Ebaruha oku Tito
2 Aliwe iwe, wulhole embere eribugha ebihambene n’erikangirirya erihikire.* 2 Abalhume abakulire babye n’emibere eyuwene, abathethwalha emyatsi mwa lhutseghe-tseghe, ab’obulengekania bw’amenge, abaghumire omw’ikirirya, omo lhwanzo, omw’iyiyinia. 3 Kuthya, n’abakali bakulhu babye n’emibere eyibuyirire, sibabye abakatsandaya okwa bandi kw’erina, sibabye bakobe b’obwabu, aliwe babye bakangirirya b’ebibuya, 4 nuku banga habulha* abakali balere erianza bira babu, erianza abaana babu, 5 eribya n’obulengekania bw’amenge, abahenirye omo by’esyongeso, abakakolha emibiiri y’eka, ababuya, abakaghondera bira babu, nuku ekinywe kya Nyamuhanga sikikanibaweko nabi.
6 Kuthya, wulhole embere eribwira abalhume balere wuthi babye n’obulengekania bw’amenge, 7 eriyikangya ku wuli ky’erileberyako omwa mibiiri eyuwene omwa buli mwatsi. Wukangiriraye ebihenirye butsira lhutseghe-tseghe, 8 omw’ikolesya ebinywe ebihikire* ebithe byanga leka wukatswebwa, nuku abakahakanisaya bahemuke, isibakiwithe ekyanga leka ibathukaniako nabi.* 9 Abakobe baghondere bakama babu omo myatsi yosi, erilengaho eribatsemesya, butsira erikakalhukana nabo, 10 butsira eribiba, aliwe bakanganaye ku ni bayiketherwa, nuku omo buli mwatsi bang’uwania erikangirirya ly’Omulhamya wethu, Nyamuhanga.
11 Olhukogho lhwa Nyamuhanga lhwabiriminyikalibwa, erilethera abandu b’emisindo yosi b’omulhamu. 12 Lhukathuthendeka erighana ebithekenga Nyamuhanga n’esyongumbu sy’ekihugho n’erileka thubye n’obulengekania bw’amenge, ithune bathunganene, kandi abakubaha Nyamuhanga omwa mulembe ono, 13 ithunemulindirira amaha awakatsemesaya n’eriminyikalibwa ly’olhukengerwa lya Nyamuhanga mukulhu n’ery’Omulhamya wethu, Yesu Kristo, 14 oyuwayihayo busana nethu erithuboholha* okwa buli mulingo w’obubi n’eriyererya abandu abali bindu biwe eby’obughuli, ab’omuhwa busana n’emibiiri mibuya.
15 Wulhole embere eribugha emyatsi eyi n’erihana* n’erihabulha omwa buthoki obwosi. Siwuleke omundu akakughaya.