Emibiiri y’Abakwenda
14 Neryo e Ikonio, mubingira haghuma omwa sinagogi y’Abayuda n’erikania omwa nzira eyaleka Abayuda n’Abagiriki bangyi ibikirirya. 2 Aliwe Abayuda abathikiriraya mubahongererya abandu b’ebihanda n’eribahira mw’amalengekania awathuwene aw’eripona balikyethu. 3 Neryo mubaghunza ndambi nene ibanemukania buthubaha busana n’ehamuli ya Yehova, oyuwaha obwema obuhambire okwa kinywe kiwe eky’olhukogho omw’ilighira ebiminyikalho n’ebikathikaya erikolhwa erilhabira omw’ibo. 4 Aliwe abangyi omwa tawuni mubaghabulhana; abandi mubabya okwa lhuhandi lhw’Abayuda n’abandi okwa lhw’abakwenda. 5 Ab’ebihanda n’Abayuda haghuma n’abathabali babo babere banza eribakolha nabi n’eribitha omwa mabwe, 6 mubabwirwa kukyo, neryo mubathibitha omwa tawuni eye Likaonia, Listra ne Derbe, n’omo kihugho ekibathimbireko. 7 Eyo mubalholha embere erithulhughania engulhu yuwene.
8 Neryo e Listra yabya omulhume inian’ikere, ebisandu biwe ibilehemire. Abuthawa ini mulema kandi isyali athalyatha. 9 Omulhume oyu abya inianemuhulikirira Paulo akakania. Paulo abere amuthungerera n’erilhangira kw’awithe erikirirya eryanga mulhamya, 10 mwabugha omwa mulenge muuli athi: “Hangana.” Neryo omulhume mwahangana n’eritsuka erilyatha. 11 Neryo abandu babere balhangira ekya Paulo amakolha, mubabirikira omwa mulenge munene omwa mubughe w’Olhulikaonia bathi: “Esyonyamuhanga syabiribya ng’abandu kandi syabirithwandaghalirako!” 12 Neryo mubatsuka eryahulha Baranaba mwa Zeu, aliwe Paulo mwa Herme, kundi yuwabya akakania. 13 Neryo omuhereri wa Zeu, oyo ehekalhu yiwe yabya okwa bwingiriro bw’etawuni, mwaletha okwa syongyo kw’esyonume sy’esyonde n’esyombiitha esikolirwe omwa bikoma n’ebimole, kandi mwanza eriha obuhere iniane n’abandu bangyi.
14 Aliwe abakwenda ya Baranaba na Paulo babere bowa eki, mubasathangya esyongyimba syabo n’eriyighusa omwa bandu ibanemubirikira bathi: 15 “Balhume, busana naki imwakolha emyatsi eyi? Nethu thuli bandu abawithe erilemererwa ng’inywe. Kandi thukababwira engulhu yuwene, nuku mulhue okwa myatsi eyithuwene eyi musube oku Nyamuhanga oyuliho, oyuwahangika olhubulha n’ekihugho n’engetse n’ebyosi ebirimo. 16 Omwa syondengo syakera mwalighira ebihanda byosi erikwama esyonzira syabyo, 17 aliwe mwathayileka butsira bwema eribya imwakolha ebibuya, eribaha embulha erilhua elhubulha n’ebirimo ebikeraya, ebyalya ebyanga bughuthya n’eryusulya emithima yenyu mw’obutseme.” 18 Aliwe nomubanabugha ebi, mubathathoka erikakirya abandu eribaherera obuhere.
19 Aliwe Abayuda mubahika bakalhua e Antiokia ne Ikonio, bamahongererya abandu, neryo bamaswirya Paulo y’omwa mabwe n’erimukurira eyihya w’etawuni, ibakalengekanaya bathi abiriholha. 20 Aliwe abigha babere bamuthimbako, mwahangana am’ingira omwa tawuni. Engyakya, iyo na Baranaba mubaghenda e Derbe. 21 Babere babirithulhughania engulhu yuwene n’eriyira abigha balebe omwa tawuni eyo, mubasuba e Listra, Ikonio, ne Antiokia. 22 Eyo mubaghumya abigha, bamabahira mw’omuhwa w’eribya ibane omw’ikirirya n’eribabwira bathi: “Thutholere ithwingira omo Bwami bwa Nyamuhanga ithwabirilhaba omo malighe mangyi.” 23 Kandi mubabasombolera abasyakulhu omwa buli kithunga, erisaba n’erisiba, n’eribahayo oku Yehova, oyo babya ibabir’ikirirya.
24 Neryo mubalhaba e Pisidia bamahika e Pamfilia, 25 kandi babere babirithulhughania ekinywe e Perga, mubandaghalira e Atalia. 26 Mubalhua eyo bamasokera e Antiokia, eyo babya ibabirihebwa olhukogho lhwa Nyamuhanga busana n’omubiiri ogho babya ibamabirighunza.
27 Babere babirihikayo kandi babirihindania ekithunga kya haghuma, mubababwira emyatsi mingyi eyo Nyamuhanga abya iniabirikolha erilhabira omw’ibo, kandi ngoku abirikyungulira ab’ebihanda b’olhuyi olhukakolhaya okw’ikirirya. 28 Neryo mubabya ibane n’abigha ahabw’endambi nene.