Okwa Banya Roma
15 Neryo, ithwe thuwithe akaghalha thutholere ithwaheka obutseke bw’abathawithe akaghalha, sithuyitsemesaye ithwibene. 2 Obuli mughuma w’okw’ithwe atsemesaye omuliranwa wiwe busana n’erimughasira, erimuhimba. 3 Kundi nibya na Kristo mwathayitsemesya iyuwene, aliwe ngoku kihandikire kithi: “Ebitsumi by’abakakutsuma byabiribya okw’ingye.” 4 Kundi ebyosi ebyahandikawa kera byahandikawa busana n’erithukangirirya, nuku thwangabya n’amaha erilhabira omw’iyiyinia lyethu n’omw’ihumulikanibwa erikalhua omwa Masako. 5 Neryo ambi Nyamuhanga oyukaha eriyiyinia n’erithuhumulikania iniabalighira eribya n’amalengekania awali ng’agho Kristo Yesu aby’awithe, 6 nuku omwa bughuma, omwa mulenge* mughuma mwangaha Nyamuhanga kandi Thatha w’Omukama wethu Yesu Kristo y’olhukengerwa.
7 Neryo mukokanaye, ngoku Kristo nayu abakokaya, nuku Nyamuhanga ahebawe olhukengerwa. 8 Kundi ngababwira ngoku Kristo mwabya mughombe w’ababanibwe busana n’okwenene kwa Nyamuhanga, nuku aghumaye ndeke emilhaghe eyo Nyamuhanga alhagha abathatha-kulhu babu, 9 kandi nuku ebihanda byangaha Nyamuhanga y’olhukengerwa busana n’obughanyiri bwiwe. Ngoku kihandikire kithi: “Ky’ekikendi syaleka ingakuligha ahathe eribisirira omwa kathi-kathi k’ebihanda, kandi erina lyawu ngendisyalipipa omw’imba.” 10 Kandi akathasyabugha athi: “Mutseme, inywe bihanda, haghuma n’abandu biwe.” 11 Kandi athi: “Mupipe Yehova, inywe bihanda byosi, kandi muleke abandu abosi bamupipe.” 12 Na Isaya akathasyabugha athi: “Hakendi syabya omulihi wa Yese, oyukahangana erithabalha ebihanda; ebihanda bikendi syamuhiramo amaha wabyo.” 13 Ambi Nyamuhanga oyukaha amaha iniabusulya* mw’etseme yosi n’obuholho omw’imuyikethera, nuku mwang’osulhamo amaha n’amaaka w’omulimu abuyirire.
14 Neryo balikyethu, ngakakasirye, ngoku nenyu mw’oswire mw’obubuya, mw’oswire mw’eriminya eryosi, kandi ngoku mukathoka erihabulhana.* 15 Aliwe nabiribahandikira ahathe eribisirira busana n’esyonzumwa ndebe, nuku ngabahe ekindi kibukyo, busana n’olhukogho olho nahebawa erilhua oku Nyamuhanga 16 nuku ngabye mughombe wa Kristo okwa bihanda. Nganemusangira omwa mubiiri owabuyirire ow’engulhu yuwene ya Nyamuhanga, nuku ebihanda ebi byangabya buhere obukalighawa, obubuyirire erilhabira omwa mulimu abuyirire.
17 Neryo ngawithe enzumwa eyangaleka ingayihalhamba omu Kristo Yesu busana n’emyatsi eyihambire oku Nyamuhanga. 18 Kundi sinendibugha ekyosi-kyosi omw’iteberezya kwihaho ekya Kristo abirikolha erilhabira omw’ingye nuku ebihanda byangabya byowa, erilhabira omwa binywe n’emikolere yaghe, 19 omwa maaka w’ebiminyikalho n’ebikathikaya, omwa maaka w’omulimu wa Nyamuhanga, nuku erilhua e Yerusalemu n’omwa muthimbo wosi erihika ne Iliriko nabirithulhughania ndeke engulhu yuwene eyihambire oku Kristo. 20 Omwa mibere eyi, munakolha mwa kilhubirirwa kyaghe erithendi thulhughania engulhu yuwene eyo erina lya Kristo lyabya iryabiriminyikalibwa, nuku singahimbe okwa musingyi w’owundi mundu; 21 aliwe ngoku kihandikire kithi: “Abathabana omwatsi owamuhambireko bakendi syalhangira, n’abathe bathowa bakendi syayitheghererya.”
22 Kandi eki ky’ekyaleka mirundi mingyi inalemwa eryasa eyo muli. 23 Aliwe lino singakiwithe obulhambu obuthe bwahikwamo omwa bitsweka ebi, kandi ahabw’emyaka mingyi* nabirikandira eryasa eyo muli. 24 Busana n’ekyo, ngendibya ingaya e Spania, ngawithe amaha indi ngendi balholhako, neryo imwanyitsindika enyuma w’eribya nenyu ahabw’akathuku. 25 Aliwe lino ngakisiya ingaya e Yerusalemu eriyaherezya ababuyirire. 26 Kundi abali e Makedonia ne Akaya babiritsemera eriha abanakwa abali omwa kathi-kathi k’ababuyirire e Yerusalemu b’okwa bindu byabo. 27 Kwenene, babiritsemera erikolha ekyo, kandi kwenene babya mw’eribanza lyabo; kundi ab’ebihanda bamabya ibabirighasirwa omo myatsi yabo y’obunyakirimu, nabo ibali mw’eribanza ly’eribaha okwa bindu byabo by’ekinyamubiri. 28 Neryo ngendibya nabirighunza eki n’erihikya buholho ebiryahebawayo* okwa babuyirire, ngendi syabahikako ingaghenda e Spania. 29 Kandi nganasi ngoku ngendibya ingasa eyo muli, ngendyasa n’emighisa eyitsoghire erilhua oku Kristo.
30 Lino ngabalemba-lemba balikyethu, erilhabira omo Mukama wethu Yesu Kristo n’erilhabira omo lhwanzo lhw’omulimu, indi muyitsinge haghuma naghe omw’isaba Nyamuhanga busana naghe, 31 ngathoke erilhamibwa okwa bathikirirye abali e Yudea n’erithulira lyaghe busana ne Yerusalemu lyangaliwa n’ababuyirire, 32 nuku busana n’erisonda lya Nyamuhanga ngase eyo muli inganatsemire kandi thuhumulikananganaye. 33 Ambi Nyamuhanga oyukaha obuholho iniabya haghuma nenyu inywe bosi. Amina.