Ebaruha Okwa Banya Kolosai
2 Kundi nganzire imwaminya ngoku ni kaghalha kanene ako ngahiraho busana nenyu kandi busana n’abali e Laodikia kandi busana n’abosi abathe banyilholhako busu okwa busu.* 2 Eki kiri kithya nuku emithima yabo yanga humulikanibwa kandi banga yiyunga haghuma omo lhwanzo kandi banga bana obugaga bwosi obukalhua omw’ikakasya ndeke ebyo babiriyitheghererya, nuku banga bana eriminya erihikire ery’embitha yibuyirire ya Nyamuhanga, ni bugha ambu, Kristo. 3 Eby’obughuli ebibisirwe ndeke omw’iyo w’amenge n’eriminya. 4 Ngabugha eki nuku sihabye oyukabathebaya omwa binywe by’ekisehya. 5 Nomungathe nenyu omwa mubiri, ngane nenyu omwa mulimu, ngatsema ingalhangira ngoku munayithondekenie ndeke n’erisika omw’ikirirya lyenyu omu Kristo.
6 Busana n’ekyo, ngoku mwabiriligha Kristo Yesu Omukama, mulhole embere erilendera omw’imathikana nayu, 7 erihanda emirihi n’erihimbwa omw’iyo n’erisika omw’ikirirya, ngoku mwakangiriribawa, n’eryusulhamo erisima.
8 Muyitheghaye nuku sihabye oyukabayira mwa banyewa* omwa menge w’abandu n’omwa mathebo buyira erikwamana n’emirwa y’abandu, erikwamana n’emyatsi y’ekihugho ey’omusingyi butsira erikwamana na Kristo; 9 kundi erihikana lyosi ly’obunyamuhanga n’iyo likeremo omwa mubiri. 10 Neryo mwabiribana erilhughirirana ly’ebyosi erilhabira omw’iyo, oyuli muthwe w’amathabali wosi n’ehamuli. 11 Erilhabira omwa bughuma obwa muwithe nayu, kandi mumwabanibwa omw’ibanibwa eryakolhawa ahathe erikolesya ebyalha, omw’ibathuthulhako omubiri, erilhabira omw’ibanibwa erya Kristo. 12 Kundi mumwatsikwa nayu omw’ibatizibwa liwe, kandi erilhabira omwa bughuma obwa muwithe nayu mumwalhubukibwa haghuma nayu erilhabira omw’ikirirya erya muwithe omwa by’amaaka bya Nyamuhanga, oyuwamulhubukaya okwa baholi.
13 Eryongera okw’ekyo, nomwakine indi mwabya muholire omwa bibi byenyu n’omw’ithendi banibwa lyenyu ly’omubiri, Nyamuhanga mwaleka imwabyaho haghuma nayu. Omwa lhukeri mwathughanyira ebibi byethu byosi 14 n’erisangulhaho ekisakango ekyabya kihandikire omwa byalha ekyabyamo ebilhaghiro kandi ekyabya kikathuhandikirira. Abirilhusyakyoho omw’ikikongomerera okwa muthi w’obwaghali.* 15 Abirighendya ndumbu amathabali n’ab’ehamuli n’eribakangania ng’ababirikindwa, eribasondolha omw’ilhondekana ly’erisingura erilhabira mugho.*
16 Busana n’eki, isimwalighira mundu wosi-wosi akabatswera busana n’ebyamukalya n’erinywa kutse busana n’erisikya omukonga kutse okwezi kuhyaka kutse esabato. 17 Emyatsi eyo ni kitsutsu ky’ebikendi syasa, aliwe okwenene ni kwa Kristo. 18 Sihabye mundu oyukabalemesaya eribana olhuhembo, oyukatsemera eriyikehya ly’amabehi n’omulingo w’eriramya ery’abamalaika, “erighumya emimanire yiwe okwa”* myatsi eyo abirilhangira. Erithwalira haghuma, akayiheka isihali enzumwa eyitholere busana n’obulengekania bwiwe bw’ekinyamubiri, 19 kandi syali makirira ndeke omuthwe, eryamakirira oyo erilhabira omw’iyo omubiri wosi akabana ebyo akayithagha n’eritsutsikanibwa haghuma erilhabira omwa syonungu syagho n’emisisa n’erileka iniakulha omw’ikulha erikalhua oku Nyamuhanga.
20 Mwamabya imumwaholha na Kristo erikwamana n’emyatsi y’ekihugho ey’omusingyi, busana naki imwabya omwa ngebe ey’eribya nga mukine b’ekihugho omw’ilholha embere erighondera ebilhaghiro, bithi: 21 “Isiwimaya, kutse erirozya, kutse erithulhako,” 22 erimanyisya ebyosi ebikahwaho bikakolesibwa, erikwamana n’ebihano n’esyongangirirya sy’abandu? 23 Nomwakine indi emyatsi eyo yikalhangirika ng’ey’amenge omwa mulingo w’eriramya ery’eriyihiriraho n’omw’iyikehya ly’amabehi, eriaghalya omubiri, siyiwithe mughaso omw’irwanisya eky’eryughuthya esyongumbu sy’omubiri.