Ebaruha Okwa Baebrania
4 Busana n’ekyo, kundi omulhaghe w’eryingira omw’ilhuhuka liwe akasighalha inianeho, thubye ithunatheghirye* nuku sihabye n’omughuma omw’inywe oyukalhangirika nga syatholeregho. 2 Nethu thwabwirawa engulhu yuwene, nabo ngoku banabwirawayo; aliwe ekinywe ekyo bowa mukithabaghasira, kundi omw’ikirirya sibabya bughuma n’abahulikirira. 3 Kundi ithwe ababirikangania erikirirya thuk’ingira omw’ilhuhuka, ngoku abiribugha athi: “Neryo munalhahirya omw’ihithana lyaghe, ‘Sibendi syingira omw’ilhuhuka lyaghe,’” nomwakine indi emibiiri yiwe muyahwa okw’itsuka ly’ekihugho. 4 Kundi hane aho akabugha okwa kiro ky’omusanju athi: “Neryo Nyamuhanga mwalhuhuka okwa mibiiri yiwe yosi okwa kiro ky’omusanju,” 5 na hano akathasyabugha athi: “Sibendi syingira omw’ilhuhuka lyaghe.”
6 Busana n’ekyo, eribya erilhuhuka irikasighalha irineho nuku abandi bingire mulyo, n’eribya abatsuka eribwirwa engulhu yuwene imubathingiramo busana n’obuthowa, 7 akathasyahiraho ekiro kirebe ihamabirilhaba buthuku buuli, omw’isuba omwa biri omwa lhwimbo lhwa Dawudi athi, “Munabwire”; ngoku kinabughirwe ahighulhu kithi, “Munabwire mwamahulikirira omulenge wiwe, isimwakalhaya emithima yenyu.” 8 Kundi Yosuha kwabya imwabakolya omo mwanya w’erilhuhuka, Nyamuhanga syangathasyakanirye okwa kindi kiro. 9 Neryo hakasighalha ihane erilhuhuka ly’esabato busana n’abandu ba Nyamuhanga. 10 Kundi omundu oyuwabiryingira omw’ilhuhuka lya Nyamuhanga akalhuhuka n’okwa mibiiri yiwe, ngoku Nyamuhanga alhuhuka okwa yiwe.
11 Busana n’ekyo, thulengeho kutsibu eryingira omw’ilhuhuka eryo, nuku sihabye oyukawa n’erikwama omubere wabo w’obuthowa. 12 Kundi ekinywe kya Nyamuhanga kiriho kandi kiwithe amaaka kandi kithwire kwilhaba omuyali ow’amoya abiri kandi kikatsimitha nibya n’erihika okw’ighaba engebe n’ekirimu,* n’esyonungu okwa mungoso, kandi kikathoka eriminya amalengekania n’ebilhubirirwa by’omuthima. 13 Kandi sihali ekihangikwa ekibisamire okw’iyo, aliwe ebindu byosi bibisukere kandi bilhangirikire ndeke-ndeke omo meso w’oyo thutholere ithwalhuthonda embere siwe.
14 Busana n’ekyo, kundi thuwithe omuhereri mukulhu-kulhu oyuw’ingira omwa lhubulha, Yesu Omughalha wa Nyamuhanga, thulhole embere erimuthulhughania. 15 Kundi omuhereri mukulhu oyo thuwithe siy’oyuthe wangathukwira obulighe omwa butseke bwethu, aliwe thuwithe oyuwabirilengesibwa omwa nzira syosi ng’ithwe, aliwe isyawithe kibi. 16 Neryo, thuhike okwa kithumbi ky’obwami eky’olhukogho ithunawithe obwiranda bw’erikania, nuku thwanga kanganibwa obughanyiri n’olhukogho ebyanga thuwathikya okwa buthuku obutholere.