Okwa Banya Roma
5 Kundi lino thwabiry’ahulhwamo bathunganene busana n’erikirirya, thubye buholho* na Nyamuhanga erilhabira omo Mukama wethu Yesu Kristo, 2 kandi erilhabira omw’iyo thwabirihika okwa lhukogho olhwa thwimenemo lino busana n’erikirirya; neryo thutseme,* erisighikira n’amaha w’olhukengerwa lhwa Nyamuhanga. 3 Isi ky’ekyo kisa, aliwe thutseme* n’omughulhu thuli omwa malighe, kundi thunasi ngoku amalighe akaletha eriyiyinia; 4 eriyiyinia likaletha erisimwa na Nyamuhanga; erisimwa na Nyamuhanga likaletha amaha, 5 kandi amaha syali thulhabiraya ahisi; kundi olhwanzo lhwa Nyamuhanga lhwabiryuthulirwa omwa mithima yethu erilhabira omwa mulimu abuyirire, ogho thwahebawa.
6 Kundi kwenene, thwabere ithukine batseke, Kristo mwaholha busana n’abandu abathekenga Nyamuhanga, okwa buthuku obwahirawaho. 7 Kundi kikalire omundu wosi-wosi eriholera omundu oyuthunganene; aliwe obundi omundu anganaligha eriholera omundu mubuya. 8 Aliwe Nyamuhanga akathukanganaya olhwanzo lhwiwe omw’ekyo, kundi omughulhu thwabya ithukine bakolha-nabi, Kristo mwathuholera. 9 Ekikulhu kutsibu, kundi lino thwabiryahulhwa mwa bathunganene erilhabira omwa musasi wiwe, thukendi syalhamibwa okw’ihithana erilhabira omw’iyo. 10 Kundi thwamabya imuthwanathasuba oku Nyamuhanga erilhabira omwa lhuholho lhwa Mughalha wiwe nibya ithukine syonzighu, ithukendi lhamibwa bungahi erilhabira omwa ngebe yiwe, lino ithwabirisubanamu na Nyamuhanga. 11 Isi ky’ekyo kisa, aliwe kandi thunemutsema omu Nyamuhanga erilhabira omo Mukama wethu Yesu Kristo, oyo erilhabira omw’iyo lino thwabirisubanamu na Nyamuhanga.
12 Neryo ngoku erilhabira omwa mundu mughuma ekibi muk’ingira omwa kihugho n’olhuholho erilhabira omwa kibi, neryo n’olhuholho mulhwahika okwa bandu bosi kundi abosi babya ibabirihalya—. 13 Kundi ekibi mukyahika omwa kihugho hathe habya Emighambo, aliwe omundu wosi-wosi isyanga ghanzwa ng’oyuli kw’ekibi omughulhu hathe emighambo. 14 Nomwabine, olhuholho mulhwathabalha ng’omwami erilhua oku Adamu erihika oku Musa, nibya n’okw’abathakolha ekibi ngoku Adamu ahalhaya, oyusosire oyuwabya iniakayasa.
15 Aliwe ekihembo sikiri ng’erilholho. Erilholho ly’omundu mughuma lyamabya imulyaleka abandu bangyi ibaholha, neryo kwesi olhukogho lhwa Nyamuhanga n’ekihembo ekyo akaha ahathe erithuha erilhabira omwa lhukogho olhw’omundu mughuma, Yesu Kristo, lhwanga kanyirira* bungahi okwa bandu bangyi! 16 Kandi ebikalhwiririra omwa kihembo ekikahebawa ahathe erithuha sibisosene n’ebyalhwiririra omwa ebyo mundu mughuma oyuwakolha erilholho akolha. Kundi eritswera eryabya enyuma w’erilholho lighuma lyabya in’ibya kw’omusango, aliwe ekihembo ekyahebawayo enyuma w’amalholho mangyi kyabya inileka abangyi ibahulhwamo bathunganene. 17 Neryo erilholho ly’omundu mughuma lyamabya imulyaleka olhuholho ilhwathabalha ng’omwami erilhabira omwa mundu oyo, neryo kwesi abakahebawa olhukogho lhunene n’ekihembo ky’erithunganene ekikahebawa ahathe erithuha banga thabalha bungahi ng’abami omwa ngebe erilhabira omwa mundu mughuma, Yesu Kristo!
18 Neryo kwesi, ngoku erilhabira omw’ilholho lighuma abandu b’emisindo yosi mubahirwako omusango, kuthya erilhabira omwa kindu kighuma ekithunganene abandu b’emisindo yosi mubahulhwamo abathunganene nuku babane engebe. 19 Kandi ngoku erilhabira omwa buthowa bw’omundu mughuma abandu bangyi mubayirwamo bakolha-nabi, kuthya n’erilhabira omwa bwowa bw’omundu mughuma abangyi basyayirwamo bathunganene. 20 Neryo Emighambo muyasaho nuku amalholho ang’ongera. Aliwe aho ekibi ky’ongera, n’olhukogho mulhway’ongera kutsibu. 21 Busana n’ekighendererwaki? Neryo ngoku ekibi kyanathabalha ng’omwami haghuma n’olhuholho, kuthya n’olhukogho lhwanga thabere ng’omwami erilhabira omwa lithunganene erikolya okwa ngebe y’erikotha erilhabira omu Yesu Kristo Omukama wethu.