Ebaruha Yakasathu eya Yohana

1 Ingye musyakulhu mukulhu ngahandikira Gayo, omwanzwa, oyo nganzire kutsibu.

2 Mwanzwa, ngasaba indi omo myatsi yosi wulhole embere erikulha-kulhana n’eribya n’amaghalha awuwene, ngoku wunemukulha-kulha lino. 3 Kundi munatsema kutsibu omughulhu balikyethu basa n’eriha obwema obuhambire oko kwenene eyo wumakirire, wunemulholha embere erilendera omwa kwenene. 4 Sihali etseme nene* eyilengire eyo ngawithe eyi: ingye eriowa ngoku abaana baghe banemulholha embere erilendera omwa kwenene.

5 Mwanzwa, wukakanganaya obuthaleghulha bwawu omwa bya wukakolera balikyethu, nomwakine indi si wubasi. 6 Babiriha obwema obuhambire okwa lhwanzo lhwawu embere sy’ekithunga. Bakendibya bakaghenda, kisi wubalhaghe omwa mibere eyitholere embere sya Nyamuhanga. 7 Kundi baghenda busana n’erina liwe, isibathalhusya okwa bandu b’ebihanda kw’ekindu kyosi-kyosi. 8 Neryo thuwithe olhukwamirwa lhw’erikokya abandu ng’aba, nuku thwangabya bakoli balikyabo omo kwenene.

9 Munahandikira ekithunga ky’omwatsi mulebe, aliwe Diotrefe, oyuwanzire eribya w’embere-mbere omw’ibo, syali ligha omw’isikya ekyosi-kyosi ekikalhua okw’ithwe. 10 Ky’ekikendi syaleka namasa, iningendi syakania okwa by’akakolha eby’erithulhalhaniako amabehi awakalire.* Isiky’ekyo kisa, akaghana eriangirira balikyethu omw’isikya; n’abakanza eribangirira akalengaho eribalemesya n’eribalhusya omwa kithunga.

11 Mwanzwa, isiwagherereraya ebithuwene, aliwe wugherereraye ebyuwene. Oyukakolha ebyuwene ni wa Nyamuhanga. Oyukakolha ebithuwene syali athalhangira Nyamuhanga. 12 Demetirio akakanibawako ndeke n’abosi kuthya n’ekwenene iyoyene-yene. Nibya nethu thunemumuhera obwema, kandi wunasi ngoku obwema obwa thukaha buhikire.

13 Ngalhue ngawithe myatsi mingyi ey’erikuhandikira, aliwe singanzire erikuhandikirayo omwa kalamu n’obwino. 14 Aliwe ngawithe amaha ngoku ngayasa, neryo thukendi syakania busu okwa busu.

Ambi obuholho ibwabya nawu.

Abanywani bamakuramukya. Wunyiramukiraye obuli mundu okwa lina.