Emibiiri y’Abakwenda
1 Iwe Teofilo, omwatsi w’erimbere ogho nahandika owahambire okwa myatsi yosi eya Yesu atsuka erikolha n’erikangirirya 2 erihika okwa kiro athwalhawa endatha, enyuma w’eriha abakwenda abo asombolha b’obusondoli erilhabira omwa mulimu abuyirire. 3 Abere abiriaghalhwa, mwayikangania okw’ibo erilhabira omwa nzira nyingyi esikabakakasaya kw’abirisuba. Mubamulholhako habw’ebiro 40, kandi mwabya akakania oko Bwami bwa Nyamuhanga. 4 Abere anemuhindana nabo, mwabalhaghira athi: “Isimwalhua e Yerusalemu, aliwe mulhole embere erilinda ekya Thatha abirilhagha, ekyo nababwirako; 5 kundi kwenene Yohana mwabatizya omwa maghetse, aliwe hakisiya biro bike imwabatizibwa omwa mulimu abuyirire.”
6 Neryo babere banahindene haghuma, mubamubulya bathi: “Mukama, mbwino wukasubuliraya Israeli y’obwami okwa ndambi eno?” 7 Mwababwira athi: “Si mwatsi wenyu eriminya emighulhu kutse ebirimo ebya Thatha abirihiraho omwa buthoki bwiwe. 8 Aliwe mukendi syahebwa amaaka omughulhu omulimu abuyirire akendi syabahikako, kandi mukendi syabya bema baghe e Yerusalemu, omwa Yudea yosi ne Samaria, n’erihika omwa bitsweka by’ehaali* eby’ekihugho.” 9 Abere abiribugha emyatsi eyi, ibanasamalire, mwasumbirwa endatha, n’ekithu mukyamulibania bamabya isibangathasya mulhangira. 10 Neryo babere banalhalhamire omo kyanya akaghenda, kitsumbukirania abalhume babiri abambere esyongyimba sy’enzeru mubimana aho bali 11 n’eribugha bathi: “Balhume be Galilaya, busana naki muk’imana imunalhalhamire omwa kyanya? Yesu oyu, oyuwabiribalhusibwako erithwalhwa omwa kyanya akendi syasa omwa mibere iyan’eyo ngoku mwanamalhangira akaghenda omo kyanya.”
12 Neryo mubasuba e Yerusalemu bakalhua okwa kithwe ekikahulhawamo Kithwe ky’Emizaituni, ekiri hakuhi ne Yerusalemu, olhughendo olho omundu aby’akalighirwa erighenda okwa kiro kye Sabato. 13 Babere bahika, mubahethukira omwa kisenge ky’eyighulhu eyo babya b’ikere. Habya Petero kuthya na Yohana na Yakobo na Anderea, Filipo na Tomasi, Batolomayo na Matayo, Yakobo mughalha wa Alfayo, na Simoni ow’omuhwa, na Yuda mughalha wa Yakobo. 14 Ibanawithe ekighendererwa kighuma, abosi aba babya ibanemuyitsingirira omw’isaba, haghuma n’abakali balebe na Maria mama wa Yesu n’abaghalha bobu Yesu.
15 Okwa biro ebyo, Petero mw’imana omwa kathi-kathi k’abalikyabo (omughanzo w’abandu abosi ababyaho abya nga 120) amabugha athi: 16 “Balhume, balikyethu, erisako lyabya litholere iryabererera ngoku omulimu abuyirire anabugha omwa nzira y’obuminyereri erilhabira omu Dawudi ebihambire oku Yuda, oyuwasondolha abahamba Yesu. 17 Kundi abya iniabirighanzirwa okw’ithwe kandi iniabirisangira omwa mubiiri ono. 18 (Neryo omulhume oyu mwaghulha ekithaka okwa buhingyi bw’ebithathunganene, abere athogha n’eritsuka omuthwe w’ahisi, mwathulika n’ebyosi eby’omo nda mubyapanzikana. 19 Eki mukyaminywa n’abikalhani bosi be Yerusalemu, kyamaleka ibahulha eririma eri omwa mubughe wabo mwa Hakeldama, ni bugha ambu, “Eririma ly’Omusasi.”) 20 Kundi kihandikire omwa kitabu ky’Esyonyimbo kithi, ‘Leka obwikalho bwiwe bubye kihume kandi sihabye oyukikalhamo’ kandi ‘Ekitsumbi kiwe ky’obulebererya kihebawe owundi.’ 21 Kwesi kitholere erisombolha okwa balhume ababya bakaghenda nethu omwa buthuku bwosi obwa Omukama Yesu akoleramo emibiiri yiwe* omwa kathi-kathi kethu, 22 eritsuka omughulhu Yohana amubatizaya erihika okwa kiro alhusibawa okw’ithwe akathwalhwa endatha, omughuma w’okwa balhume aba atholere iniathuyiyungako nayu eribya mwema w’erilhubuka lya Yesu.”
23 Neryo mubahayo amena abiri, Yozefu oyuwabya akahulhwamo Barisaba kandi Yusto, na Matia. 24 Neryo mubasaba bathi: “Kisi Yehova, iwe wasi emithima y’abosi, kanganaya nga ni wahi okwa balhume babiri aba oyo wabirisombolha 25 erisuba omo mubiiri oyu n’ow’obukwenda, ogho Yuda asighanaya akaghenda nzira siwe.” 26 Neryo mubaghusa obuthuli busana nabu, neryo akathuli mukahamba Matia, neryo amaghanzirwa* okwa bakwenda 11.