Ebaruha Okwa Baebrania
1 Kera Nyamuhanga iniakakanaya n’abathatha-kulhu wethu erilhabira omwa baminyereri mirundi mingyi n’omwa nzira nyingyi. 2 Neryo okw’ihwererera ly’ebiro bino, abirikania nethu erilhabira omo Mughalha, oyo abirisombolha eribya muwetwa w’ebindu byosi, kandi oyo erilhabira omw’iyo mwahiraho emighulhu. 3 Iyo ni kisosekanio ky’olhukengerwa lhwa Nyamuhanga kandi yuk’imanira ndeke-ndeke ekyo Nyamuhanga ali, kandi akaleka emyatsi yosi iyabyaho erilhabira omwa kinywe ky’amaaka wiwe. Kandi abere abirithwerya kw’ebibi byethu, mw’ikalha okwa byalha by’amali by’ow’Amaaka ow’Endatha. 4 Neryo abiribya oyulengire abamalaika kundi abirisighalya erina erilengire kutsibu awabo.
5 Ng’eky’erileberyako, ni wahi okwa bamalaika oyo Nyamuhanga abirithabwira athi: “Wuli mughalha waghe; munabwire namabiribya thatha wawu”? Kandi athi: “Ngendibya thatha wiwe, nayu akendibya mughalha waghe”? 6 Aliwe omughulhu akathasyaletha Akambere kiwe omwa kihugho, akabugha athi: “Kandi abamalaika abosi ba Nyamuhanga bamunamire.”
7 Kandi akakanaya okwa bamalaika athi: “Akayira abamalaika biwe mwa birimu, n’abaherezya* biwe mwa kirimi ky’omuliro.” 8 Aliwe oko Mughalha, akabugha athi: “Nyamuhanga ni kithumbi kyawu ky’obwami kera na kera, n’omutso w’Obwami bwawu ni mutso w’obulingirirania. 9 Muwanza erithunganene kandi muwapona obubi. Ky’ekyaleka Nyamuhanga, Nyamuhanga wawu, iniakuhakabya amaghutha w’obutseme kwilhaba balikyenyu.” 10 N’ekindi: “Okw’itsuka, iwe Mukama, muwahiraho emisingyi y’ekihugho, n’ekyanya ni mibiiri y’ebyalha byawu. 11 Bikendi syahwaho, aliwe iwe wukendi syasighalhaho; kandi ng’olhukimba, ebyosi bikendi syakulha, 12 kandi wukendi syabiringa ng’erikoti, ng’olhukimba, kandi bikendi syahindulhwa. Aliwe iwe siwuli hinduka, n’emyaka yawu siyendi syayira muhindo.”
13 Aliwe ni wahi okwa bamalaika oyo abirithabwira athi: “Ikalha okwa lhuhandi lhwaghe lhw’amali erihika aho nasyahira esyonzighu syawu mwa kithumbi ky’ebisando byawu”? 14 Mbwino abosi si birimu by’omubiiri owabuyirire,* ebikathumawa eriyaherezya abakayasighalhaya omulhamu?