Ebaruha y’Erimbere oku Timoteo
4 Aliwe, ekinywe eky’omulimu kikabugha ndeke-ndeke kithi omwa buthuku obukasa abandi bakendi syalhua okw’ikirirya, ibahulikirira emyatsi ey’emirimu eyikathebaya n’esyongangirirya sy’esyombinga, 2 erilhabira omwa buthebya bw’abandu abakabugha amabehi, abo obunyamuthima-thima bwabu bwabirihisibwa omwa kyuma ekihisirye kutsibu ekikaramba. 3 Bakathanga eky’eryingira omwa butheke n’eribwira abandu bathi isibalya ebyalya ebyo Nyamuhanga ahangika ini by’eriribwa n’abawithe erikirirya kandi abasi ndeke ekwenene ibanemuha ewasingya. 4 Kundi obuli kihangikwa kya Nyamuhanga kyuwene, neryo sihali ekyangaghanwa kyamangirirwa omw’iha ewasingya, 5 kundi kikayirawa mwa kibuyirire erilhabira omwa kinywe kya Nyamuhanga n’omw’ikisabira.
6 Omw’iha balikyethu b’erihabulha eri, wukendibya muherezya mubuya wa Kristo Yesu, iwakangania ku wukalisibawa ebinywe by’erikirirya n’erikangirirya libuya eryo wabirikwama ndeke. 7 Aliwe wughane esyongano sy’amabehi esithemo erisikya, ng’esikabughawa n’abakali bakulhu. Okwa lhundi lhuhandi, wuyithendeke iwune n’ekilhubirirwa ky’eryubaha Nyamuhanga. 8 Kundi erikalya-kalya omubiri* ni ry’omughaso habw’akathuku kake, aliwe eryubaha Nyamuhanga likaghasa omo myatsi yosi, kundi muli omulhaghe w’engebe eya lino n’engebe eyikasa. 9 Ebinywe ebyo ni by’eriyikethera kandi bitholere ibyaliwa ndeke. 10 Ky’ekikaleka ithwakolha kutsibu n’eriyikasa, kundi thwabirihira amaha wethu omu Nyamuhanga oyuliho, Omulhamya w’abandu b’emisindo yosi, kutsibu-tsibu ow’abathaleghulha.
11 Wulhole embere eribaha ebihano ebi n’eribakangiriryabyo. 12 Isiwaligha owosi-wosi akakughayira obunyethu bwawu. Omwakanya k’ekyo, wubye ky’erileberyako okwa bathaleghulha omwa mikanirye, omwa mibere, omo lhwanzo, omw’ikirirya, omw’ibya oyuhenirye omwa by’esyongeso.* 13 Erihika aho ngendi syasira, wulhole embere eriyihira okw’isomera embere sy’abandu, okw’ihana,* okw’ikangirirya. 14 Siwughalhaghandaye ekihembo ekiri omw’iwe ekyo wahebawa erilhabira omwa buminyereri omughulhu akathunga k’abasyakulhu kakuhirako ebyalha. 15 Wulengekanaye kutsibu* oko myatsi eyi; wuyihweraye muyo, nuku erikulha-kulhana lyawu lyanga minyikalha ndeke-ndeke oko bandu bosi. 16 Mughulhu wosi wubye iwunemuyilebya n’erilebya erikangirirya lyawu. Wuhathikane erikolha emyatsi eyi, kundi omw’ikolha eki, wukendi syayilhamya haghuma n’abakakuhulikirira.