Okwa Banya Roma
6 Neryo thwangabugha thuthiki? Mbwino thutholere ithwalholha embere erikolha ekibi nuku olhukogho lhwang’ongera? 2 Eyihi nahake! Kundi muthwaholha okwa kibi, thwangalholha thuthi embere eribyaho omwa kibi? 3 Kutse si mwasi ngoku ithwe bosi ababatizibawa omu Kristo Yesu muthwabatizibwa omo lhuholho lhwiwe? 4 Neryo muthwatsikwa haghuma nayu omo lhuholho lhwiwe erilhabira omo lhubatizo lhwethu, nuku ngoku Kristo analhubukibawa okwa baholi erilhabira omwa lhukengerwa lhwa Thatha, nethu thutholere ithwalendera omwa ngebe mbyaka. 5 Thwamabya ithwabiribya bughuma nayu omwa kisosekanio ky’olhuholho lhwiwe, ahathe erithika-thika kandi thukendi syabya bughuma nayu omwa kisosekanio ky’erilhubuka liwe. 6 Kundi thunasi ngoku omundu wethu wa kera mw’akongomererwa okwa muthi haghuma nayu nuku emibiri yethu y’ekibi siyibye n’amaaka nuku sithulhole embere ithune bakobe b’ekibi. 7 Kundi oyuwabiriholha abirilhusibwa* kw’ekibi kiwe.
8 Kandi thwamabya ithwabiriholha haghuma na Kristo, thwikirirye ngoku kandi thukendi syabyaho nayu. 9 Kundi thunasi ngoku Kristo, lino eribya iniabirilhubukibwa okwa baholi, syanga thasyaholha; olhuholho silhukimuwitheko amaaka. 10 Kundi olhuholho olho aholha, mwaholha okwa kibi* engendo eyo nyisa isikyendi syathasyabya, aliwe engebe eyo awithe, aliho oku Nyamuhanga. 11 Kuthya nenyu, muyighanze ng’abaholha okwa kibi aliwe abaliho oku Nyamuhanga erilhabira omu Kristo Yesu.
12 Busana n’ekyo, simuleke ekibi kikalholha embere erithabalha ng’omwami omwa mibiri yenyu eyikahonda nuku mwangaghondera esyongumbu syayo. 13 Kutse simulhole embere eriha emibiri* yenyu okwa kibi ng’ebirwanisyo by’ebithathunganene, aliwe muyiheyo oku Nyamuhanga ng’ababirilhubukibwa okwa baholi, n’emibiri* yenyu oku Nyamuhanga ng’ebirwanisyo by’ebithunganene. 14 Kundi ekibi sikitholere kikabathabalhako, kundi simuli ahisi sy’emighambo aliwe ahisi sy’olhukogho.
15 Ni kyahi ekikakwamako? Thunatholere ithwakolha ekibi kundi si thuli ahisi sy’emighambo aliwe ahisi sy’olhukogho? Eyihi nahake! 16 Mbwino simwasi ngoku mwamayihayo oko wosi-wosi ng’abakobe abowa, mukabya bakobe b’oyo mukowa, mbulha ab’ekibi ekikakolhaya okwa lhuholho kutse ab’obwowa obukakolhaya okwa lithunganene? 17 Aliwe ewasingya oku Nyamuhanga kundi nomumwanabya bakobe b’ekibi, erilhua okwa muthima mumwabya bowa omw’ighendera okw’ikangirirya eryo mwahebawa. 18 Ee, kundi mumwayirwa bwiranda okwa kibi, mumwabya bakobe b’erithunganene. 19 Ngabugha omwa binywe by’abandu busana n’erilemererwa ly’emibiri yenyu; kundi ngoku mwahayo ebitsuko byenyu ng’abakobe b’ebithisirire n’ebibi ebikakolhaya okwa bubi, neryo lino muheyo ebitsuko byenyu ng’abakobe b’erithunganene erikakolhaya okwa bubuyirire. 20 Kundi omughulhu mwabya bakobe b’ekibi, mwabya bwiranda okwa lithunganene.
21 Neryo kwesi, ni bighuma byahi ebyo mwabya mukahethya okwa buthuku obo? Emyatsi eyo lino mukakwira esisoni. Kundi enduli y’emyatsi eyo ni lhuholho. 22 Aliwe kundi lino mwabiriyirwa bwiranda okwa kibi n’eribya bakobe ba Nyamuhanga, munemuhethya ebighuma byenyu omwa nzira y’obubuyirire, n’enduli ni ngebe y’erikotha. 23 Obuhingyi bw’ekibi ni lhuholho, aliwe ekihembo ekyo Nyamuhanga akaha ni ngebe y’erikotha erilhabira omu Kristo Yesu Omukama wethu.