Emibiiri y’Abakwenda
17 Neryo mubalhaba e Amfipoli ne Apolonia bamahika e Tesalonika eyabya esinagogi y’Abayuda. 2 Neryo ngoku Paulo anabya abeghere erikolha, mw’ingira eyo bali, kandi mwaghunza esyosabato isathu inianemughanirya nabo okwa Masako, 3 akabasoborera n’eribakakasya omw’ikolesya amasako ngoku Kristo aby’atholere iniaghalhwa n’erilhubuka okwa baholi, athi: “Oyu ni Kristo, Yesu oyu yo ngababwirako.” 4 Busana n’ekyo, abaghuma b’okw’ibo mub’ikirirya kandi mubayiyunga oku Paulo na Sila, kuthya n’Abagiriki bangyi ababya bakaramya Nyamuhanga, haghuma n’abakali nga b’abo ab’ebitsumbi.
5 Aliwe Abayuda ibabirihithana, mubasorokya abalhume babi ababya bakaghanga-ghanga omwa kathali neryo bamakolha ekingungu kandi bamaleka etawuni iyabyamo akasasamaro. Mubathahirira enyumba ya Yasoni bakasondya Paulo na Sila nuku babahulhukiraye ekingungu. 6 Babere babiribabulha, mubakurira Yasoni n’abaghuma b’okwa balikyethu b’eyiri abathabali b’etawuni, ibanemubugha omwa mulenge munene bathi: “Abalhume aba ababirihindulha* ekihugho babirihika n’eno, 7 na Yasoni abirib’angirira ng’abagheni biwe. Abalhume bosi aba bakahakanisaya ebilhaghiro bya Kaisari, omw’ibugha bathi hali owundi mwami, Yesu.” 8 Babere babiryowa emyatsi eyi, abandu bangyi n’abathabali b’etawuni mububaha; 9 neryo Yasoni n’abandi babere babiriliha esyosente esyayithaghisibawa, mubabalighira erighenda.
10 Aho naho omwa kiro, balikyethu mubabugha bathi Paulo na Sila baghende e Beroya. Babere bahikayo, mub’ingira omwa sinagogi y’Abayuda. 11 Neryo aba ibakahulikirira ndeke kwilhaba ababya e Tesalonika, kundi mubaligha ekinywe n’omuhwa munene kutsibu, ibakalebaya ndeke Amasako obuli kiro erilebya emyatsi eyi nga nina kwenene. 12 Busana n’ekyo, abangyi b’okw’ibo mub’ikirirya, haghuma n’abakali ng’ab’abo kuthya n’abalhume balebe Abagiriki abasikibirwe. 13 Aliwe Abayuda erilhua e Tesalonika babere baminya ngoku Paulo anemuthulhughania ne Beroya y’ekinywe kya Nyamuhanga, mubasayo erisyahongererya abandu. 14 Neryo aho naho balikyethu mubathwalha Paulo y’okwa ngetse, aliwe Sila na Timoteo mubasighalha. 15 Abatsindika Paulo mubamuhikya e Atene, kandi mubasubayo babirihebwa obusondoli ngoku Sila na Timoteo batholere ibahika oku Paulo kwa lhuba.
16 Neryo Paulo abere anabalindire e Atene, mwayiponera kutsibu akalhangira ngoku etawuni y’oswire mw’esyosanamu. 17 Neryo mwatsuka erighanirya n’Abayuda omwa sinagogi n’abandi ababya bakaramya Nyamuhanga kandi obuli kiro iniakaghaniraya n’abo abya ak’eya omwa kathali. 18 Aliwe abaghuma b’okwa Abaepikurio n’Abastoiko abafilosofa mubatsuka erikakalhukana nayu, n’abandi babya bakabugha bathi: “Oyukahubikirira oyu akanza eribugha athiki?” Abandi bathi: “Akabya ng’akathulhughanaya omwatsi owahambire okwa syonyamuhanga esy’ehandi.” Eki kyabya kundi aby’akathulhughania engulhu yuwene eyihambire oku Yesu n’okw’ilhubuka. 19 Neryo mubamuhamba n’erimuthwalha omwa Areopago, n’eribugha bathi: “Mbwino thwangana minya engangirirya embyaka eyi eyawukakanayako nga yihambire okuki? 20 Kundi wukakanaya okwa myatsi eyathuthethwathowako, neryo thwanzire ithwaminya emyatsi eyi nga yikamanyisayaki.” 21 Omo kwenene, abanya Atene abosi n’ababunga abikereyo ibakakolesaya endambi yabu y’erilhuhukiramo erikania kutse erihulikirira emyatsi mihyaka. 22 Neryo Paulo mwimana omwa kathi-kathi ke Arepago n’eribugha athi:
“Balhume be Atene, ngalhangira ngoku omo myatsi yosi mukabya nga mukubaha kutsibu esyonyamuhanga* kwilhaba abandi. 23 Ng’eky’erileberyako, mungabya inganemulhaba n’erilebya ndeke ebya mukaramaya, mungalhangira ekiherero ekisakireko kithi ‘Oko Nyamuhanga oyuthasibwe.’ Busana n’ekyo, oyo mukaramaya isimumwasi, oyo yanga babwirako. 24 Nyamuhanga oyuwahangika ekihugho n’ebyosi ebirimo, iyo ngoku ane, Omukama w’olhubulha n’ekihugho, syal’ikalha omwa syohekalhu esikahimbawa n’abandu; 25 kutse erikolerwa omwa byalha by’abandu eribya ng’akayithagha kindu kyosi-kyosi, kundi iyo iyuwene-wene akaha abandu abosi b’engebe n’omuka n’ebindu ebyosi. 26 Kandi erilhabira omwa mundu mughuma, mwahangika obuli kihanda ky’abandu erikalha okwa kihugho kyosi, kandi mwahiraho emighulhu n’emithano aho abandu bang’ikalha, 27 nuku banga sondekania Nyamuhanga, bamamumatha-matha kwenene ibakendi mubana, kundi kwenene, syali haali okwa buli mughuma w’okw’ithwe. 28 Kundi erilhabira omw’iyo thuwithe engebe, thukaghenda, n’eribyaho, nibya ngoku abaghuma b’okwa bahandiki benyu babugha bathi, ‘Kundi nethu thuli baana* biwe.’
29 “Neryo kundi thuli baana* ba Nyamuhanga, isithwalengekanaya thuthi Nyamuhanga ali ng’ehoro kutse efeza kutse eribwe, ng’ekindu ekyo abandu bakokothaya n’erikolha. 30 Ni kwenene, Nyamuhanga abirikyurukya ameso emighulhu y’obuthaminya ng’eyo; aliwe lino anemubwira abandu bosi ehosi athi batholere ibayisubamu. 31 Kundi abirihiraho ekiro eky’erisyatswereramo ekihugho kyosi omwa lithunganene erilhabira omwa mulhume oyo abirisombolha, kandi abirikakasya abandu bosi b’eki omw’imulhubukya okwa baholi.”
32 Neryo babere bowa omwatsi w’erilhubuka okwa baholi, abandi mubatsuka eriseka lhukukunia, n’abandi bathi: “Emyatsi yawu eyo thukendi syahulikirirayo ekindi kiro.” 33 Neryo Paulo mwalhua aho bali, 34 aliwe abandi balhume mubamuyiyungako neryo bam’ikirirya. Abaghuma b’okw’ibo abya ini Dionisio omutsweri w’ekoti ye Areopago n’omukali oyukahulhawamo Damaria, n’abandi.