Ebaruha oku Tito
1 Paulo, omughombe wa Nyamuhanga kandi omukwenda wa Kristo Yesu erikwamana n’erikirirya ly’abasombolhwa ba Nyamuhanga n’eriminya erihikire ery’ekwenene erihambene n’eryubaha Nyamuhanga 2 kandi ebiseghemere okwa maha w’engebe y’erikotha eyo Nyamuhanga, oyuthebugha amabehi, alhaghanisaya kera; 3 aliwe okwa buthuku bwiwe obutholere, mwaminyikalya ekinywe kiwe erilhabira omw’ithulhughania eryo nahebawa erikwamana n’erilhaghira ly’Omulhamya wethu, Nyamuhanga; 4 oku Tito, omwana waghe-waghe erikwamana n’erikirirya erya thulimo haghuma:
Ambi olhukogho n’obuholho erilhua oku Nyamuhanga Thatha na Kristo Yesu Omulhamya wethu ibyabya nawu.
5 Munakusigha e Krete nuku wanga hengulha emyatsi eyabya yighanire* n’erisombolha abasyakulhu omwa buli tawuni, ngoku nakuhana indi: 6 hamabya ihane omulhume wosi-wosi oyutheko mwatsi, omulhume w’omukali mughuma, oyuwithe abaana abathe omwa buthya-buthya* kutse abathe bayisamambuli. 7 Kundi iyo ng’omwimaniri wa Nyamuhanga, omulebererya atholere iniabya oyutheko mwatsi, oyuthemaghirira ekiwe, oyuthehithana lhuba-lhuba, oyuthe muthamiri, oyuthe mulhwi,* oyuthe w’omururu w’eribana amaghoba omwa nzira eyithatholere, 8 aliwe abye mukokya, oyuwanzire ekibuya, ow’obulengekania bw’amenge,* omuthunganene, omuthaleghulha, oyukayikakiraya, 9 oyukamakirira ndeke ekinywe ky’eriyikethera bikahika okwa mibere yiwe y’erikangirirya, nuku angathoka erihimba abandi* omw’ikangirirya erihikire* n’erikunga abakahakanisaya.
10 Hali bandu bangyi abakayisamambulha, abakakanaya ebitheghasa, kandi ababehi, kwilhabirirya abakakwama eky’eribanibwa. 11 Kitholere erikumba amuno wabo kundi abandu iban’abo bakatheraya eka eyosi omw’ikangirirya emyatsi eyabathatholere erikangirirya bakanza eribana amaghoba omwa nzira eyithatholere. 12 Omughuma w’okw’ibo, omuminyereri wabo-wabo, mwabugha athi: “Abanya Krete mughulhu wosi ni babehi, ebisoro by’omoli ebikalire, abambayitheka abakalya binene.”
13 Obwema obu buhikire. Busana n’enzumwa eyi, wulhole embere eribaha erikunga erikalire nuku banga ghuma omw’ikirirya, 14 isiwuli hulikirira esyongano sy’Abayuda n’ebihano by’abandu abakasighanaya ekwenene. 15 Emyatsi yosi yihenirye okwa bandu abahenirye; aliwe okwa batsandire n’abathawithe erikirirya, sihali ekihenirye, kundi amalengekania wabo n’obunyamuthima-thima bwabo bitsandire. 16 Kinyamwisi bakabugha bathi banasi Nyamuhanga, aliwe bakamughana omwa mikolere yabo, kundi ibo n’inye kandi bathowa kandi sibalighirwe erikolha omubiiri wosi-wosi owuwene.