Okwa Banya Roma
3 Neryo eribya Muyuda kiwithe mughasoki, kutse eribanibwa liwithe mughasoki? 2 Hali endundi nene omo myatsi yosi. Eky’erimbere kiri kithi, mubahebwa ebinywe bibuyirire bya Nyamuhanga. 3 Neryo thubughe thuthiki? Abandi bamabya imubathikirirya, mbwino erithend’ikirirya lyabo likendi ghunzaho obuthaleghulha bwa Nyamuhanga? 4 Eyihi nahake! Aliwe muleke Nyamuhanga aminyikale ku ni w’okwenene, obuli mundu nomwanga minyikalha ku ni mubehi, ngoku kihandikire kithi: “Wangaminyikalha ku wuthunganene omo binywe byawu kandi iwasinga omughulhu wukatswerawa.” 5 Aliwe obuthathunganene bwethu bwamakangania erithunganene lya Nyamuhanga, ithukendi bugha thuthiki? Mbwino Nyamuhanga akakanganaya obuthe bulingirirania akakangania erihithana liwe? (Ngakanaya omwa binywe by’abandu.) 6 Eyihi nahake! Neryo kwesi, Nyamuhanga akendi syatswera athi ekihugho?
7 Aliwe ibbwa amabehi waghe amabya iniakaleka ekwenene ya Nyamuhanga iyongera erilhangirika kandi iniahebwa olhukengerwa, busana naki ingathasyatswerwa ng’omukolha-nabi? 8 Neryo busana naki ithuthabugha, ng’abandi bandu ku bakabugha amabehi bathi thukabugha thuthi, “Muleke thukole ebithuwene nuku ebyuwene byangasa”? Eritswerwa ly’abandu abo liseghemere okwa bulingirirania.
9 Neryo thubughe thuthiki? Mbwino thulengire abandi? Eyihi nahake! Kundi ngoku thwabirikangania, Abayuda kuthya n’Abagiriki abosi bali ahisi sy’ekibi; 10 ngoku kihandikire kithi: “Sihali omundu oyuthunganene, nibya n’omughuma; 11 sihali n’oyuwithe amenge wosi-wosi; sihali n’oyukasondekanaya Nyamuhanga. 12 Abandu abosi babirighenda lhuhandi, abosi babiribya isibawithe mughaso; sihali n’omughuma oyukakanganaya olhukeri, nomwangabya mughuma.” 13 “Emimeru yabu ni yisinda eyikyungukere; babiribugha amabehi omwa lhulimi lhwabo.” “Obutwa bw’esyonzoka buli omo minywe yabo.” 14 “N’obuno bwabu buswire mw’eritsuma n’obukalihe.” 15 “Ebisandu byabo byanguhire okw’utha omusasi.” 16 “Erithoghothya n’amalighe biri omwa syonzira syabo, 17 kandi sibathaminya enzira y’obuholho.” 18 “Omo meso wabo simuli eryubaha Nyamuhanga.”
19 Lino thunasi ngoku emyatsi yosi eyo Emighambo yikabugha, yikakanaya okwa bali ahisi sy’Emighambo, nuku obuli buno bwanga hunibwa n’ekihugho kyosi kyangabyako omusango w’erisuyirwa na Nyamuhanga. 20 Busana n’ekyo, sihali n’omughuma oyukendi syahulhwamo muthunganene embere siwe busana n’ebikorwa by’emighambo, kundi emighambo yikakolhaya okw’iminya erihikire ery’ekibi.
21 Aliwe lino, mbaghane n’emighambo, erithunganene lya Nyamuhanga lyabiribisulhwa, ngoku Emighambo n’Abaminyereri bakaha obwema, 22 ee, erithunganene lya Nyamuhanga erilhabira omw’ikirirya Yesu Kristo, okwa bosi abawithe erikirirya. Kundi omw’ibo sihali mbaghane. 23 Kundi abosi babirihalya kandi sibali hika okwa lhukengerwa lhwa Nyamuhanga, 24 kandi kiri ng’ekihembo ekikahebawa ahathe eriliha ibo eryahulhwamo bathunganene busana n’olhukogho lhwiwe erilhabira omw’iboholhwa omwa ndongolya eyathuhawa na Kristo Yesu. 25 Nyamuhanga mwamuhayo ng’obuhere obw’erithusangania* nayo erilhabira omw’ikirirya omwa musasi wiwe. Eki kyabya erikangania erithunganene liwe, kundi Nyamuhanga omw’iyiyinia* liwe abya iniali okw’ighanyira ebibi ebyabya kera. 26 Eki kyabya erikangania erithunganene liwe omwa mughulhu ono, nuku angabya muthunganene nibya n’omughulhu akaghanza omundu oyukakanganaya erikirirya omu Yesu mwa muthunganene.
27 Neryo eriyihalhamba liri hayi? Siriwithe mwanya. Erilhabira omwa mughambo wahi? Ow’emikolere? Eyihi nahake, aliwe erilhabira omwa mughambo w’erikirirya. 28 Kundi thukabugha thuthi omundu akahulhawamo muthunganene busana n’erikirirya butsira busana n’ebikorwa by’emighambo. 29 Kutse mbwino ni Nyamuhanga w’Abayuda basa? Mbwino kandi si Nyamuhanga w’abandu b’ebihanda? Ee, kandi ni w’abandu b’ebihanda. 30 Kundi Nyamuhanga ni mughuma, akendyahulha abandu ababanibwe mw’abathunganene busana n’erikirirya n’abandu abathabanibwe mwa bathunganene erilhabira omw’ikirirya lyabo. 31 Neryo mbwino thukaghunzaho emighambo erilhabira omw’ikirirya lyethu? Eyihi nahake! Mbaghane n’ekyo, thukasighika emighambo.