuhanga abiritheghekania omubiri omwa mibere eyikaleka ekitsuku ekighayirwe iky’ekyahebwa ekitsumbi kinene, 25 nuku sihabye erighabulhana omwa mubiri, aliwe ebitsuku byagho bitsomanangane. 26 Ekitsuku kighuma kyamaghalhwa, ebindi bitsuku byosi bikaghalhawa haghuma nakyo; kutse ekitsuku kighuma kyamahebwa olhukengerwa, ebindi bitsuku ebyosi bikatsema haghuma nakyo.
27 Lino muli mubiri wa Kristo, n’obuli mughuma w’okw’inywe ni kitsuku. 28 Kandi Nyamuhanga abirihira omwa kithunga mwa bino: eky’erimbere, abakwenda; ekyakabiri, abaminyereri; ekyakasathu, abakangirirya; n’eby’eriswekya; n’ebihembo by’erilhamya; emibiiri y’eriwathikya; amaaka w’erisondolha; esyondimi muthina-muthina. 29 Abosi si bakwenda, kwa bithe? Abosi si baminyereri, kwa bithe? Abosi si bakangirirya, kwa bithe? Abosi sibali kolha eby’eriswekya, kwa bithe? 30 Abosi sibawithe ebihembo by’erilhamya, kwa bithe? Abosi sibali kanaya omwa syondimi, kwa bithe? Abosi si bahinduli, kwa bithe? 31 Aliwe mulhole embere erilhandamirira* ebihembo eby’amaaka. Nomwabine, ngendi bakangania enzira eyilengire.