Ebaruha Yakabiri Okwa Banya Tesalonika
3 Erighunzerera, balikyethu, mulhole embere erithusabira, nuku ekinywe kya Yehova kilhole embere erilhandaghana lhuba-lhuba n’erihebwa olhukengerwa, ngoku kyanabiribya okw’inywe, 2 kandi nuku thulhamibawe okwa bandu babi kandi abatsibu, kundi erikirirya si ry’obuli mundu. 3 Aliwe Omukama ni muyiketherwa, kandi akendi baghumya n’eribatheya okwa mubi. 4 Kandi okw’inywe, thuyikethere Omukama ngoku munemughendera okwa busondoli bwethu kandi ngoku mukendi lholha embere eribughenderako. 5 Ambi Omukama inialholha embere erilholerya ndeke emithima yenyu oko lhwanzo lhwa Nyamuhanga n’okw’iyiyinia busana na Kristo.
6 Balikyethu, lino thukabaha obusondoli, omwa lina ly’Omukama wethu Yesu Kristo, thuthi muyihighule okwa buli mulikyethu oyukalendera mahengu-hengu isyali kwama omurwa* ogho inywe* mwahebawa erilhua okw’ithwe. 7 Kundi inywibene-bene munasi ku mutholere imwathugherererya, kundi muthuthalendera mahengu-hengu omwa kathi-kathi kenyu, 8 kutse erirya ebyalya by’omundu wosi-wosi oko bbule. Mbaghane n’ekyo, omw’ikolha kutsibu n’omw’inuba, ithukakolha omwa kiro n’omw’ithungyi nuku sithuhire okwa wosi-wosi w’okw’inywe kw’omuheke owalithohire. 9 Si bugha indi sithuwithe buthoki, aliwe thwabya thwanzire ithwayihayo ng’eky’erileberyako ekyo mwanga gherererya. 10 Kundi nibya omughulhu thwabya nenyu, ithukabaha erihano lino: “Omundu amabya isyanzire erikolha, syatholere akalya.” 11 Kundi thunemwowa ngoku abandi banemulendera mahengu-hengu omo kathi-kathi kenyu, isibali kolha nahake, aliwe ngoku bakayingiraya omwa bithabahambireko. 12 Abandu ng’abo thukabalhaghira n’eribahabulha omo Mukama Yesu Kristo thuthi batholere ibakolha bukuthu n’erirya ebyalya ebyo babirikolera.
13 Aliwe inywe, balikyethu, simulhuhirire erikolha ebibuya. 14 Aliwe owosi-wosi amathendi ghondera ekinywe kyethu erilhabira omwa baruha eyi, mumurambe kandi mulekere aho erikolongana nayu, nuku angahemuka. 15 Nomwabine simumughanze ng’enzighu, aliwe mulhole embere erimukunga nga mulikyenyu.
16 Neryo ambi Omukama w’obuholho iyuwene-wene iniabaha obuholho mughulhu wosi omwa mibere yosi. Ambi Omukama iniabya haghuma nenyu inywe bosi.
17 Eriramukya lyaghe eryo namayihandikira omwa byalha byaghe, ingye Paulo, ly’eryo, nalyo ini kaminyikalho omwa buli baruha; ku ngahandika indya.
18 Olhukogho lhw’Omukama wethu Yesu Kristo lhubye nenyu inywe bosi.