Ebaruha y’Erimbere Okwa Banya Tesalonika
2 Balikyethu, inywibene-bene munasi ndeke-ndeke ngoku ithwe eribabungira mwabirilhwiririra ebibuya. 2 Kundi nomwakine indi okw’itsuka muthwaghalhwa n’erikolhwa nabi e Filipi, ngoku munasi, muthwabya n’obuthubaha* erilhabira omu Nyamuhanga wethu eribabwira engulhu yuwene ya Nyamuhanga ihane erihakanisibwa linene.* 3 Kundi erihabulha eryo thukaha siririlhua omwa malengekania awawire kutse omwa bukine kutse omwa mathebo, 4 aliwe ngoku Nyamuhanga abirithuhamyako omw’ithuha engulhu yuwene, neryo thukabugha isi busana n’eritsemesya abandu, aliwe eritsemesya Nyamuhanga, oyukalebaya emithima yethu.
5 Kandi kwenene, munasi ngoku muthuthakolesya nahake ebinywe by’ekisehya kutse eriyithendererya busana n’omururu; Nyamuhanga angana thw’imira! 6 Kutse muthuthasondya olhukengerwa okwa bandu, kutse okw’inywe kutse okwa bandi, nomwakine indi thwangabere muheke owalithohire ithwe ng’abakwenda ba Kristo. 7 Mbaghane n’ekyo, muthwabya bolho omwa kathi-kathi kenyu, ngoku omubire akanatsomana ndeke* abaana biwe omw’ibabuya-buya. 8 Neryo kundi thubanzire kutsibu, muthwathwamu* eribabwira, isi y’engulhu yuwene ya Nyamuhanga nyisa aliwe kandi muthwahayo esyongebe syethu busana nenyu kundi mwabya banzwa bethu.
9 Balikyethu, ahathe erithika-thika, mun’ibukire omubiiri wethu n’erinuba lyethu. Ithukakolha omwa kiro n’omw’ithungyi, nuku sithuhire okwa wosi-wosi w’okw’inywe kw’omuheke owalithohire, omughulhu thwababwira engulhu yuwene ya Nyamuhanga. 10 Mwangana thwimira, na Nyamuhanga kuthya, ngoku thwabya bathaleghulha kandi abathunganene kandi abatheko lhubanza embere syenyu abikirirya. 11 Munasi ndeke ngoku muthwalholha embere eribahiramo omuhwa n’eribakirania n’eriha obuli mughuma w’okw’inywe y’obwema, ngoku thatha akanakolha abaana biwe, 12 nuku mwanga lholha embere erilendera ng’abatholere embere sya Nyamuhanga, oyukababirikira omwa Bwami bwiwe n’omwa lhukengerwa.
13 Omo kwenene, eki ky’ekikaleka nethu ithwasima Nyamuhanga buthaleka, kundi omughulhu mw’angirira ekinywe kya Nyamuhanga, ekyo mwowa erilhua okw’ithwe, mumwalighakyo butsira ng’ekinywe ky’abandu, aliwe ngoku kwenene ni kinywe kya Nyamuhanga, kandi ekinemukolha omw’inywe abikirirya. 14 Kundi inywe, balikyethu, mumwagherererya ebithunga bya Nyamuhanga ebiri e Yudea ebimathikene na Kristo Yesu, kundi mumwaghalhwa omwa byalha by’abandu b’ewenyu eriaghalhwa lighumerere eryo nabo banemwaghalhwamo omwa byalha by’Abayuda, 15 aban’itha Omukama Yesu n’abaminyereri n’erithwendererya. Eryongera okw’ekyo, sibali tsemesaya Nyamuhanga, aliwe bakahakanisaya ebikaghasira abandu abosi, 16 bakalengaho erithukakirya erikania n’abandu b’ebihanda nuku aba bangalhamibwa. Omwa nzira eyi, mughulhu wosi bak’ongera ebibi byabo. Aliwe erighunzerera erihithana liwe lyabiribahikako.
17 Aliwe omughulhu thwaghabulhawa* okw’inywe, balikyethu, habw’akathuku kake (busu okwa busu, butsira omwa mithima yethu), busana n’eriyisunza lyethu linene, muthwahiraho akaghalha kanene eribalholhako busu okwa busu. 18 Busana n’eki, muthwanza eriasa eyo muli, ee, ingye Paulo, munalengaho butsira murundi mughuma aliwe kabiri; nomwabine, Sitani mwayikyika omwa nzira yethu. 19 Kundi ibbwa, amaha wethu kutse obutseme kutse embiitha y’etseme nene embere sy’Omukama wethu Yesu okw’ibyaho liwe by’ebyahi? Mbwino s’inywe? 20 Ahathe erithika-thika n’inywe lhukengerwa lhwethu kandi butseme bwethu.