Okwa Banya Roma
16 Nganza muminye* mwali wethu Foibe, omuherezya ow’ekithunga kye Kenguria, 2 nuku mwanga mwangirira omo Mukama omwa nzira eyitholere ababuyirire n’erimuha obuwathikya bwosi-bwosi obw’angayithagha, kundi nayu abirikangania kw’akalhwira okwa bangyi, naghe imwangane.
3 Munyiramukiraye Priska na Akwila, abo ngakolha nabo omu Kristo Yesu, 4 ababiritsama ebikya byabo busana naghe kandi ingye n’ebithunga byosi by’ebihanda thukabasima. 5 Kandi muramukaye ab’omwa kithunga ekiri omwa nyumba yabo. Muramukaye Epenetu omwanzwa, oyuli bighuma by’erimbere-mbere e Asia busana na Kristo. 6 Muramukaye Maria, oyuwabirikolha kutsibu busana nenyu. 7 Muramukaye Andronika na Yunia, abahughu baghe kandi abo thwabya nabo omwa ngomo, abalhume abo abakwenda basi ndeke kandi ababiribya bughuma na Kristo habw’obuthuku buuli kwilhaba ingye.
8 Munyiramukiraye Ambuliato, omwanzwa waghe omu Mukama. 9 Muramukaye Urbano, omukoli mulikyethu omu Kristo, na Staki omwanzwa waghe. 10 Muramukaye Apele, oyulighirwe omu Kristo. Muramukaye ab’omwa nyumba ya Aristabulo. 11 Muramukaye Herodio, omuhughu waghe. Muramukaye ab’omwa nyumba ya Narsise abali omu Mukama. 12 Muramukaye Tirifina na Tirifosa, abakali abanemukolha kutsibu omu Mukama. Muramukaye Persi, omwanzwa wethu, kundi abirikolha kutsibu omu Mukama. 13 Muramukaye Rufu, omusombolhwa omu Mukama, na mama wiwe kandi mama waghe. 14 Muramukaye Asingirito, Fulego, Herme, Patroba, Herma, n’abalikyethu abali nabo. 15 Muramukaye Filologo na Yulia, Nereo na mwali wabo, na Olimba, n’ababuyirire abosi abali nabo. 16 Muramukanaye omw’ilyatsirira eribuyirire. Ebithunga byosi bya Kristo byamabaramukya.
17 Lino balikyethu ngabalemba-lemba, indi muhire eriso okw’abo abakaletha erighabulhana n’ebikathwikalhaya ebiri mbaghane okw’ikangirirya eryo mw’igha kandi muyihighule kubo. 18 Kundi abandu ng’abo si baghombe b’Omukama wethu Kristo, aliwe ni baghombe b’esyongumbu* syabo kandi omwa binywe ebihehere kandi eby’ekisehya bakasona-sona emithima y’abathasiki. 19 Obwowa bwenyu bwabiriminyikalha okwa bosi, neryo ngatsema busana nenyu. Aliwe nganzire imwabya b’amenge bikahika okwa kibuya, aliwe ng’abathasiki bikahika okwa kibi. 20 Kundi oku Nyamuhanga oyukaha obuholho, hakisiya buthuku buke iniahinolera Sitani ahisi sy’ebisando byenyu. Ambi olhukogho lhw’Omukama wethu Yesu ilhwabya nenyu.
21 Timoteo oyo ngakolha nayu amabaramukya, kuthya na Lukio, Yasoni, Sosipatere, abahughu baghe.
22 Ingye Teretio, oyuwamahandika ebaruha eno, namabaramukya omu Mukama.
23 Gayo, oyulyanyikokaya n’ekithunga kyosi, bamabaramukya. Erasto, omubiki* w’etawuni, amabaramukya, kuthya na mughalha wabo ya Kwarto. 24 ——
25 Neryo okw’Oyo oyuwanga baghumya erikwamana n’engulhu yuwene eyo ngathulha n’erithulhughania Yesu Kristo, erikwamana n’eribisulhwa ly’embitha yibuyirire eyabya iyabirihunirwa habw’obuthuku buuli 26 aliwe lino eyabiriminyikalibwa* n’eriminyisibwa erilhabira omwa Masako w’obuminyereri okwa bihanda byosi erikwamana n’ekihano kya Nyamuhanga oyuliho kera na kera eky’erikulha-kulhania obwowa erilhabira omw’ikirirya; 27 oku Nyamuhanga, oyuwithe amenge iyuwene, ahebawe olhukengerwa erilhabira omu Yesu Kristo kera na kera. Amina.