Ebaruha Yakabiri Okwa Banya Tesalonika
2 Aliwe balikyethu, bikahika okw’ibyaho ly’Omukama wethu Yesu Kristo n’erihindanibwa lyethu okw’iyo, thukabasaba thuthi 2 isimwasuka-sukanibawa lhuba erilhua omwa bulengekania bwenyu kutse eryubaha busana n’omwatsi owasondolibawa n’omulimu kutse busana n’omwatsi owabiribuwa kutse busana n’ebaruha eyikabya nga yikalhua okw’ithwe, eribya nga yikabugha yithi ekiro kya Yehova kyamahika.
3 Sihabye oyukabathebaya* omwa nzira yosi-yosi, kundi sikyendi syasa eriyisamambulha okw’ikirirya lithe lyatsuka eriasa n’omundu w’obubi athali abisulhwa, mughalha w’erithoghothibwa. 4 Akahakanisaya n’eriyihamya endatha okwa kyosi-kyosi ekikahulhawamo nyamuhanga kutse ekindu ky’eriramya, nuku ikale omwa hekalhu ya Nyamuhanga, eriyikangania embere sy’abandu ng’enyamuhanga. 5 Mbwino simul’ibuka ngoku omughulhu nabya ingakine nenyu, iningababwira emyatsi eyi?
6 Neryo mwamabiriminya ekinemukolha ng’ekikakiryo, nuku asyaminyikalibawa okwa buthuku bwiwe obutholere. 7 Ni kwenene, erikumbo ly’obubi obu linemukolha nalino, aliwe likendi kolha erihika aho oyunemukolha lino ng’ekikakiryo akendi syalhusibirwaho. 8 Kandi kwenene, omubi akendi syabisulhwa, oyo Omukama Yesu akendi syaghunzaho omwa mulimu w’obuno bwiwe n’erimuthoghothya erilhabira omw’iminyikalibwa ly’eribyaho liwe. 9 Aliwe eribyaho ly’omubi liriho erilhabira omwa mikolere ya Sitani haghuma n’obuli mubiiri w’amaaka n’ebiminyikalho by’amabehi n’ebikathikaya 10 n’obuli mathebo awathathunganene busana n’abakaheribawa, kandi eryo iry’erisuyirwa lyabu kundi mubathaligha n’erianza ekwenene nuku banga lhamibwa. 11 Eki ky’ekikaleka Nyamuhanga inialeka ibathebibwa nuku bang’ikirirya amabehi, 12 nuku abosi banga tswerwa kundi mubathikirirya ekwenene aliwe mubatsemera ebithathunganene.
13 Aliwe, thuwithe olhukwamirwa lhw’eriha Nyamuhanga y’ewasingya mughulhu wosi busana nenyu, balikyethu abo Yehova anzire, kundi erilhua okwa nzuko Nyamuhanga mwabasombolha busana n’omulhamu omw’ibayira mwa babuyirire erilhabira omwa mulimu wiwe kandi busana n’inywe erikirirya ekwenene. 14 Mwababirikirira eki erilhabira omwa ngulhu yuwene eya thukathulhughanaya, nuku mwangabana olhukengerwa lhw’Omukama wethu Yesu Kristo. 15 Neryo balikyethu, musike, kandi mulhole embere eryamakirira emirwa eyo mwakangiriribawa, mbulha yabya erilhabira omo mwatsi owabughawa kutse omwa baruha erilhua okw’ithwe. 16 Kandi ambi Omukama wethu Yesu Kristo iyuwene-wene na Nyamuhanga Thatha wethu, oyuwathwanza n’erithuha erihumulikana eryakera na kera n’amaha mabuya erilhabira omwa lhukogho, 17 iniahumulikania emithima yenyu n’eribaghumya omwa buli mikolere mibuya n’ebinywe bibuya.