Ebaruha Yakabiri Okwa Banya Korinto
10 Neryo ingye ingyuwene-wene, Paulo, ngabalemba-lemba omwa bwolho n’omwa lhukeri lhwa Kristo, nomungane mwolho omughulhu indi nenyu busu okwa busu, aliwe ngali muthubaha omughulhu ngathe nenyu. 2 Ngasaba indi omughulhu indi nenyu, ambi isihabya ekyanganyiyithaghako obuthubaha neryo ngakalha kutsibu okwa bakathulhangira ng’abalendera omwa nzira y’ekinyamubiri. 3 Nomwakine indi thukalendera kinyamubiri, sithulilhwa erikwamana n’ekya thuli kinyamubiri. 4 Kundi ebirwanisyo by’amalhwa wethu si by’ekinyamubiri, aliwe amaaka wabyo akalhua oku Nyamuhanga busana n’erikunulha ebindu ebyabirihanda emirihi. 5 Thukakunulha esyongangirirya n’obuli kindu ky’amaaka ekikahakanisaya amenge wa Nyamuhanga, kandi thunemutsundamira obuli bulengekania nuku bughondere Kristo; 6 kandi thunayitheghekire erisuyira obuli muthowa, omughulhu obwowa bwenyu bukendi hikana.
7 Mukasamalira emyatsi erikwamana n’emisosere yayo ey’eyihya. Omundu amabya inianakakasirye ngoku ni wa Kristo, athasyaghaniraya oku kino: Ngoku ane wa Kristo, nethu ku bine bithya. 8 Nomunanga yihalhamba kutsibu busana n’obuthoki obo Omukama athuha eribahimba butsira eribahimbulha, isinendi hemulhwa. 9 Singanzire kikabya nganabya inganza erib’ubahisya omwa syobaruha syaghe. 10 Kundi bakabugha bathi: “Esyobaruha siwe sirithohire kandi ni sy’amaaka, aliwe omughulhu ali nethu ni mutseke kandi ebinywe biwe ni buyira.” 11 Omundu ng’oyo ambi iniaminya ngoku ebyathukabugha* omwa syobaruha isithuliho, ibyathunemwendi kolha* omughulhu thuli haghuma nenyu. 12 Kundi sithwanzire eriyihira okwa lhulengo lhw’abakayihamaya kutse eriyilinganisya nabo. Aliwe omughulhu bakakolesaya olhulengo lhwabo eriyipima n’eriyilinganisya n’ibo ibobene-bene, sibawithe obuyitheghererya.
13 Aliwe sithwendi yihalhambira eyihya w’esyombibi esyothwabirihebwa, aliwe omwa lhubibi lhw’obulhambu obwa Nyamuhanga abirithupimira,* erilhuhikya nibya n’eyo muli. 14 Ni kwenene, sithuli lhaba okwa lhubibi, eribya nga sithwathahika eyo muli, kundi n’ithwe thwabya b’erimbere erihikya engulhu yuwene eyihambire oku Kristo eyo muli. 15 Eyihi, sithuli yihalhambira eyihya w’esyombibi esyo thwabirihebwa, eriyihalhambira omwa kaghalha k’owundi, aliwe thuwithe amaha thuthi erikirirya lyenyu likendibya linemulholha embere erikanyirira, ebya thwabirikolha bikendi kanyiriribwa omwa bulhambu obwethu. Neryo thukendyongera erikolha kutsibu, 16 nuku thuthulhughanaye engulhu yuwene omwa myanya eyiri haali okw’inywe, nuku sithuyihalhambire ebyabirisangwa byakolhwa omwa bulhambu bw’owundi. 17 “Aliwe oyukayihalhamba, ayihalhambire omu Yehova.” 18 Kundi si y’oyukayihamayako indi yukalighawa, aliwe oyo Yehova akahamayako.