Emibiiri y’Abakwenda

2 Neryo Omukonga we Pentekote abere anemulholha embere, abosi haghuma babya ibanahindene omo mwanya mughuma. 2 Kitsumbukirania muhabya omuhumu erilhua elhubulha, owali ng’erihitha ly’ekiyagha kinene, neryo m’usulha omwa nyumba yosi eya babya b’ikeremo. 3 Neryo mubalhangira ebiri nga birimi by’omuliro, byamaghabwa, obuli kighuma mukyayitheka okwa buli mughuma w’okw’ibo, 4 n’abosi mub’usulibwa n’omulimu abuyirire n’eritsuka erikania omwa mibughe muthina-muthina, ngoku omulimu abathokesaya eribugha.

5 Okwa buthuku obo, Abayuda abakubaha Nyamuhanga erilhua omwa buli kihanda ekiri omwa kihugho babya iban’ikere e Yerusalemu. 6 Neryo omulenge oyu abere owibwa, abandu bangyi mubayihindania kandi mubasweka, kundi obuli mughuma mwowa bakabugha omwa mubughe wiwe. 7 Omo kwenene, mubasweka kutsibu n’eribugha bathi: “Lebaya, abosi abakabugha aba ni Bagalilaya, kwabithe? 8 Neryo kikathokekana kithi obuli mughuma w’okw’ithwe eribya inianemwowa omubughe wiwe? 9 Abaparti, Abamedi, n’Abaelamu; abikalhani be Mesopotamia, e Yudea ne Kapodokia, e Ponto n’ab’omwa provisi ye Asia, 10 Furugia ne Pamfilia, e Misiri n’ebihugho bye Libia hakuhi ne Kurene, ababunga erilhua e Roma, Abayuda n’abahindukira omwa Kiyuda; 11 Abakrete, n’Abaharabu—thukowa bakakania omwa mibughe yethu ebihambire okwa myatsi y’amaaka eya Nyamuhanga.” 12 Neryo abosi mubasweka n’erikukubalha, bamabwirana bathi: “Eki kikamanyisayaki?” 13 Aliwe abandi mubabasekererya n’eribugha bathi: “Babirithamira busana n’evini eyisihire.”*

14 Aliwe Petero mwahangana haghuma n’Erikumi n’Omughuma n’eribakanirya omwa mulenge muuli athi: “Bandu be Yudea nenyu inywe bosi ab’ikere e Yerusalemu, muminye kino kandi muhulikirire ndeke ebinywe byaghe. 15 Omo kwenene, abandu aba sibathamire ngoku mukalengekanaya, kundi sikine saha isathu sy’engyakya. 16 Mbaghane n’ekyo, bino by’ebyabughawa erilhabira omo muminyereri Yoweri: 17 ‘“Kandi omwa biro by’enyuma-nyuma,” Nyamuhanga athi, “Ngendi sy’uthulira omulimu waghe okwa buli mundu, n’abaana benyu ab’obulhume n’ab’obukali bakendi syaminyerera n’abalhwana benyu bakendi syabonokerwa n’abalhume benyu abakulire bakendisyalhotha ebilhotho, 18 nibya n’okwa baghombe baghe ab’obulhume n’ab’obukali ngendi syab’uthulirako omulimu waghe omwa biro ebyo, kandi bakendi syaminyerera. 19 Kandi ngendi syakolha ebikathikaya omwa lhubulha mw’endatha n’ebiminyikalho omwa kihugho mw’eyikwa—omusasi n’omuliro n’ebithu eby’omuki. 20 Eryuba likendi syahindukamo mwirima n’okwezi mwa musasi ekiro kinene kya Yehova eky’olhukengerwa kithe kyasa. 21 Kandi obuli mundu oyukabirikira okwa lina lya Yehova akendi syalhamibwa.”’

22 “Bandu be Israeli, muhulikirire ebinywe bino: Yesu Omunazareti abya mundu oyo Nyamuhanga abakanganaya ahathe eribisirira erilhabira omwa by’amaaka n’ebikathikaya n’ebiminyikalho ebya Nyamuhanga akolha erilhabira omw’iyo omwakathi-kathi kenyu, ngoku nenyu inywibene-bene munasi. 23 Omulhume oyu, oyuwahirawa omwa byalha by’esyonzighu siwe erikwamana n’erisonda* lya Nyamuhanga kandi busana n’amaaka wiwe aw’erisangwa aminya ebindu isibiri byabya, mumwamuhanika okwa muthi erilhabira omwa byalha by’abakolha-nabi, kandi mumwamwitha. 24 Aliwe Nyamuhanga mwamulhubukya omw’imuboholha okwa maghali* w’olhuholho, kundi sikyabya kithokekene olhuholho eribya ilhunamubohire. 25 Kundi Dawudi akamubughako athi: ‘Ngahira Yehova y’embere syaghe mughulhu wosi, kundi ali okwa byalha byaghe by’amali nuku singasuka-sukanibawe. 26 Busana n’omwatsi oyu omuthima waghe mwabya mw’ebitsange n’olhulimi lhwaghe mulhwatsema kutsibu. Kandi ngendi* syikalha omo maha; 27 kundi siwendi syanyisigha omw’Isinda* kutse erilighira omuthaleghulha wawu erihonda. 28 Wabirinyiminyisya esyonzira sy’engebe; wukendi syanyusulya mw’obutseme bunene embere syawu.’

29 “Balhume, balikyethu, kikalighirawa eribakanirya inganawithe obwiranda bw’erikania okwa muthwe w’eka Dawudi, ngoku mwaholha kandi amatsikwa, n’eyisinda yiwe yineho erihika namunabwire. 30 Kundi abya muminyereri kandi mwaminya ngoku Nyamuhanga abya iniabirimulhagha omw’ilhahirya kw’akendi syikalya omughuma w’okwa b’olhubutho* lhwiwe okwa kithumbi kiwe ky’obwami, 31 mwasangwa alhangira kandi mwakania okw’ilhubuka lya Kristo, ngoku mwathasighanibwa omw’Isinda* kandi omubiri wiwe mwathahonda. 32 Nyamuhanga mwalhubukya Yesu oyu, kandi ithwe bosi thuli bema b’eki. 33 Neryo kundi mwahamibwa okwa byalha by’amali bya Nyamuhanga n’erihebwa omulimu abuyirire owalhaghanisibawa erilhua oku Thatha, abiryuthulha ebya mukalhangira n’eriowa. 34 Kundi Dawudi mwathahethukira elhubulha, aliwe iyo iyuwene-wene akabugha athi, ‘Yehova mwabwira Omukama waghe athi: “Ikalha okwa byalha byaghe by’amali 35 erihika aho nasyahirira esyonzighu syawu mwa kithumbi ky’ebisandu byawu.”’ 36 Busana n’ekyo, abosi b’enyumba ya Israeli muminye ngoku omo kwenene Nyamuhanga mwamuyiramo Mukama kandi Kristo, Yesu oyu, oyo mwahanika okwa muthi.”

37 Neryo babere bowa ebi, mubakwa obulighe omwa mithima yabo, kandi mubabwira Petero n’abandi bakwenda bathi: “Balhume, balikyethu, thutholere ithwakolhaki?” 38 Petero mwababwira athi: “Muyisubemo, kandi obuli mughuma w’okw’inywe abatizibawe omwa lina lya Yesu Kristo busana n’erighanyirwa ebibi byenyu, neryo mukendi syahebwa ekihembo ky’omulimu abuyirire ekikahebawa ahathe eriliha. 39 Kundi omulhaghe ni wenyu n’abaana benyu, n’abosi abali haali, n’okwa bosi abo Yehova Nyamuhanga wethu angayilethako.” 40 Kandi omw’ikolesya ebindi binywe bingyi, mwaha obwema ndeke n’erilholha embere eribahabulha athi: “Mulhamibawe okwa lhulengo olhuhengemire olhu.” 41 Neryo ab’angirira ekinywe kiwe n’obutseme mubabatizibwa, kandi okwa kiro ekyo abandu nga 3,000 mubongerwako. 42 Kandi mubalholha embere erikangiriribwa n’abakwenda, erihindana haghuma, erilira ebyalya bya haghuma, n’erisaba.

43 Neryo obuli mundu mwatsuka eryubaha, n’abakwenda mubatsuka erikolha ebikathikaya n’ebiminyikalho bingyi. 44 Abosi ab’ikiriraya babya haghuma kandi mubatsuka eriwathikania omwa byosi ebyo babya bawithe, 45 kandi babya bakaghulya ebyo bawithe n’erighabira abosi b’esyosente esikalhuako, erikwamana n’obuyithawa bw’obuli mughuma. 46 Kandi obuli kiro ibakahindana omwa hekalhu mughulhu wosi ibanawithe ekighendererwa kighuma, kandi ibakalira ebyalya byabo omwa manyumba muthina-muthina kandi ibakahithaya ebyalya byabo ibanatsemire kutsibu kandi erilhua okwa muthima, 47 bakapipa Nyamuhanga n’erisimwa n’abandu bosi. Kandi obuli kiro Yehova iniakalholha embere eribongerako abakalhamibawa.