Okwa Banya Roma
9 Ngabugha okwenene omu Kristo; sindi bugha mabehi, ngoku obunyamuthima-thima bwaghe bukanyihera obwema omwa mulimu abuyirire, 2 ngoku ngawithe obulighe bunene n’obulhumi obuthehwa omwa muthima waghe. 3 Kundi iningendi yisunza indi ingye ngaghabulhawe oku Kristo ng’omuthakirwa busana n’abaghalha bethu, abahughu baghe erikwamana n’omubiri, 4 nabo ib’Abaisraeli. Ibo babawithe olhusunzo lhw’eriyirwamo baghalha n’olhw’erihebwa olhukengerwa n’esyondaghane n’Emighambo n’omubiiri owabuyirire n’emilhaghe. 5 Ibo balhuire omwa bathatha-kulhu bethu, kandi Kristo alhuire omw’ibo erikwamana n’omubiri. Nyamuhanga, oyuli endatha w’ebyosi, apipawe kera na kera. Amina.
6 Aliwe si bugha indi ekinywe kya Nyamuhanga kyabirilemwa. Kundi si b’abosi abalhuire omu Israeli indi ni “Israeli” owenyine-nyine. 7 Kutse abosi sibangahulhwamo baana busana n’eribya ini b’omwa lhubutho* lhwa Abrahamu; aliwe, “Abakendi syahulhwamo lhubutho* lhwawu bakendi syasira omu Isaka.” 8 Ni bugha ambu, abaana b’omubiri si baana ba Nyamuhanga abonyine-nyine, aliwe abaana b’omulhaghe bakaghanzawa ng’olhubutho.* 9 Kundi ekinywe ky’omulhaghe mukyabugha kithi: “Ngendi syasa okwa ndambi ng’eno na Sara akendi syabya iniabiributha omughalha.” 10 Si w’omughulhu oyo musa aliwe n’okwa mughulhu Rebeka aheka obukule bw’abahasa oku Isaka thatha-kulhu wethu; 11 kundi omughulhu babya bathe babuthwa kandi bathe bakolha ekyosi-kyosi ekibuya kutse ekibi, nuku ekighendererwa kya Nyamuhanga eky’eribasombolha kyangalholha embere erisighikira, butsira okwa mibiiri aliwe okwa Oyukabirikira, 12 Rebeka mwabwirwa athi: “Omukulhu akendi syabya mughombe w’omulere.” 13 Ngoku kihandikire kithi: “Munanza Yakobo, aliwe munapona Esau.”
14 Neryo thubughe thuthiki? Mbwino Nyamuhanga alimo obuthe bulingirirania? Eyihi nahake! 15 Kundi akabwira Musa athi: “Ngendi kangania obughanyiri oko yo ngendi kangania obughanyiri, kandi ngendi kwira bulighe oko yo ngendi kwira bulighe.” 16 Neryo kwesi sikiseghemere okw’iyisunza ly’omundu kutse okwa kaghalha* kiwe, aliwe oku Nyamuhanga, oyuwithe obughanyiri. 17 Kundi amasako akabwira Farao athi: “Busana n’enzumwa eyi nabirileka iwabya iwuneho: erikangania amaaka waghe erilhabira omw’iwe, n’erina lyaghe erithulhughanibwa omo kihugho kyosi.” 18 Neryo kwesi akakanganaya obughanyiri oko oyo akayisunza, aliwe akalighira abandi erikalya emithima yabo.
19 Neryo wukendi syambwira wuthi: “Busana naki akinasondaya ekisobyo? Nindi oyuwanga kakirya erisonda liwe?” 20 Iwe mundu, nawu wulindi wuthi wukasubiraya Nyamuhanga? Mbwino ekikabumbawa ikyanabwira omubumbi wakyo kithi: “Busana naki iwanyibumba wuthya?” 21 Ekyo ikyanabya? Mbwino omubumbi syawithe obuthoki okwa libumba erikolha omwa libumba iryan’eryo mw’ekindu eky’omughaso, n’erindi mw’ekithawithe mughaso? 22 Neryo ibbwa Nyamuhanga amabya iniabya inianawithe eriyisunza ly’erikangania erihithana liwe n’eriminyikalya amaaka wiwe, kandi imwaghumisirizya kutsibu ebindu by’erihithana ebitholere erithoghothibwa? 23 Kandi ibbwa eki kyamabya imukyakolhwa eriminyikalya obunene bw’olhukengerwa lhwiwe okwa bindu by’obughanyiri, ebyo asangwa athegheka busana n’olhukengerwa, 24 ni bugha ambu, ithwe, abo abirikira erilhua, butsira omwa Bayuda basa aliwe n’omwa b’ebihanda? 25 Kiri ngoku akabugha n’omu Hosia athi: “Abathe bandu baghe, ngendi syabahulhamo ‘bandu baghe,’ n’omukali oyuthabya anzibirwe, ngendi syamwahulhamo ‘mwanze’; 26 n’omo mwanya eyo babwirirawa ambu, ‘Simuli bandu baghe,’ eyo yabakendi syahulirwamo ‘baghalha ba Nyamuhanga oyuliho.’”
27 Na Isaya mwabugha oko Israeli athi: “Nomwakine indi omughanzo w’abaana ba Israeli anganabya ng’omuseghe w’okwa ngetse, emisighalira basa babakendi syalhamibwa. 28 Kundi Yehova akendi syatswera ekihugho, akendi syakighunzaho kandi omwa byalhuba.”* 29 Kandi ngoku Isaya analhaghulha: “Yehova w’amahe kw’athathusighira olhubutho,* thwangabere ithwabiribya nge Sodomu, kandi ithwabirisosa e Gomora.”
30 Neryo thubughe thuthiki? Thuthi abandu b’ebihanda, nomwakine indi sibali kwamirira erithunganene, babiribana erithunganene, erithunganene erikasa busana n’erikirirya; 31 aliwe Abaisraeli, nomwakine indi bakakwamirira omughambo w’erithunganene, sibalibana omughambo oyo. 32 Busana n’enzumwa yahi? Kundi mubakwamiriragho, butsira omw’ikirirya aliwe omwa mibiiri. Mubathwikalha okwa “libwe erikathwikalhaya”; 33 ngoku kihandikire kithi: “Lebaya! Ngahira omwa Sioni mw’eribwe ly’erithwikalya n’olhukuka lhw’erihithania, aliwe oyukahira erikirirya liwe okw’iryo syendi syalhabira ahisi.”