Okwa Banya Roma
14 Mwangirire omundu oyutsekire omw’ikirirya liwe, aliwe isimwatswera busana n’amalengekania awali mbaghane.* 2 Omundu mughuma awithe erikirirya ly’erirya obuli kindu, aliwe omundu oyutsekire akalya ebirimwa bisa. 3 Oyukalya isyakuthaya oyutherya, n’oyutherya isyatswera oyukalya, kundi Nyamuhanga abirimwangirira. 4 Nawu wulindi wuthi wukatswera omughombe w’owundi? Ak’imana kutse eriwa embere sy’omukama wiwe. Kwenene, akendi sy’imanibwa, kundi Yehova angana mw’imania.
5 Omundu mughuma akabugha athi ekiro kirebe kilengire ebindi; n’owundi iniabugha athi ekiro kirebe kyingene n’ebindi biro byosi; obuli mundu ayikakasiraye ndeke omwa bulengekania bwiwe. 6 Oyuk’ibuka ekiro akak’ibuka busana na Yehova. N’oyukalya, akalya busana na Yehova, kundi akaha Nyamuhanga y’ewasingya; n’oyutherya syalirya busana na Yehova, aliwe akaha Nyamuhanga y’ewasingya. 7 Kundi kwenene, sihali n’omughuma w’okw’ithwe oyukabyaho ahabwiwe iyuwene, kandi sihali oyukaholha ahabwiwe iyuwene. 8 Kundi thwamabyaho, thukabyaho busana na Yehova, kandi thwamaholha thukaholha busana na Yehova. Neryo thwamabyaho kandi thwamaholha, thuli ba Yehova. 9 Kundi busana n’eki, Kristo mwaholha kandi mwathasyabyaho, nuku angabya Mukama w’abaholi n’abaliho.
10 Aliwe busana naki wukatswera mulikyenyu? Kutse kandi busana naki wukakuthaya mulikyenyu? Kundi ithwe bosi thukendi syimana embere sy’ekithumbi ky’eritswera ekya Nyamuhanga. 11 Kundi kihandikire kithi: “‘Ngoku kwenene ngaliho,’ Yehova athya, ‘obuli lirwe likendi syanyikukamira, n’obuli lhulimi lhukendi syaligha ahathe eribisirira ngoku indi Nyamuhanga.’” 12 Neryo kwesi, obuli mughuma w’okw’ithwe akendi syayithonderalho embere sya Nyamuhanga.
13 Busana n’ekyo, isithwathasyatswerana, omwakanya k’ekyo, thuthwemu erithendi hiriraho mulikyethu ekikamuthwikalhaya kutse ekikamukakiraya. 14 Nganasi kandi ngakakasirye omo Mukama Yesu ngoku sihali ekithahenirye ikyo ahabwakyo; aliwe ekyo mundu akabugha athi sikihenirye, okw’iyo kikabya isikihenirye. 15 Kundi mulikyenyu amahithana busana n’ebyalya, wukabya isiwukilendera omo lhwanzo. Ebyalya byawu isibyaleka wukaherya* oyo Kristo aholera. 16 Neryo isimwaleka ebibuya ebya mukakolha bikakanibwako ng’ebithuwene. 17 Kundi Obwami bwa Nyamuhanga sibuseghemere okw’irya n’erinywa, aliwe buseghemere okwa lithunganene n’obuholho n’etseme erilhabira omwa mulimu abuyirire. 18 Kundi owosi-wosi oyuwithe emibere eyi kandi ini mughombe wa Kristo akalighawa na Nyamuhanga kandi akasimawa n’abandu.
19 Neryo kwesi, thukwamirire emyatsi eyikaletha obuholho n’emyatsi eyathwanga himbanamo. 20 Mulekere aho erihimbulha omubiiri wa Nyamuhanga busana n’ebyalya. Kwenene, ebindu byosi bihenirye, aliwe ni ky’akabi* omundu erirya ebyalya byamabya ibikendi thwikalya. 21 Kyuwene erithendirya ebyalya kutse erinywa evini kutse erikolha ekyosi-kyosi ekikathwikalhaya mulikyenyu. 22 Erikirirya eryawuwithe, wubye nalyo embere sya Nyamuhanga. Obutseme buli n’omundu oyutheyitswera busana n’eby’akalighirana nabyo. 23 Aliwe amabya mw’erithika-thika kandi akalya, iniamabyako olhubanza, kundi syalirya busana n’erikirirya. Omo kwenene, obuli kindu ekithaseghemere okw’ikirirya ni kibi.