Ebaruha y’Erimbere eya Yohana

1 Ekyabyaho okw’itsuka, ekyo thwabiriowa, ekyo thwabiriyilhangirira n’ameso wethu, ekyo thwabirilholhako kandi ekyo ebyalha byethu byabirithulhako, ekihambire okwa kinywe ky’engebe, 2 (ee, engebe muyaminyikalibwa, kandi thwabirilhangira kandi thukaha obwema kandi thukababwira engebe y’erikotha eyabya haghuma na Thatha kandi muyaminyikalibwa okw’ithwe), 3 ekyathwabirilhangira n’eriowa nethu kyathukababwira, nuku nenyu mwangabya bughuma* nethu. Kandi obughuma bwethu obu bune na Thatha na Mughalha wiwe Yesu Kristo. 4 Kandi thukahandika emyatsi eyi nuku obutseme bwethu bwanga hikana.

5 Oyu w’omwatsi ogho thwowa erilhua okw’iyo kandi wathukababwira: Nyamuhanga ni kyakakalha, n’omwirima syali omw’iyo* nahake. 6 Thwamabugha thuthi, “Thuli bughuma nayu,” aliwe kandi ithwalholha embere erilendera omwa mwirima, ithukayitheba kandi isithuli kwama ekwenene. 7 Aliwe thwamabya ithunemulendera omwa kyakakalha ngoku nayu ali omwa kyakakalha, ithuli bughuma owundi okwa wundi, n’omusasi wa Yesu Mughalha wiwe akathwerayako ebibi byosi.

8 Thwamabugha thuthi, “Sithuwithe kibi,” ithukayitheba ithwibene-bene n’ekwenene isiyiri omw’ithwe. 9 Thwamabikulha ebibi byethu, akathughanyira ebibi byethu n’erithwerya kw’ebithathunganene ebyosi kundi iyo ni muyiketherwa kandi athunganene. 10 Thwamabugha thuthi, “Sithuli thwathahalya,” ithwamamuyiramo mubehi n’ekinywe kiwe isikiri omw’ithwe.