Ebaruha Okwa Baebrania
2 Ky’ekikaleka ithwabya ithutholere erilengekania kutsibu kwilhaba buli kiro oko myatsi eyo thwabiriowa, nuku sithuthale okw’ikirirya. 2 Kundi ekinywe ekyabughawa erilhabira omwa bamalaika kyamabya imukyabya ini kwenene, kandi obuli rilholho n’ebikorwa by’obuthowa byamabya imubyasuyirwa erikwamana n’obulingirirania, 3 ithukendi balha thuthi thwamabya ithwabirighalhaghandya omulhamu mungaha n’oyu? Kundi mukyatsuka eribuwa erilhabira omo Mukama wethu, n’abamwowa bamathukakasiryakyo, 4 na Nyamuhanga mwabayiyungako omw’iha obwema erilhabira omwa biminyikalho n’ebikathikaya n’eby’amaaka muthina-muthina n’omulimu abuyirire inianemughabwa erikwamana n’erisonda liwe.
5 Kundi ekihugho ekikayasa ekya thukakanayako, mwathakihira omwa buthoki bw’abamalaika. 6 Aliwe omwema mulebe mwabugha athi: “Omundu nindi indi wukamw’ibuka, kutse omughalha w’omundu indi wukamutsomana? 7 Muwamusubya ahisi ho hake okwa bamalaika; muwamwambalya olhukengerwa n’erisikya ng’embiitha, kandi muwamuha ehamuli okwa mibiiri y’ebyalha byawu. 8 Muwahira emyatsi yosi ahisi sy’ebisandu biwe.” Omw’ihira emyatsi yosi ahisi siwe, Nyamuhanga mwathasigha n’ekighuma ekyo athahira ahisi siwe. Nomwabine, sithuli thwalhangira emyatsi yosi ahisi siwe. 9 Aliwe thukalhangira Yesu oyuwasubibawa ahisi ho hake okwa bamalaika, iniabiryambalibwa olhukengerwa n’erisikya ng’embiitha busana n’eriaghalhwa erihika okwa lhuholho, nuku erilhabira omwa lhukogho lhwa Nyamuhanga angarozya olhuholho busana n’obuli mundu.
10 Kundi omundu oyo ebindu byosi byabyaho busana nayu kandi erilhabira omw’iyo, omw’iletha abaghalha bangyi okwa lhukengerwa, kyabya kihikire iyo erihikania Omwimaniri Mukulhu w’omulhamu wabo erilhabira omw’aghalhwa. 11 Kundi abakayirawamo babuyirire n’oyukabayiramo babuyirire abosi bakalhua omwa mughuma, kandi busana n’eki syalikikwir’isoni eribahulhamo baghalha babo, 12 ngoku akabugha athi: “Ngendi syathulhughania erina lyawu oko baghalha bethu; omw’ihindana ly’ekithunga ngendi syakupipa omwa syonyimbo.” 13 Kandi athi: “Ngendi muyikethera.” Kandi athi: “Lebaya! Ingye n’abaana balere, abo Yehova amba.”
14 Busana n’ekyo, kundi “abaana balere” ni b’omusasi n’omubiri, nayu kuthya mwabya athya, nuku erilhabira omwa lhuholho lhwiwe angaghunzaho oyuli n’obuthoki bw’eriletha olhuholho, nayu ini Diabolo, 15 kandi angaboholha* abosi abo esyongebe syabo syabya isyabiriboherwa omwa bukobe busana n’eryubaha olhuholho. 16 Omo kwenene, abo akawathikaya sib’abamalaika, aliwe akawathikaya ab’olhubutho* lhwa Abrahamu. 17 Busana n’ekyo, mwabya w’eribya nga “baghalha” babu omwa mibere yosi, nuku angabya muhereri mukulhu ow’obughanyiri kandi omuthaleghulha omo myatsi eyihambire oku Nyamuhanga, nuku angaha obuhere bw’erighonga-ghonga* busana n’ebibi by’abandu. 18 Kundi iyuwene-wene mwaghalhwa omughulhu alengawako, akathoka eriwathikya abakalengawako.