Ebaruha y’Erimbere Okwa Banya Korinto
4 Omundu atholere iniathulhangira ng’abaghombe ba Kristo kandi ng’abimaniri b’esyombitha sibuyirire sya Nyamuhanga. 2 Omw’eki, ekikayithaghisibawa okwa bimaniri ly’eryeghibwa ibane bathaleghulha. 3 Neryo okw’ingye si kikulhu inywe kutse ekoti y’abandu erinyitswera. Kundi nibya naghe ingyuwene-wene sindi yitswera. 4 Kundi sindi kw’olhubanza lhwosi-lhwosi olho nangayilhalikirira. Aliwe eki sikirikanganaya kithi ngathunganene; oyukanyitswera ni Yehova. 5 Busana n’ekyo, isimwatswera ekyosi-kyosi obuthuku obutholere buthe bwahika, erihika aho Omukama asyasira. Akendi syakangania emyatsi y’embitha ey’omwirima omo kyakakalha kandi akendi syaminyikalya amalengekania w’emithima, neryo obuli mundu akendi syahebwa eripipwa liwe erilhua oku Nyamuhanga.
6 Neryo balikyethu, emyatsi eyi namayihira yoko n’oku Apolo nuku mughasirawe, nuku erilhabira omw’ithwe mwang’igha ekihano kino: “Isimwalhabaya oko myatsi eyabirihandikwa,” nuku simwosule mw’emiyiheko, erilhangira owundi ng’alengire owundi. 7 Kundi nindi oyukakuyira mo wa mbaghane okwa wundi? Kandi ni kyahi ekya wuwithe ekya wuthahebawa? Neryo wamabya imuwahebwakyo, busana naki iwayihalhamba nga muwuthahebwakyo?
8 Mbwino mwabirighonerya? Mwabiribya bagaga? Mwabiritsuka erithabalha ng’abami isithuliho? Ambi mukathabya imwabiritsuka erithabalha ng’abami nuku nethu thwanga thabalha nenyu ng’abami. 9 Kundi okw’ingye, Nyamuhanga abiribya ng’abiriyira ithwe bakwenda mw’ab’erighunzerera erilhangirika ng’abandu ababiritswerwa olhw’erikwa, kundi thwabiribya abo ekihugho, abamalaika, n’abandu bakasamalira. 10 Thuli bakiru busana na Kristo, aliwe inywe muli b’amenge omu Kristo; sithuwithe kaghalha, aliwe inywe muwithe akaghalha; inywe mukasikibawa, aliwe ithwe sithuli sikibawa. 11 Erihika okwa saha iyan’eno thukalholha embere erikwa enzalha n’enyotha n’eribulha eky’eriambalha* n’eriswiribwa* n’eribya butsira ah’er’ikalha 12 n’erinuba, erikolha omwa byalha byethu. Omughulhu thukatsumawa, thukatsumulha; omughulhu thukendereribawa, thukayiyinaya omw’ighumisirizya; 13 omughulhu thukahangirirawa, thukasubiraya omwa bwolho-bwolho;* thwabiribya ng’eby’okwa kyabu eby’ekihugho, akasasiro k’obuli kindu, erihika na lino.
14 Ngahandika emyatsi eyi, isi busana n’eribahemulha, aliwe eribahabulha ng’abaana baghe banzwa. 15 Kundi nomumwangabya n’abalemberi 10,000 omu Kristo, omo kwenene simuwithe abothatha bangyi; kundi omu Kristo Yesu, nabiribya thatha wenyu erilhabira omwa ngulhu yuwene. 16 Busana n’ekyo, ngabalemba-lemba, munyigherereraye. 17 Ky’ekyamaleka inabathumira Timoteo, kundi ni mwana waghe mwanzwa kandi muthaleghulha omo Mukama. Akendi bibukya esyonzira syaghe esihambire oku Kristo Yesu, ngoku ngane mukangirirya ehosi-hosi omwa buli kithunga.
18 Abandi boswire mw’emiyiheko, nga sinendyasa eyo muli. 19 Aliwe ngakisiya ingasa eyo muli, Yehova amabya iniananzire, kandi ngendi minya, butsira ebinywe by’aboswire mw’emiyiheko, aliwe amaaka wabu. 20 Kundi Obwami bwa Nyamuhanga si mwatsi w’ebinywe aliwe ni w’amaaka. 21 Ni kyahi ekya mwanzire? Mbwino ngase eyo muli ingane n’omwigho kutse olhwanzo n’omuthima w’obwolho?