Okwa Banya Roma
13 Obuli mundu aghondere ab’obuthoki, kundi sihali obuthoki obuliho kithe busana na Nyamuhanga; obuthoki obuliho, buli n’ehamuli y’olhulengo lhulebe busana na Nyamuhanga. 2 Busana n’ekyo, owosi-wosi oyukahakanisaya obuthoki akabya iniamahakanisya emitheghekere ya Nyamuhanga; ababirihakanisya obuthoki bakendi syayilethera olhubanza. 3 Kundi abathabali aba ni kindu ky’eryubahya, butsira busana n’erikolha ebyuwene aliwe busana n’erikolha ebithuwene. Wunanzire eribya bwiranda okw’ubaha ab’obuthoki? Lholha embere erikolha ebibuya, nabo ibakendi kupipa; 4 kundi bakakolera Nyamuhanga nuku wughasirawe. Aliwe wamabya iwunemukolha ebithuwene, wubye n’eryubaha, kundi sibalihekera omuyali wa buyira. Bakakolera Nyamuhanga, erithuhulya bakakangania erihithana* oko yukabera erikolha ebithuwene.
5 Neryo kwesi hali enzumwa mbuya eyangaleka imwabaghondera, isi busana n’erihithana eryo lisa, aliwe na busana n’obunyamuthima-thima bwenyu. 6 Eki ky’ekikaleka imwathuha n’emisolho; kundi ni baghombe ba Nyamuhanga abakakolera abandu mughulhu wosi busana n’ekighendererwa eki. 7 Muhe abosi ebibatholere: oko yukasaba omusolho, omusolho; oko yukasaba engemu, engemu; oko oyukasaba eryubahwa, eryubaha ng’eryo; oko yukasaba erisikibwa, erisikibwa ng’eryo.
8 Simubye mw’eribanza ly’omundu wosi-wosi aliwe mubye mw’eribanza ly’erianzana; kundi oyukanza mulikyabo abiriberererya omughambo. 9 Kundi emighambo eyikabugha yithi, “Siwutholere wukasingira, siwutholere wuk’itha, siwutholere wuk’iba, siwutholere wukayighomba,” n’ebindi bihano ebiriho, biboherwe haghuma bithi: “Wutholere iwanza omuliranwa wawu ngoku wuyanzire.” 10 Olhwanzo silhuli kolera omuliranwa y’ekibi; busana n’ekyo, olhwanzo lhukaberereraya emighambo.
11 Kandi mukole eki kundi munasi omughulhu, ngoku esaha yabirihika inywe erilhua omwa thulho, kundi lino omulhamu wethu abiriseghera hakuhi-kuhi kwilhaba omughulhu thw’ikiriraya. 12 Obuthuku bukayakya; omusibo akayatsuka. Busana n’ekyo, thuyilhusayeko ebikorwa by’omwirima kandi thwambale ebirwanisyo by’ekyakakalha. 13 Thulendere ithunayithondekenie ng’omughulhu bukere, butsira omw’iyitsemesya ly’ebyughungu* n’erithamira, butsira omwa by’obusingiri n’emibere y’obukamya meso,* butsira omwa malhwa n’erihali. 14 Aliwe mwambale Omukama Yesu Kristo, kandi isimwabya mukasangwa mwatheghekera esyongumbu sy’omubiri.