Ebaruha Yakabiri Okwa Banya Korinto
6 Omw’ikolha haghuma nayu, thukathasyababwira thuthi isimwaligha olhukogho lhwa Nyamuhanga kandi mukathalya ekighendererwa kyalho. 2 Kundi akabugha athi: “Okwa mughulhu owalighirwe munabowa, n’okwa kiro ky’omulhamu munabawathikya.” Lebaya! Kutsibu-tsibu ono w’omughulhu owalighirwe. Lebaya! Lino ni kiro ky’omulhamu.
3 Omwa mibere yosi, sithuli kolha ekyanga thwikalya, nuku omubiiri wethu syabughaweko nabi; 4 aliwe omwa buli mibere thukayikanganaya ng’abaghombe ba Nyamuhanga, omw’iyiyinirya bingyi, omwa malighe, omwa mighulhu y’obuyithawa, omwa bitsibu, 5 omw’iswiribwa, omw’ihirwa omwa syongomo, omw’isangirirwa n’ebyungungu, omw’ikolha kutsibu, omw’ikuba othulho, omwa mughulhu w’eribulha ebyalya; 6 omw’eribwa, omw’iminya, omw’ighumisirizya, omwa lhukeri, omwa mulimu abuyirire, omwa lhwanzo olhuthemo mathebo, 7 omwa mibughire y’okwenene, omwa maaka wa Nyamuhanga; erilhabira omwa birwanisyo by’erithunganene ebiri omwa byalha by’amali* n’omwa by’amalembe,* 8 erilhabira omwa lhukengerwa n’omw’ithendi sikya, erilhabira omwa ngulhu nyibi n’eyuwene. Thukalhangirawa ng’ababehi nibya ithune b’okwenene, 9 ng’abathasibwe aliwe ithunasibwe, ng’abakayaholha* aliwe lebaya! thuneho, ng’ababirisuyirwa* aliwe sithul’ithibawa, 10 ng’abali omwa bulighe aliwe ithunatsemire mughulhu wosi, ng’abanakwa aliwe ithunemuyira abangyi mo bagaga, ng’abathawitheki aliwe ithunawithe bingyi.
11 Thwabirikumbulha obuno bwethu erikania* nenyu, banya Korinto, thwabirikyungulha ndeke emithima yethu. 12 Sithuli yikukumirira* omw’ibakangania olhwanzo, aliwe inywe mukayikukumirira omw’ithukangya olhwanzo lhwenyu lhw’eribuya-buya. 13 Busana n’ekyo, nenyu kuthya—ngakanaya nenyu ng’abaana baghe—mukyungule ndeke emithima yenyu.
14 Isimwaboherawako engomo omwa buth’ingana n’abathikirirye. Kundi ni bughuma bwahi obo ekithunganene kiwithe n’obubi? Kutse ekyakakalha kihambene kithi n’omwirima? 15 Eryongera okw’ekyo, ni bughuma bwahi obo Kristo awithe na Beliali?* Kutse ni byahi ebyo oyuwikirirye* ahambenemo n’oyuthikirirye? 16 Ni lighirana lyahi eryo ehekalhu ya Nyamuhanga yiwithe n’esyosanamu? Thuli hekalhu ya Nyamuhanga oyuliho; ngoku Nyamuhanga abugha athi: “Ngendi syikalha omwa kathi-kathi kabo n’erilendera omwa kathi-kathi kabo, kandi ngendi syabya Nyamuhanga wabo, nabo bakendi syabya bandu baghe.” 17 “‘Busana n’ekyo, mulhue omwa kathi-kathi kabo, muyihighule,’ Yehova athya, ‘kandi muleke erithulha okwa kindu ekithahenirye”; “‘naghe ngendi b’angirira.’” 18 “‘Ngendibya thatha wenyu, nenyu mukendibya baghalha baghe na bali baghe,’ Yehova athya, Omuthoki w’Ebyosi.”