Emibiiri y’Abakwenda
18 Enyuma w’ebi, mwalhua e Atene amasa e Korinto. 2 Neryo mweya Omuyuda oyukahulhawamo Akwila, embuthwa ye Ponto oyuwabya imwanamalhua e Itale haghuma na mukali wiwe Prisila, kundi Klaudio abya iniabirihamulha athi Abayuda bosi balhue e Roma. Neryo mwaghenda eyo bali, 3 neryo kundi aby’akakolha omubiiri owali ng’owabu, mw’ikalha ewabu kandi amakolha nabo, kundi babya bakakolha omubiiri w’erilhuka esyohema. 4 Iniakaha omukania* omwa sinagogi okwa buli sabato kandi iniasona-sona Abayuda n’Abagiriki.
5 Neryo Sila na Timoteo babere bandaghalha erilhua e Makedonia, Paulo mwatsuka erithulha ekinywe n’omuhwa munene, akaha obwema okwa Bayuda erikangania ngoku Yesu ni Kristo. 6 Aliwe babere balholha embere erimuhakanisya n’erimutsuma, mwakungutha esyongyimba siwe n’eribabwira athi: “Omusasi wenyu abye okwa mithwe yenyu. Ingye ngahenirye. Eritsuka lino ngendi ghenda okwa bandu b’ebihanda.” 7 Neryo mwalhua eyo,* amaghenda omwa nyumba y’omulhume oyukahulhawamo Titio Yusto, omuramya wa Nyamuhanga, oyo enyumba yiwe yabya yihererenie n’esinagogi. 8 Aliwe Krispo, omukulhu w’omwa sinagogi mw’ikirirya Omukama, kuthya n’ab’enyumba yiwe abosi. N’abanya Korinto bangyi abowa mubatsuka erikirirya n’eribatizibwa. 9 Neryo omw’ibonokerwa, Omukama mwakania na Paulo omwa kiro athi: “Siwubahe, aliwe wulhole embere eribugha kandi siwubye bukuthu, 10 kundi ngane haghuma nawu kandi sihali mundu oyukendi kuthahirira erikukolha nabi; kundi ngawithe abandu bangyi omwa tawuni eyi.” 11 Neryo mw’ikalhayo ahabw’omwaka mughuma n’amezi mukagha, akabakangirirya ekinywe kya Nyamuhanga.
12 Neryo Galio iniane gavana we Akaya, Abayuda mubaya embitha y’erithahirira Paulo n’erimuthwalha embere sy’ekithumbi ky’eritswera, 13 bathi: “Omulhume oyu akathebereraya abandu athi baramaye Nyamuhanga omwa nzira eyikathwa emighambo.” 14 Aliwe Paulo iniakisiya iniabugha, Galio mwabwira Abayuda athi: “Inywe Bayuda, kwenene amabya iniasobirye kutse iniawithe omusango owakalire, ikikendibya ky’amenge ingye eribahulikirira omw’ighumisirizya. 15 Aliwe kyamabya in’ithendi hambangana omwa bya mukabugha, omwa mena, n’omwa mighambo yenyu, inywe inywibene-bene muyireberaye emyatsi eyi. Ingye singanzire eribya mutsweri w’emyatsi eyi.” 16 Neryo mwabathibithako athi balhue embere sy’ekithumbi ky’eritswera. 17 Neryo abosi mubahamba Sostini, omukulhu w’omwa sinagogi, n’eritsuka erimuswirirya embere sy’ekithumbi ky’eritswera. Aliwe Galio mwathayingirya omwa myatsi yosi eyi.
18 Aliwe Paulo abere abirighunzayo biro birebe, mwalhagha balikyethu neryo amasokera e Suria, iniane na Prisila na Akwila. E Kenguria, mwaghemba esyonzwiri siwe mwasikuhi kundu abya iniabiriyilhagha. 19 Neryo mubahika e Efeso, neryo mwabasigha eyo; aliwe mw’ingira omwa sinagogi amaghanirya n’Abayuda. 20 Nomwakine indi mubamuhathikana bathi athasyabya nabo habw’obuthuku, mwathaligha 21 aliwe mwabalhagha n’eribabwira athi: “Ngendi syasubulha, Yehova amabya ananzire.” Neryo mwalhua Efeso omo bwathu 22 neryo mwandaghalira e Kaisaria. Neryo mwahethuka,* amayaramukya ab’omwa kithunga neryo amandaghalira e Antiokia.
23 Abere abirighunzayo buthuku bulebe, mwalhuayo, amaghenda omwa buli mwanya erilhaba omwa kihugho kye Galatia ne Furugia, akaghumya abigha abosi.
24 Neryo Omuyuda oyukahulhawamo Apolo, embuthwa ye Alusanduria, mwahika e Efeso; abya mulhume oyuwasi ndeke erikania kandi oyuwasi ndeke Amasako. 25 Omulhume oyu abya iniabirikangiriribwa* omwa nzira ya Yehova, kandi iniahuha-huhene n’omulimu, iniakakanaya n’erikangirirya ebihikire ebihambire oku Yesu, aliwe iniasi ebihambire okwa lhubatizo lhwa Yohana bisa. 26 Mwatsuka erikangirirya omwa sinagogi buthubaha, neryo Prisila na Akwila babere bakowa akakangirirya, mubamuthwalha n’eritsuka erimusoborera enzira ya Nyamuhanga ya ndeke-ndeke. 27 Eryongera okw’ekyo, kundi aby’anzire erisokera e Akaya, balikyethu mubahandikira abigha, eribabwira bathi bamw’angirire ndeke. Neryo abere ahikayo, mwawathikya kutsibu ababya ibabiribya bikirirya busana n’olhukogho lhwa Nyamuhanga; 28 kundi embere sy’abandu kandi n’omuhwa munene mwakangania ndeke-ndeke ngoku Abayuda bawire, eribakangania omwa Masako ngoku Yesu ya Kristo.