Ebaruha y’Erimbere eya Petero
3 Omwa mibere iyan’eyo, inywe bakali bathahibwa, mughondere bira benyu, nuku hamabya abathyowa ekinywe, ibasingwa isibathabwirwa kinywe erilhabira omwa mibere mibuya y’abakali babu, 2 busana n’eriyilhangirira emibere yenyu eyihenirye haghuma n’erisikya linene. 3 Eriyipamba lyenyu siribye ly’eyihya—erilhuka esyonzwiri n’eriambalha eby’eriyipambamo eby’ehoro kutse esyongyimba esyuwene-wene— 4 aliwe libye ly’omundu w’embitha ow’omuthima ery’eriyipamba omwa bindu ebithehonda eby’omuthima w’obukuthu n’ow’obwolho, ekindu eky’obughuli bunene embere sya Nyamuhanga. 5 Kundi abakali ababuyirire abakera ababya bawithe amaha omu Nyamuhanga ku babya bakayipamba bathya, ibakaghondera bira babu, 6 ngoku Sara abya akowa Abrahamu, erimwahulhamo mukama. Kandi mwabiribya baana biwe, mwamalholha embere erikolha ebibuya n’erithendyubaha.
7 Inywe abiba, omwa mibere iyan’eyo, mulhole embere er’ikalha nabu omo menge.* Mubahe ekitsumbi kundi munasi ngoku bolhoberere ku balhaba ng’ekindu eky’eribumba, ni bugha ambu, abakali, kundi nabo ni bawetwa ab’engebe y’olhukogho haghuma nenyu, nuku emisabe yenyu siyikakiribawe.
8 Erighunzerera, inywe bosi mubye bughuma omwa bulengekania, mulhumiriranawe, mubye n’olhwanzo ng’olhw’abasubeneko, mukwire abandi b’obulighe, kandi muyikehaye. 9 Isimwathuhulhaya ekibi omwa kibi kutse eritsuma omw’itsuma. Omwakanya k’ekyo, mulihe omw’itsumulha, kundi mumwabirikirwa omwa nzira eyi, nuku mwanga sighalya omughisa.
10 Kundi “oyuwanzire eritsemera engebe n’eribana ebiro ebyuwene atholere iniatheya olhulimi lhwiwe okwa bibi n’eminywe yiwe okw’ibugha amabehi. 11 Alhue okwa kibi, akole ekibuya, asondaye obuholho n’eribukwamirira. 12 Kundi ameso wa Yehova* ali okwa bathunganene, n’amathwe wiwe akahulikirira emisabe yabu y’erilemba-lemba, aliwe obusu bwa Yehova* buponire abakakolha ebindu bibi.”
13 Kundi kwenene, nindi oyuwanga bakolha nabi mwamathunga omuhwa w’erikolha ebyuwene? 14 Aliwe nomumwangaghalhwa busana n’erithunganene, muli n’obutseme. Nomwabine simubahe ebyo bakubaha,* kutse erihangya-hangya. 15 Aliwe muyire Kristo mwa mubuyirire ng’Omukama omwa mithima yenyu, mughulhu wosi imunayitheghekire erilhwira okwa maha agho muwithe omundu wosi-wosi amababulya ekikaleka imwabya nagho, aliwe mukole ekyo omwa bwolho n’omw’isikya linene.
16 Mulhole embere eribya n’obunyamuthima-thima obuwene, nuku mwamakanibwako nabi omwa nzira yosi-yosi, abakabakanayako nabi ibahemuka busana n’emibere yenyu mibuya ng’abigha ba Kristo. 17 Kundi kyuwene inywe eriaghalhwa busana n’erikolha ebibuya, lyamabya in’isonda lya Nyamuhanga erikilighira, butsira busana n’inywe erikolha ebibi. 18 Kundi Kristo mwaholha busana n’ebibi ngendo nguma isikyendi syathasyabya, omundu omuthunganene busana n’abathathunganene, nuku abakolhaye oku Nyamuhanga. Mw’ithibwa omwa mubiri aliwe amahebwa engebe omwa kirimu. 19 Neryo iniane omwa mibere eyi, mwaghenda amayathulira ebirimu ebyabya omwa ngomo, 20 ebyaghana eriowa omughulhu Nyamuhanga alinda omw’ighumisirizya* omwa biro bya Noa, obwathu ibunemuhimbwa, omo abandu bake, ni bugha ambu, esyongebe* munani, batheghibawa okwa maghetse.
21 Olhubatizo, olhukasosekanibawa n’eki, nalho lhunemubalhamya lino (butsira omw’ilhusya okwa mubiri kw’oburofu, aliwe omw’isaba Nyamuhanga obunyamuthima-thima obuwene), erilhabira omw’ilhubuka lya Yesu Kristo. 22 Ane okwa byalha by’amali bya Nyamuhanga, kundi mwaghenda elhubulha, kandi abamalaika n’ab’ehamuli n’ab’amaaka mubahirwa ahisi siwe.