Ebaruha y’Erimbere eya Petero
1 Petero, omukwenda wa Yesu Kristo, okwa bikalhani b’obuthuku buke abayitsatsangire e Ponto, e Galatia, e Kapodokia, e Asia, ne Bitinia, okwa basombolhwa 2 erikwamana n’amaaka wa Nyamuhanga Thatha aw’erisangwa aminya emyatsi isiyiri yabya, haghuma n’eriyirwa mwa babuyirire omwa mulimu, busana n’ekighendererwa ky’eribya bowa n’eritsatsangwako omusasi wa Yesu Kristo:
Ambi olhukogho n’obuholho ibyongera eribya nenyu.
3 Nyamuhanga kandi Thatha w’Omukama wethu Yesu Kristo apipawe, kundi erikwamana n’obughanyiri bwiwe bunene mwathuha eributhwa lihya-lihya thwamabya n’amaha awaliho erilhabira omw’ilhubuka lya Yesu Kristo okwa baholi, 4 n’omwandu owathehonda kandi owathatsandibawa kandi owathehinduka. Abikirwe elhubulha busana nenyu, 5 inywe mukatheghibawa omwa maaka wa Nyamuhanga erilhabira omw’ikirirya busana n’omulhamu owakayabisulhawa okw’ihwererera ly’emighulhu. 6 Busana n’eki munemutsema kutsibu, nomwakine indi ahabw’akathuku kake, kyamabya ikitholere, mwabiriaghalibwa omwa bitsibu muthina-muthina, 7 nuku erikirirya lyenyu eryabirilengesibwa, ery’obughuli bunene kwilhaba ehoro eyikahwaho nomwakine indi yabirilhabibwa omwa muliro, lyangaleka ihabya eripipa n’olhukengerwa n’erisikya okw’ibisulhwa lya Yesu Kristo. 8 Nomwakine indi mumuthamulholhako, mumwanzire. Nomwakine indi simuli mulholhako lino, mumw’ikirirye kandi munemutsema kutsibu omwa tseme eyithe yanga soborerwa kandi ey’olhukengerwa, 9 imunemubana ekilhubirirwa ky’erikirirya lyenyu, omulhamu wenyu.
10 Bikahika okwa mulhamu oyu, abaminyereri abalhaghulha ebihambire okwa lhukogho olhwa mwatheghekerawa mubabulirirya ndeke n’erisondekania ndeke. 11 Mubabera erisosothya nga ni buthuku bwahi obwonyine-nyine kutse nga ni mughulhu wahi ogho omulimu owabalimu akanganaya ebihambire oku Kristo ngoku omulimu asangawa iniabiriha obwema obuhambire okw’ighalhwa eryo Kristo angabwene n’okwa lhukengerwa olhwanga kwamireko. 12 Mukyabisulhwa okw’ibo ngoku babya bakaherezya, butsira ibo, aliwe inywe, omw’ibaha omwatsi ogho lino mwabirirangirwa erilhabira omo abababwira engulhu yuwene omwa buwathikya bw’omulimu abuyirire owathumawa erilhua elhubulha. Emyatsi iyan’eyo, abamalaika bakayisunza kutsibu eriminyayo ndeke.
13 Neryo muthegheke obulengekania bwenyu busana n’omubiiri; mutheghaye ndeke obulengekania bwenyu; muhire amaha okwa lhukogho olhwa mukendi syakanganibwa okw’ibisulhwa lya Yesu Kristo. 14 Ng’abaana abowa, mulekere aho erisondolibwa n’esyongumbu esyo mwabya nasyo omwa buthaminya bwenyu, 15 aliwe ng’Oyubuyirire oyuwababirikira, mubye babuyirire omwa mikolere yenyu yosi, 16 kundi kihandikire kithi: “Mutholere imwabya babuyirire kundi nga buyirire.”
17 Neryo mwamabya imukabirikira Thatha oyukatswera ahathe kasolholho erikwamana n’emikolere y’obuli mughuma, mubye n’emighendere y’eryubaha omwa buthuku bw’eribyaho lyenyu ng’abikalhani b’obuthuku buke. 18 Kundi munasi ngoku siby’ebindu ebikahonda, efeza kutse ehoro, indi by’ebyabayira bwiranda* oko ngebe yenyu eyithawithe mughaso eyo mwasighalhaya okwa bathatha-kulhu wenyu.* 19 Aliwe abya iw’omusasi w’obughuli, owali ng’ow’ekyana ky’embuli ekitheko bulema na kahinira, owa Kristo. 20 Ni kwenene, abya iniabirisangwa aminywa ekihugho kithe kyahangikwa, aliwe mwaminyikalibwa okw’ihwererera ly’emighulhu busana nenyu. 21 Erilhabira omw’iyo muli bikirirya omu Nyamuhanga, oyuwamulhubukaya okwa baholi n’erimuha olhukengerwa, nuku erikirirya lyenyu n’amaha byangabya omu Nyamuhanga.
22 Neryo kundi mwabiriyerya omwowa ekwenene ekyabirileka imwabya n’olhwanzo ng’olhw’abasubeneko olhuthemo mathebo, mwanzane kutsibu erilhua okwa muthima. 23 Kundi mwabirihebwa eributhwa lihya-lihya, butsira omw’ihonda, aliwe omwa mbutho* eyithehonda, erilhabira omwa kinywe kya Nyamuhanga oyuliho oyukayiyinaya. 24 “Emibiri yosi y’omusasi yiri* ng’ebithi, n’olhukengerwa lhwayo lhwosi lhuli ng’ebimole by’omoli; ebithi bikuma n’ebimole ibyalhaghalha, 25 aliwe ekinywe kya Yehova* kikabyaho kera na kera.” Kandi “ekinywe” eki y’engulhu yuwene eyo mwabwirawa.