Ebaruha y’Erimbere Okwa Banya Korinto
6 Mbwino owosi-wosi omw’inywe oyuwithe olhubanza oko wundi akanaghenda omwa koti embere sy’abandu abathathunganene, butsira embere sy’ababuyirire? 2 Kutse simwasi ngoku ababuyirire bakendi syatswera ekihugho? Mwamabya imukendi syatswera ekihugo, mbwino simwanga thoka erighunzaho emyatsi mike-mike? 3 Simwasi ku thukendi syatswera abamalaika? Neryo busana naki ithuthatswera emyatsi y’engebe eno? 4 Neryo mwamabya imunawithe emyatsi y’engebe eno ey’eritswera, mbwino mukaghenda okwa balhume abo ekithunga kiponire muthi bo babye batsweri benyu? 5 Ngabugha nuku muhemuke. Mbwino omwa kathi-kathi kenyu simuli omulhume w’amenge oyuwanga thoka eritswera balikyabo? 6 Omwakanya k’ekyo, mulikyethu akathwalha mulikyabo y’omwa koti, embere sy’abathikirirye nibya!
7 Omo kwenene, mukabya imwabirilemwa mwamathwalhana omwa koti. Busana naki imuthaligha erikolhwa nabi? Busana naki imuthaligha erinyewa? 8 Omwakanya k’ekyo, kandi ibbwa balikyenyu bo mukakolha nabi n’erinyegha!
9 Kutse simwasi ngoku abathathunganene sibendi syasighalya Obwami bwa Nyamuhanga? Simuthebibawe. Abakakolha eby’obutswatswa,* abakaramaya esyosanamu, ab’amaraghane, abalhume abakasighika eby’abalhume erikolhanako emyatsi y’engyingo, abalhume abakakolhanako emyatsi y’engyingo, 10 abibi, ab’omururu, abathamiri, abatsumi, n’abanyeyi sibendi syasighalya Obwami bwa Nyamuhanga. 11 Aliwe, abaghuma b’okw’inywe ku banabya bathya. Aliwe mwabiryeribwa; mwabiriyirwa mo babuyirire; mwabiriyirwa mo bathunganene omwa lina ly’Omukama Yesu Kristo n’omwa mulimu wa Nyamuhanga wethu.
12 Okw’ingye ebindu byosi bikalighawa, aliwe si bugha indi ebyosi bikaghasa. Okw’ingye ebindu byosi bikalighawa, aliwe sinendi ligha ekindu kyosi-kyosi kikanyithegheka.* 13 Ebyalya ni by’eribunda n’eribunda liriho busana n’ebyalya, aliwe Nyamuhanga akendi syathoghothya ebyosi. Omubiri sy’aliho busana n’eby’obutswatswa* aliwe busana n’Omukama, n’Omukama busana n’omubiri. 14 Aliwe Nyamuhanga mwalhubukya Omukama, kandi nethu akendi syathulhubukya erilhua omwa lhuholho omwa buthoki bwiwe.
15 Mbwino simwasi ngoku emibiri yenyu ni bitsuko bya Kristo? Neryo mbwino, ngathwale ebitsuko bya Kristo ngabimathanaye n’omumalaya? Eyihi nahake! 16 Simwasi ngoku owosi-wosi oyumathanibwe n’omumalaya akabya mubiri mughuma nayu? Kundi akabugha athi “ababiri basyabya mubiri mughuma.” 17 Aliwe oyumathanibwe n’Omukama y’oyuli haghuma nayu omwa mulimu. 18 Muthibithe musaghe eby’obutswatswa!* Ekindi kibi kyosi-kyosi eky’omundu angakolha kiri eyihya sy’omubiri wiwe, aliwe oyukabera erisingira akahalhaya oko mubiri wiwe. 19 Simwasi ngoku omubiri wenyu ni hekalhu y’omulimu abuyirire owali omw’inywe, ogho Nyamuhanga abaha? Kandi muli babene, 20 kundi mwaghulhawa omwa bughuli bunene. Mulhangire muthi mukaha Nyamuhanga y’olhukengerwa omwa mubiri wenyu.