Okwa Banya Roma
8 Busana n’ekyo, abamathikene na Kristo Yesu sibaliko lhubanza. 2 Kundi omughambo w’omulimu owakaha engebe omw’imathikana na Kristo Yesu abiribayira bwiranda oko mughambo w’ekibi n’ow’olhuholho. 3 Ebya Emighambo yathathoka erikolha kundi yabya yitsekire erilhabira omwa mubiri, Nyamuhanga mwabikolha omw’ithuma Mughalha wiwe omw’isosa ly’omubiri w’ekibi kandi erikwamana n’ekibi, eritswera ekibi ekiri omwa mubiri, 4 nuku ebikayithaghisibawa omwa Mighambo ebithunganene byanga bererera omw’ithwe abakalendera, butsira erikwamana n’omubiri, aliwe erikwamana n’omulimu. 5 Kundi abakabyaho erikwamana n’omubiri bakahira obulengekania bwabo oko myatsi y’omubiri, aliwe abakabyaho erikwamana n’omulimu bakahirabo oko myatsi y’omulimu. 6 Kundi erihira obulengekania okwa mubiri mukalhua olhuholho, aliwe erihira obulengekania okwa mulimu mukalhua engebe n’obuholho; 7 kundi erihira obulengekania okwa omubiri ni buyighu oku Nyamuhanga, kundi omubiri syalighondera emighambo ya Nyamuhanga, kandi kwenene ekyo sikyangabya. 8 Neryo abakaghondera omubiri sibanga tsemesya Nyamuhanga.
9 Nomwabine, muli bughuma, butsira n’omubiri, aliwe n’omulimu, omulimu wa Nyamuhanga kwenene amabya in’ikere omw’inywe. Aliwe omundu wosi-wosi amabya isyawithe omulimu wa Kristo, omundu oyo isi wiwe. 10 Aliwe Kristo amabya inianamathikene nenyu, omubiri aholire busana n’ekibi, aliwe omulimu ni ngebe busana n’erithunganene. 11 Neryo omulimu w’oyuwalhubukaya Yesu oko baholi amabya in’ikere omw’inywe, oyuwalhubukaya Kristo Yesu oko baholi, akendi syasubya n’emibiri yenyu eyikahonda erilhabira omwa mulimu wiwe ow’ikere omw’inywe.
12 Neryo balikyethu, thwabiriyilhagha erithendibyaho erikwamana n’omubiri; 13 kundi mwamabyaho erikwamana n’omubiri, imuli b’eriholha; aliwe mwamitha emikolere y’omubiri erilhabira omwa mulimu, imukendi syabyaho. 14 Kundi abosi abakasondolhawa n’omulimu wa Nyamuhanga kwenene ni baghalha ba Nyamuhanga. 15 Kundi mumuthahebwa omulimu w’obukobe owakaleka imwathasyubaha, aliwe mumwahebwa omulimu owakabayiramo baghalha, omulimu owakaleka ithwabirikira thuthi: “Abba,* Thatha!” 16 Omulimu iwuwene-wene akaha obwema haghuma n’ekirimu kyethu athi thuli baana ba Nyamuhanga. 17 Neryo thwamabya ithuli baana, obo kandi ithuli bawetwa—ee abawetwa ba Nyamuhanga, aliwe abawetwa haghuma na Kristo—mbwino ithunalyaghalhawa haghuma nayu nuku thwanga syahebwa haghuma nayu olhukengerwa.
18 Kundi nganasi ngoku eriaghalhwa eryathukabana lino ni like kutsibu lyamalinganisibwa n’olhukengerwa olhukayabisulhawa omw’ithwe. 19 Kundi ebihangikwa bilindirire kutsibu eribisulhwa ly’abaghalha ba Nyamuhanga. 20 Kundi ebihangikwa mubyahirwa omwa mibere y’eribya buyira, isi busana n’erisonda lyabyo, aliwe erilhabira omwa oyuwabihiramo, ihane amaha 21 nuku ebihangikwa ibyobyene-byene nabyo biyirawe bwiranda okwa bukobe bw’erihonda n’erithunga obwiranda bw’olhukengerwa olhw’abaana ba Nyamuhanga. 22 Kundi thunasi ngoku ebihangikwa byosi bikabya ibinemusimbira haghuma n’eribya omwa bulhumi haghuma erihika na lino. 23 Isi ky’ekyo kisa, aliwe nethu ithwibene-bene ithwe thuwithe ebighuma by’erimbere-mbere, ni bugha ambu, omulimu, ee, nethu ithwibene-bene thukasimba ithunemulinda kutsibu eriyirwa mwa baghalha, eriboholhwa okwa mibiri yethu erilhabira omwa ndongolya. 24 Kundi muthwalhamibwa omwa maha aya; aliwe amaha awakalhangirika si maha, kundi omundu amalhangira ekindu, mbwino akanathasyakithungira amaha? 25 Aliwe thwamabya n’amaha omwa kyathuthelhangira, thukalholha embere erikilindirira kutsibu omw’iyiyinia.
26 Omwa mibere iyan’eyo, omulimu nagho akasangira omw’ithuwathikya busana n’erilemererwa lyethu; kundi ekitsibu kiri kithi sithwasi ebya thutholere ithwasaba ngoku litholere, aliwe omulimu akathulemba-lembera Nyamuhanga omw’isimba ly’obuhunu-hunu.* 27 Aliwe oyukalebaya emithima anasi ekya omulimu akamanyisaya, kundi akalemba-lemba Nyamuhanga busana n’ababuyirire erikwamana n’erisonda lya Nyamuhanga.
28 Thunasi ngoku Nyamuhanga akaleka emibiiri yiwe yosi yikolongane omwa bughuma busana n’erighasira abanzire Nyamuhanga, abakabirikirawa erikwamana n’ekighendererwa kiwe; 29 kundi abo alengekanayako erimbere kandi abya iniabirisangwa abayisogha eribya omwa kisosekanio kya Mughalha wiwe, nuku angabya kambere omwa baghalha babo bangyi. 30 Kandi, abo asangwa ayisogha ban’abo abirikira; kandi abo abirikira ban’abo ahulhamo bathunganene. Erighunzerera, abo ahulhamo bathunganene ban’abo aha olhukengerwa.
31 Neryo thubughe thuthiki oko myatsi eyi? Nyamuhanga amabya iniane okwa lhuhandi lhwethu, nindi wangalhwa nethu? 32 Amabya imwathabalya Mughalha wiwe aliwe amamulhwikira ababi busana nethu ithwe bosi, mbwino omwa lhukeri, iyo haghuma na mughalha wiwe sibangathuha ebindi bindu byosi? 33 Nindi oyukendi hira okwa basombolhwa ba Nyamuhanga kw’olhubanza? Nyamuhanga y’Oyukabahulhamo bathunganene. 34 Nindi oyukendi batswera? Kristo Yesu y’oyuwaholha, ekikulhu kutsibu y’oyuwalhubukibawa, oyuli okwa byalha by’amali bya Nyamuhanga kandi oyukathulemba-lembera Nyamuhanga.
35 Nindi oyukendi thughabulha oko lhwanzo lhwa Kristo? Mbwino amalighe kutse eriaghalhwa kutse eriendereribwa kutse enzalha kutse eribulha eky’eriambalha kutse akabi kutse omuyali? 36 Ngoku kihandikire kithi: “Busana nenyu, obuli ndambi thukabana ebyangaleka ithwakwa; thwabirighanzwa ng’esyombuli sy’erikerwa.” 37 Mbaghane n’ekyo, omo myatsi yosi eyi thukakindira ighuma erilhabira omwa oyuwathwanza. 38 Kundi ngakakasirye ngoku mbulha ni lhuholho kutse engebe kutse abamalaika kutse amathabali kutse emyatsi eyiriho lino kutse eyikasa kutse eby’amaaka 39 kutse eby’endatha kutse eby’eyikwa kutse ekindi kihangikwa kyosi-kyosi si kyanga thoka erithughabulha oko lhwanzo lhwa Nyamuhanga olhuli omw’isi wa Kristo Yesu Omukama wethu.