Ebaruha y’Erimbere eya Petero
2 Neryo muyilhusayeko obubi bwosi n’amabehi n’amathebo n’eritsuru n’olhuthongo olhwosi. 2 Ng’esyomekeke, mwanze kutsibu amathe awathadungire mwaki* aw’ekinywe, nuku erilhabira mukyo mwanga kulha erihika okwa mulhamu, 3 ekikulhu mwabiriyilhangirira ngoku Omukama ni w’olhukeri.
4 Omughulhu mukasa okw’iyo, eribwe eririho erya bandu baghana aliwe eryasombolhawa, ery’obughuli embere sya Nyamuhanga, 5 inywe inywibene-bene ng’amabwe awawithe engebe munemuhimbwa okwa nyumba y’obunyakirimu eribya buhereri obubuyirire, nuku mwangahayo ebihongo by’obunyakirimu ebyo Nyamuhanga akaligha erilhabira omu Yesu Kristo. 6 Kundi kikabughawa omo Masako kithi: “Lebaya! Ngasingika omwa Sioni mw’eribwe eryasombolhawa, eribwe ly’esonda ery’omusingyi w’obughuli, kandi sihali oyukalikiriraya oyukendi syalhabira ahisi.”*
7 Busana n’ekyo, okw’inywe, iyo ni w’obughuli, kundi muli bikirirya; aliwe okwa bathikirirye, “eribwe eryo abahimbi baghana, ly’eryabiribya libwe likulhu ly’esonda”* 8 kandi “libwe ly’erithwikalya n’olhukuka lhw’erihithania.” Bakathwikalha kundi sibalyowa ekinywe. Busana n’eki mubasombolhwa. 9 Aliwe muli “kithunga ky’abandu abasombwerwe, obuhereri bw’obwami, ekihanda ekibuyirire, ekithunga ky’abandu abali bindu by’embaghane bya Nyamuhanga, indi mutholere imwathulhughania obubuya bungyi” bw’Oyuwababirikira erilhua omwa mwirima eryasa omwa kyakakalha kiwe ekibuyanga. 10 Kundi si mwabya kithunga ky’abandu, aliwe lino muli bandu ba Nyamuhanga; mumuthakanganibwa obughanyiri, aliwe lino mwabirikanganibwa obughanyiri.
11 Abanzwa, ngabahabulha ng’ababunga kandi ng’abikalhani b’obuthuku buke indi mulhole embere eriyihighulha okwa syongumbu sy’omubiri, esikalhwa nenyu. 12 Mubye imune n’emibere mibuya omwa kathi-kathi k’ebihanda, nuku omughulhu bakabahandikirira bathi muli bakolha-nabi, ambi ibayilhangirira emibere yenyu mibuya, kandi busana n’ekyo, ibaha Nyamuhanga y’olhukengerwa okwa kiro kiwe ky’erilebya emyatsi.
13 Busana n’Omukama, mughondere ebihirirweho na bandu,* mbulha yo mwami ng’oyubalengire 14 kutse abagavana ng’abathumirwe nayu erisuyira abakolha-nabi aliwe eripipa abakakolha ebyuwene. 15 Kundi n’isonda lya Nyamuhanga indi omw’ikolha ebibuya imwangana hunia* ebinywe by’obukiru eby’abakiru. 16 Mubye ng’abandu b’obwiranda, erikolesya obwiranda bwenyu, butsira ng’ekiyihambulyo ky’erikolha ebibi, aliwe ng’abaghombe ba Nyamuhanga. 17 Musikaye abandu b’emisindo yosi, mwanze olhughanda lhwosi lhw’abalikyethu, mubahe Nyamuhanga, musikaye omwami.
18 Abaghombe baghondere abakama babu omw’ubaha lyosi eribatholere, butsira ababuya n’ab’obuyitheghererya basa aliwe n’abakalire eritsemesya. 19 Kundi kikuwana omundu amayiyinirya ebitsibu* n’eriaghalhwa isyaliko lhubanza busana n’obunyamuthima-thima bwiwe embere sya Nyamuhanga. 20 Kundi mukaghasirawa muthi mwamaswiribwa busana n’erihalya kandi imwayiyiniryalyo? Aliwe mwamayiyinia busana n’erikolha ebibuya, eki ni kindu ekyuwene embere sya Nyamuhanga.
21 Mumwabirikirwa erikwama enzira eyi, kundi nibya Kristo mwaghalhwa busana nenyu, amabasighira olhughobe olho mwanga kwama hakuhi-kuhi. 22 Mwathakolha kibi, kutse amathebo mwathabanika omwa buno bwiwe. 23 Iniakabya akatsumwa, isyalitsuma. Iniakabya akaghalhwa, isyalyubahisaya, aliwe mwayihira omwa byalha by’Oyukatswera omwa lithunganene. 24 Iyo iyuwene-wene mwaheka ebibi byethu omwa mubiri wiwe okwa muthi, nuku thwanga holha okwa bibi n’eribyaho okwa lithunganene. Kandi “erilhabira omwa bironda biwe mumwalhamibwa.” 25 Kundi mwabya ng’esyombuli esikayahera, aliwe lino mwabirisuba oko mulisya kandi omulebererya w’esyongebe syenyu.