Ebaruha Yakabiri Okwa Banya Tesalonika
1 Paulo, Silvano,* na Timoteo, okwa kithunga ky’abanya Tesalonika ekimathikene na Nyamuhanga Thatha wethu n’Omukama Yesu Kristo:
2 Ambi olhukogho n’obuholho erilhua oku Nyamuhanga Thatha n’Omukama Yesu Kristo ibyabya nenyu.
3 Mughulhu wosi thukayowa ini lhukwamirwa lhwethu eriha Nyamuhanga y’ewasingya busana nenyu, balikyethu. Eki kitholere, kundi erikirirya lyenyu linemwongera kutsibu n’olhwanzo olho muwithirene lhunemwongera. 4 Busana n’ekyo, nethu ithwibene-bene thukabayisyethera omwa kathi-kathi k’ebithunga bya Nyamuhanga busana n’eriyiyinia lyenyu n’erikirirya lyenyu omw’endereribwa lyenyu lyosi n’omwa bitsibu* ebya munemwaghalhwamo.* 5 Obu ni bwema bw’eritswera lya Nyamuhanga erithunganene, erikabakolhaya okw’ighanzwa ng’abatholere Obwami bwa Nyamuhanga, kwenene obukaleka imwaghalhwa.
6 Omw’eki kwenene oku Nyamuhanga kihikire iyo erithuhulya abakabaghalhaya omw’ibaghalya. 7 Aliwe inywe abakaghalhawa, mukendi syahebwa erilhuhuka haghuma nethu okw’ibisulhwa ly’Omukama Yesu akalhua elhubulha iniane n’abamalaika biwe ab’amaaka 8 omwa muliro owakaghulhumirira, akasyasuyira abathasi Nyamuhanga n’abathaghendera okwa ngulhu yuwene eyihambire oko Mukama wethu Yesu. 9 Aba bakendi syatswerwa olhw’erithoghothibwa kera na kera embere sy’Omukama n’erilhua okwa lhukengerwa lhw’akaghalha kiwe, 10 omughulhu akendi syasa erisyahebwa olhukengerwa erikwamana n’ababuyirire biwe n’erileka abosi abakanganaya erikirirya ibasweka busana nayu okwa kiro ekyo, kundi obwema obwa thwaha mubweya imunawithe erikirirya.
11 Busana n’ekyo, mughulhu wosi thukabasabira, thuthi ambi Nyamuhanga wethu iniabaghanza ng’abatholere eribirikira liwe kandi omwa buthoki bwiwe mukolere ighuma ebibuya byosi ebikamutsemesaya n’obuli mubiiri w’erikirirya. 12 Eki kiri kithya nuku erina ly’Omukama wethu Yesu lyanga hebwa olhukengerwa omw’inywe, nenyu imwamathikana nayu, erikwamana n’olhukogho lhwa Nyamuhanga wethu n’olhw’Omukama Yesu Kristo.