Ebaruha Yakabiri eya Petero
1 Simoni Petero, omughombe kandi omukwenda wa Yesu Kristo, okw’ababiribana erikirirya ery’obughuli ng’eryethu* erilhabira omwa lithunganene lya Nyamuhanga wethu n’Omulhamya Yesu Kristo:
2 Ambi olhukogho n’obuholho ibyongera eribya nenyu erilhabira omw’iminya erihikire erya Nyamuhanga n’erya Yesu Omukama wethu, 3 kundi amaaka wiwe w’obunyamuhanga abirithuha* emyatsi yosi eyikaletha engebe n’eryubaha Nyamuhanga omw’iminya erihikire ery’oyuwathubirikira erilhabira omwa lhukengerwa lhwiwe n’omwa bubuya bwiwe. 4 Erilhabira omw’ebi abirithuha* emilhaghe y’obughuli kandi eyuwene kutsibu nuku erilhabira omw’ebi mwangasangira omwa bunyamuhanga, imwabiribalha okw’ihonda ly’ekihugho erikalhua okwa ngumbu nyibi.*
5 Busana n’enzumwa eyi, muhireho akaghalha kanene eryongera okw’ikirirya lyenyu kw’obubuya, n’okwa bubuya bwenyu kw’eriminya, 6 okw’iminya lyenyu eriyikakirya, okw’iyikakirya lyenyu eriyiyinia, okw’iyiyinia lyenyu eryubaha Nyamuhanga, 7 okw’ubaha Nyamuhanga lyenyu olhwanzo ng’olhw’abasubeneko, okwa lhwanzo lhwenyu ng’olhw’abasubeneko olhwanzo. 8 Kundi emyatsi eyi yamababyamo kandi yikabogha, iyikendi batheya okw’isebebera kutse okw’ithendi hethya bikahika okw’iminya erihikire ery’Omukama wethu Yesu Kristo.
9 Owosi-wosi oyuthawithe ebi ni ndimethime, abiriliba ameso wiwe nuku syalhangire ekyakakalha,* kandi abiribirirwa kw’abiryeribwako ebibi biwe ebya kera. 10 Busana n’ekyo, balikyethu, mwongere eribya n’omuhwa nuku mukakasaye eribirikirwa n’erisombolhwa lyenyu, kundi mwamalholha embere erikolha emyatsi eyi, isimwendi syalemwa nahake. 11 Kundi, omwa nzira eyi mukendi syalighirwa ndeke eryingira omo Bwami bwa kera na kera obw’Omukama wethu kandi Omulhamya Yesu Kristo.
12 Busana n’enzumwa eyi mughulhu wosi nganzire eribibukya emyatsi eyi, nomwakine indi munasiyo kandi munahandire ndeke omwa kwenene eyiri omw’inywe. 13 Aliwe ngalhangira ikihikire, omughulhu ngakine omwa hema* eno, eribibukya omwa bibukyo ebyo, 14 nenyu ng’ingye imunasi ngoku ehema yaghe eno yikisiya iyalhusibwa, ngoku n’Omukama wethu Yesu Kristo akiminyikalhaya okw’ingye. 15 Mughulhu wosi ngendi kolha ngoku nangathoka nuku ngendi syabya nabirighenda, inywibene-bene imwabya imwanganathoka eryibuka* emyatsi eyi.
16 Sibugha indi muthwaghendera oko myatsi y’amabehi ey’eriyitunga-tungira omwa menge thukababwira okwa maaka n’eribyaho ly’Omukama wethu Yesu Kristo, aliwe muthwayilhangirira olhukengerwa lhwiwe. 17 Kundi mwahebwa erisikya n’olhukengerwa erilhua oku Nyamuhanga Thatha omughulhu erilhabira omwa lhukengerwa lhunene abwirawa ebinywe nga bino*: “Oyu ni Mughalha waghe, omwanzwa waghe, oyo ingyuwene-wene ngatsemera.” 18 Ee, ebinywe ebi muthwabyowa bikalhua elhubulha ithune nayu okwa kithwe ekibuyirire.
19 Neryo busana n’ekyo, ekinywe ky’obuminyereri kyabirikakasibwa busana nethu, kandi mukakolha ndeke mukakihulikirira ng’etara eyikakoleraya omwa mwanya awalimo omwirima (erihika aho ekiro kikakera n’aho engununu y’engyakya-ngyakya yikahulhukira) omwa mithima yenyu. 20 Kundi kino munakyasi erimbere okwa byosi, ngoku sihali buminyereri bwa Masako obukalhua omw’isoborera lyosi-lyosi ly’amalengekania w’omundu. 21 Kundi obuminyereri sibuli bwathabyaho omw’isonda ly’omundu, aliwe abandu ibakabugha ebikalhua oku Nyamuhanga bakasukumwa* n’omulimu abuyirire.