Ebaruha Okwa Baebrania
10 Kundi Emighambo yiwithe ekitsutsu ky’emyatsi mibuya eyikasa, butsira emyatsi eyo eyonyine-nyine, emighambo* siyanga thoka nahake erihikania abakayithunda hakuhi na Nyamuhanga erilhabira omwa bihongo ibyan’ebyo ebikalholha embere erihebwayo obuli mwaka. 2 Ku yabya iyangana thoka, mbwino ebihongo sibyangabere ibyabirilekwa erihongwa, kundi abakakolha omubiiri owabuyirire ibamabiryeribwa, obunyamuthima-thima bwabo ibukendibya isibukibahandikirira? 3 Mbaghane n’eki, ebihongo ebi ibikabibukaya ebibi byabo obuli mwaka, 4 kundi omusasi w’esyonume n’ow’esyombene syangathoka erilhusyaho ebibi.
5 Neryo omughulhu akasa omwa kihugho, akabugha athi: “‘Muwuthanza ebihongo n’amahere, aliwe muwanyitheghekera omubiri. 6 Muwuthaligha obuhere bw’eryokererya obulhughirirene n’obuhere bw’ebibi.’ 7 Neryo munabugha indi: ‘Lebaya! Namasa (omwa mukunzo* kihandikire okw’ingye) erisyakolha erisonda lyawu, iwe Nyamuhanga.’” 8 Abere abiritsuka eribugha athi: “Muwuthanza kutse eriligha ebihongo n’amahere n’obuhere bw’eryokererya obulhughirirene n’obuhere bw’ebibi”—ebihongo ebikahongawa erikwamana n’Emighambo— 9 neryo mwabugha athi: “Lebaya! Namasa erisyakolha erisonda lyawu.” Akaghunzaho eky’erimbere nuku ahireho ekyakabiri. 10 Erilhabira omwa “erisonda” eri thwabiriyirwamo ababuyirire erilhabira omw’ihonga omubiri wa Yesu Kristo ngendo nguma nyisa isikyendi syathasyabya.
11 Kandi obuli muhereri ak’imana omwa mwanya wiwe obuli kiro erikolha omubiiri owabuyirire* n’erihonga ebihongo ibyan’ebyo mughulhu wosi, ebithe byanga ghunziraho ighuma ebibi. 12 Aliwe omulhume oyu mwahonga ekihongo kighuma busana n’ebibi engendo eyo nyisa isikyendi syathasyabya kandi mw’ikalha oko byalha by’amali ebya Nyamuhanga, 13 eritsuka-tsukana naho amalinda erihika aho esyonzighu siwe sikendi syahirwaho mwa kithumbi ky’ebisando biwe. 14 Erilhabira omwa kihongo kighuma ekyahongawa mwahikania abakayirawamo babuyirire engendo eyo nyisa isikyendi syathasyabya. 15 Kandi, omulimu abuyirire nagho akathuhera obwema, kundi omulimu abere abiribugha athi: 16 “‘Eyi y’endaghane eyo ngendi kolha haghuma nabo enyuma w’ebiro ebyo,’ Yehova athya. ‘Ngendihira ebihano byaghe omwa mithima yabo, n’eribihandika omwa bulengekania bwabo.’” 17 Omulimu mwathasyabugha athi: “Kandi sinendi syathasyibuka ebibi byabo n’emikolere yabo mibi.” 18 Neryo ahali erighanyirwa ebi, hakabya isihakiri obuhere busana n’ekibi.
19 Neryo balikyethu, kundi thuwithe obuthubaha* obw’eryingira ahabuyirire erilhabira omwa musasi wa Yesu, 20 aho athukyungulira* ng’enzira mbyaka kandi eyiriho erilhaba omwa kisukuliryo, nakyo iw’omubiri wiwe, 21 kandi kundi thuwithe omuhereri oyulengireyo oyuk’imanira enyumba ya Nyamuhanga, 22 muyire thuhikire Nyamuhanga n’omuthima owalimo okwenene n’erikirirya erilhughirirene, emithima eyabiryeribwa okwa bunyamuthima-thima bubi n’emibiri yethu iyabiryeribwa omwa maghetse owahenirye. 23 Isithulimo erithika-thika, thumakirire ndeke amaha wethu agho thukathulhughanaya, kundi oyuwalhaghanisayagho ni muyiketherwa. 24 Kandi muyire thutsomanangane* nuku thuhirane mw’omuhwa w’olhwanzo n’erikolha ebyuwene, 25 isithuli lekeranaya erihindana lyethu haghuma, ng’abandi kubawithegho mwa mubere, aliwe thuhimbangane, kandi kwilhaba aho munemulhangira ekiro kikaseghera hakuhi.
26 Thwamabera erikolha ekibi omw’ikighenderera, ithwabirinabana eriminya erihikire ery’ekwenene, sihakiri ekihongo kyosi-kyosi busana n’ebibi, 27 aliwe hane eritswera lirebe erikubahisaya erilindirirwe n’erihithana erikalire erikayathoghothaya abakahakanisaya. 28 Owosi-wosi oyuwabirithwa Emighambo ya Musa akaholha ahathe erimukwira obulighe erisighikira oko bwema bw’abandu babiri kutse basathu. 29 Neryo wukalengekanaya n’isuyira linene bungahi eritholere erisyahebwa omundu oyuwabirilyathangirira Mughalha wa Nyamuhanga kandi oyuwabirilhangira obughuli bw’omusasi w’endaghane nga buyira owamuyiramo mubuyirire, kandi oyuwabirihithania omulimu w’olhukogho omw’ikuthyagho? 30 Kundi thunasi oyuwabugha athi: “Erithuhulya ni lyaghe; ngendi syathuha.” Kandi athi: “Yehova akendi syatswera abandu biwe.” 31 Ni kindu ekikubahisaya eriwa omwa byalha bya Nyamuhanga oyuliho.
32 Aliwe mulhole embere eryibuka ebiro bya kera, ebyo mwayiyinirayamo ebitsibu ebikalire haghuma n’eriaghalhwa, imwamabiribana ekyakakalha. 33 Ihakanayira imwatsumwa n’eryaghalibwa embere sy’abandu,* kandi ihakanayira imwawathikania* n’ababya bawithe ebitsibu ng’ebyo. 34 Mumwalhumirirwa abali omwa ngomo kandi imunatsemire, mumwaligha erinyewa ebindu byenyu imunasi ngoku inywe munayiwithire ekindu ekilengireyo kandi ekya kera na kera.
35 Busana n’ekyo, simuheraye obuthubaha* bwenyu, obukendisyaleka imwahembwa kutsibu. 36 Kundi mukayithagha eriyiyinia, nuku mukendi syabya mwabirikolha erisonda lya Nyamuhanga, imwabana eribererera ly’omulhaghe. 37 Kundi “omwa kathambi kake” “oyukayasa akendi hika kandi syendi sibayo.” 38 “Aliwe omuthunganene waghe akendi syabyaho busana n’erikirirya,” kandi “amasubirira enyuma, isinendi* mutsemera.” 39 Neryo sithuli okw’abo abakasubirira enyuma eriyathoghothibwa, aliwe ithwe thuli okw’abo abawithe erikirirya busana n’erilhamya esyongebe syethu.*