Ebaruha Okwa Baebrania
9 Iyo okwa lyayu, endaghane ya kera yabya iyiwithe ebilhaghiro eby’erighenderako erikolha omubiiri owabuyirire n’omwanya wagho owabuyirire okwa kihugho. 2 Kundi ekisenge ky’erimbere eky’ehema mukyahimbwa, ekyabya kikabya mw’omuthaghalha w’etara n’emeza n’emiggati y’erikangania, kandi kikahulhawamo Ahabuyirire. 3 Aliwe enyuma sy’ekisukuliryo ekyakabiri yabya ekisenge ky’ehema ekikahulhawamo Ahabuyirire Kutsibu. 4 Omo mwabya olhutheho lhw’ehoro olhw’erihisiryako obukwa n’erisanduko ly’endaghane eryosi iribambireko ehoro, eryabyamo akanagha k’ehoro akalimo emana n’omutso wa Haruni owasako ebimole n’ebisayi by’endaghane; 5 n’endatha kulyo kwabya amakerubi w’olhukengerwa awaswikire ekikuningiro* ky’erighonga-ghonga. Aliwe lino si buthuku bw’erikania okwa myatsi eyi omwa buuli.
6 Ebindu ebi byabere byabiritheghekwa bithya, abahereri ibak’ingira omwa kisenge ky’erimbere eky’ehema mughulhu wosi eriyakolha emibiiri eyibuyirire; 7 aliwe omuhereri mukulhu iniak’ingira iyuwene omwa kisenge kyakabiri murundi mughuma omo mwaka, isyaliyamo butsira musasi, ogho akahayo busana nayu iyuwene-wene na busana n’ebibi by’abandu ebyo bakakolha omwa buthaminya. 8 Neryo omulimu abuyirire akakikanganaya ndeke-ndeke ngoku enzira y’eringira ahabuyirire yabya isiyiriyabisulhwa omughulhu ehema y’erimbere yabya iyikineho. 9 Ehema eyi ni ky’erileberyako eky’omughulhu ono, kandi erikwamana n’emitheghekere eyi, ebihembo n’ebihongo bikahebawayo. Aliwe ebi sibirihikanaya obunyamuthima-thima bw’omundu oyukakolha omubiiri owabuyirire. 10 Ibihambire okwa byalya n’okwa by’erinywa n’okwa mirwa muthina-muthina ey’eryoya* bisa. Ini mitheghekere eyabya yikayithaghisibwa omwa mighambo busana n’omubiri kandi muyaghenderwako erihika okwa buthuku obwahirawaho erilhungulha emyatsi.
11 Aliwe, Kristo abere asa ng’omuhereri mukulhu w’emyatsi eyuwene eyabya iyabiribya, mwalhaba omwa hema eyilengireyo kandi eyihikene kutsibu eyithahimbawa omwa byalha by’abandu, ni bugha ambu, eyithe y’erihangika eri. 12 Mwingira ahabuyirire, isyali n’omusasi w’esyombene n’ow’esyonume ndere-ndere, aliwe iniane n’omusasi wiwe-wiwe, ngendo nguma nyisa isikyendi syathasyabya, kandi mwathubanira omulhamu* wa kera na kera. 13 Kundi ibbwa omusasi w’esyombene n’ow’esyonume n’eribu ly’erusi* eryabya likatsatsangwa okwa babiritsandibwa byamabya ibikabuyiriraya busana n’eryerya omubiri, 14 neryo ikikendibya bungahi okwa musasi wa Kristo, oyo erilhabira omwa mulimu wa kera na kera mwayihonga oku Nyamuhanga isyali kw’akahinira, eryerya obunyamuthima-thima bwethu okwa mibiiri eyiholire nuku thwanga kolera Nyamuhanga oyuliho y’omubiiri owabuyirire?
15 Ky’ekikaleka iniabya ini musangania w’endaghane nyihya-nyihya, nuku ababiribirikirwa bangahebwa omulhaghe w’omwandu wa kera na kera, kundi olhuholho mulhwabya busana n’eriboholhwa lyabu okwa bibi byabo ebiri ahisi sy’endaghane yakera erilhabira omwa ndongolya. 16 Kundi ahali endaghane, olhuholho lhw’omundu w’omubiri lhw’oyulyakolhayo lhutholere ilhwahamibwako, 17 kundi endaghane yikakolha omubiiri wayo erilhabira omwa lhuholho, kundi si yangakolha, omundu w’omubiri oyulyakolhayo iniakineho. 18 Busana n’ekyo, n’endaghane eya kera muyithakolha* ahathe omusasi. 19 Kundi omughulhu Musa abwira abandu abosi b’obuli kihano ky’Emighambo, mw’imya omusasi w’esyonume ndere-ndere n’ow’esyombene, haghuma n’amaghetse, n’epamba y’olhusasi-sasi, n’ehisopu, amabitsatsanga okwa kitabu* n’okwa bandu bosi, 20 athi: “Oyu w’omusasi w’endaghane eyo Nyamuhanga abiribalhaghira athi mughendereko.’ 21 Kuthya, mwatsatsanga omusasi okwa hema n’okwa bindu byosi by’omubiiri owabuyirire.* 22 Ee, erikwamana n’Emighambo hakuhi ebindu byosi bikeribawa omwa musasi, kandi omusasi amathendyuthibwa erighanyirwa siryangabyaho.
23 Busana n’ekyo, kyabya kitholere ebisosekanio by’ebindu by’elhubulha iby’eribwa omwa mibere eyi, aliwe ebindu by’elhubulha bikayithagha ebihongo ebilengire aho. 24 Kundi Kristo mwath’ingira ahabuyirire ahakolhawa omwa byalha by’abandu, ahali ky’erileberyako ky’eby’ekwenene, aliwe mwingira omwa lhubulha, nuku abanike embere* sya Nyamuhanga busana nethu. 25 Eki mukithakolhwa nuku ayihonge mirundi mingyi, ng’omughulhu omuhereri mukulhu ak’ingira ahabuyirire obuli mwaka n’omusasi owathe wiwe. 26 Ku kyabya kithya, angabere w’eriaghalhwa mirundi mingyi eritsuka okw’ihangikwa ly’ekihugho. Aliwe lino abiriyiminyikalya ngendo nguma nyisa isikyendi syathasyabya okw’ihwererera ly’emighulhu nuku aghunzeho ekibi erilhabira omw’iyo ng’ekihongo. 27 Kandi ngoku abandu babikirwe ini b’eriholha ngendo nguma nyisa isikyendi syathasyabya, aliwe enyuma waho ibatswerwa, 28 kuthya na Kristo mwahongwa ngendo nguma nyisa isikyendi syathasyabya nuku aheke ebibi by’abangyi; kandi akendi syabya akabanika engendo yakabiri sikyendi syabya busana n’ekibi,* kandi abakamusondekanaya n’omuhwa busana n’omulhamu wabo babakendi syamulhangira.