Ebaruha Okwa Banya Galatia

6 Balikyethu, omundu nomwangakwama enzira eyiwire isyathaminya, inywe abatholere bunyakirimu mulengeho erihengulha omundu ng’oyo omwa muthima w’obwolho. Aliwe muyitheghaye, kundi nenyu imwangana lengwako. 2 Mulhole embere erihekerana obulitho, neryo omwa nzira eyi imukendi berererya omughambo wa Kristo. 3 Kundi omundu amalengekania athi ali okwa lhulengo lhulebe kwesi isyalhuhikirenako, iniakayitheba. 4 Aliwe obuli mundu alebaye ndeke emikolere yiwe, neryo iniakendi bana ekyangaleka iniayitsemera, butsira omw’iyilinganisya n’owundi. 5 Obuli mundu asyayihekera omuheke* wiwe.

6 Kandi obuli mundu oyukakangiriribawa* ekinywe asangire omwa bibuya byosi haghuma n’oyukamuha erikangirirya* ng’eryo.

7 Simuthebibawe: Nyamuhanga siw’eritheba-theba. Kundi ekya mundu akabiba, ky’anemwendi syahulhulha; 8 kundi oyukabiba erikwamana n’omubiri wiwe akendi syahulhulha erihonda erilhua okwa mubiri wiwe, aliwe oyukabiba erikwamana n’omulimu akendi syahulhulha engebe y’erikotha erilhua okwa mulimu. 9 Neryo sithuleke erikolha ebibuya, kundi okwa buthuku obutholere thukendi syahulhulha thwamathendi lhuhirira.* 10 Neryo omughulhu thukinawithe akaghisa,* thukole ebibuya okwa bosi, aliwe kutsibu-tsibu okw’abo thuli nabo omw’ikirirya.

11 Muthalebya ku nabiribahandikira omwa syonyughuta nene-nene ingyuwene-wene.

12 Abosi abakatsomana obubuya bw’omubiri* habw’erithatsemesya abandi babakabahathikana bathi mubanibawe, erikolha ekyo bakanza eriyibalya okw’endereribwa busana n’omuthi w’obwaghali* wa Kristo. 13 Kundi nibya abakabanibawa, nabo ibobene-bene sibalighendera okwa Mighambo, aliwe bakanza mubanibawe nuku bangabana eky’eriyihalhambira busana n’emibiri yenyu. 14 Aliwe ambi isinayihalhamba, mbwino ini busana n’omuthi w’obwaghali* w’Omukama wethu Yesu Kristo, oyo erilhabira omw’iyo ekihugho kyabir’ithibwa busana naghe, naghe busana n’ekihugho. 15 Kundi eribanibwa n’erithendi banibwa ebyosi siki, aliwe ekikulhu, ky’ekihangikwa kihya-kihya. 16 Okwa bosi abakakwama ndeke emighendere eyi, obuholho n’obughanyiri bibabyeko, ee, bibye oko Israeli ya Nyamuhanga.

17 Eritsuka na munabwire, sihabye oyukanyighunzako obuholho, kundi nganeko esyongolhu okwa mubiri waghe esy’eribya mukobe wa Yesu.

18 Balikyethu, olhukogho lhw’Omukama wethu Yesu Kristo lhubye n’omuthima ogho mukakanganaya. Amina.