Ebaruha Okwa Banya Galatia
1 Paulo, omukwenda, oyuthasombolhawa n’abandu kutse erilhabira omwa mundu, aliwe erilhabira omu Yesu Kristo na Nyamuhanga Thatha, oyuwamulhubukaya okwa baholi, 2 n’abalikyethu abosi abali haghuma naghe, okwa bithunga bye Galatia:
3 Olhukogho n’obuholho erilhua oku Nyamuhanga Thatha wethu n’Omukama Yesu Kristo bibye nenyu. 4 Mwayihayo busana n’ebibi byethu nuku angathusabulha okwa mughulhu mubi ono erikwamana n’erisonda lya Nyamuhanga wethu kandi Thatha, 5 oyutholere erihebwa olhukengerwa kera na kera. Amina.
6 Ngaswekire ku mukalhuaho imwalhua* oko yuwababirikira erilhabira omwa lhukogho lhwa Kristo imwasuba okwa wundi mulingo w’engulhu yuwene. 7 Si bugha indi hali eyindi ngulhu yuwene; aliwe hali abandu balebe abakabatabura n’erianza erihengemya engulhu yuwene eyihambire oku Kristo. 8 Aliwe, mbulha ithwe kutse omumalaika erilhua elhubulha amababwira omwatsi mulebe ng’engulhu yuwene ow’ahukene n’engulhu yuwene eyo thwababwira, ambi iniathakirwa. 9 Ngoku thwanabiribugha, ngathasyabugha, Owosi-wosi oyukababwira omwatsi mulebe ng’engulhu yuwene ow’ahukene n’eyo mwaligha, ambi iniathakirwa.
10 Mbwino ngalengaho erisona-sona abandu kutse Nyamuhanga? Kutse mbwino ngali okw’itsemesya abandu? Namabya ingakinatsemesaya abandu, isingali mughombe wa Kristo. 11 Balikyethu, nganzire imwaminya ngoku engulhu yuwene eyo nababwira siyirilhua okwa bandu; 12 kundi sinahebawayo erilhua oko mundu kutse erikangiriribwayo, aliwe lyabya ibisulirwa erilhua oku Yesu Kristo.
13 Ni kwenene, mumwowa okwa mibere yaghe eya kera ingane omwa Kiyuda, ngoku nabya ingendererya kutsibu* ekithunga kya Nyamuhanga n’erikinubya; 14 kandi munakulha-kulhana kutsibu omwa Kiyuda kwilhaba abandi bangyi ab’emyaka yaghe omwa kihanda kyethu, kundi nabya ngawithire emirwa y’abathatha waghe y’omuhwa munene. 15 Aliwe omughulhu Nyamuhanga, oyuwanyighabulha omo nda ya mama waghe n’erinyibirikira erilhabira omwa lhukogho lhwiwe, alhangira ikitholere 16 eribisulha Mughalha wiwe erilhabira omw’ingye nuku nangabwira ab’ebihanda b’engulhu yuwene eyimuhambireko, endambi eyo mundayihanuzya oko mundu* wosi-wosi; 17 kutse mundahethukira e Yerusalemu okwa batsuka eribya bakwenda okw’ingye, aliwe munaghenda e Arabia, n’enyuma waho namasuba e Damasiki.
18 Neryo enyuma w’emyaka isathu munahethukira e Yerusalemu eribungira Kefa,* munabya nayu habw’ebiro 15. 19 Mundalholha oko bandi bakwenda, aliwe oku Yakobo musa mughalha wobu Mukama. 20 Neryo erikwamana n’emyatsi eya ngabahandikira, ngabakakasaya embere sya Nyamuhanga ngoku sindiyitheba.
21 Enyuma waho munaghenda omwa bitsweka bye Suria ne Kilikia. 22 Aliwe sinabya ngasibwe omwa bithunga bye Yudea ebyabya bimathikene na Kristo. 23 Ibakabera eriowa bino: “Omulhume oyuwabya akathwendererya kera hathya akathulhughanaya engulhu yuwene eyihambire okw’ikirirya eryo aby’akanubya.” 24 Neryo mubatsuka eriha Nyamuhanga y’olhukengerwa busana naghe.